Krasnoslobodsk (Volgogradan agj)

Krasnoslobodsk
Краснослободск

Lidnanznam
Valdkund	Venäma
Eläjiden lugu (2024)	16,419 ristitud
Pämez'	Nikolai Semiletov (tal'vku 2020—)
Telefonkod	+7−84 479-xx-xxx
Avtokod	34, 134
Aigvö	UTC+3 (MSK+0)

Sil sanal voib olda toižid znamoičendoid; miše nähta niid, tulgat tänna.

Krasnoslobodsk (ven.: Краснослобо́дск) om Venäman lidn Volgogradan agjan suves. Se om Volgogradan päivnouzmaine ezilidn, mülüb Volgogradan lidnaglomeracijha (1,4 mln. rist.). Lidn rajonan alištusenke om lidnankundan keskuseks Keskmäižen Ahtuban rajonas, sen kaikiš suremb eländpunkt da üks'jäine lidn.

Istorii

Eländpunktan aluz om pandud vl 1870 kuti Bukatin-futor, ezmäižen tulnuden elämižhe kanzan nimen mödhe. Vl 1923 futor nimitaškanzihe Rusttaks Slabadaks (Rusked Slabad — ven.: Красная Слобода). Vl 1938 slabad kändihe radnikžiloks. Vl 1955 Rusked Slabad sai lidnan statusad nügüdläiženke nimenke.

Ei ole surid edheotandoid lidnas, privatine leibänedheotand radab. Krasnoslobodsk om kottedžpertišton rajon. Ende laivansauvomižen tegim, kalategim i kaks' mebel'fabrikad oliba lidnas.

Geografijan andmused

Keskmäižen Ahtuban rajonan sijaduz agjas vn 2010 kartal

Lidn sijadase rajonan suvipalan päivlaskmas, Volg-jogen hural randal, se om vastrand Volgogradaspäi, 0 m ü.m.t. keskmäižel korktusel.

Matkad Volgogradhasai om üks' kilometr päivlaskmha, Keskmäine Ahtub-radnikžilhosai (rajonkeskuz) — kaks'kümne nell' kilometrad päivnouzmha avtotedme. Volgogradan avtotesild ühtenzoitab jogen randoid vspäi 2009.

Tobmuz

Kaks' pen't žilod mülüdas lidnankundha Krasnoslobodskan ližaks. Lidnankundan pind om 66,19 km².

Edeline lidnankundan pämez' om Vladimir Surkov (2016−2020).

Eläjad

Vn 2010 Venäman rahvahanlugemižen mödhe lidnan eläjiden lugu oli 15,998 ristitud, lidnankundan — 17,254 ristitud, vn 2021 lidnan — 16,545 ristitud. Vl 2017 kaik 17,405 ristitud elihe lidnas i 18,786 ristitud kaikes lidnankundas. Kaikiš suremb lidnan ristitišt oli 19 tuhad eläjid vozil 1957 i 1967.

Ortodoksižen hristanuskondan kaks' jumalanpertid oma avaitud lidnas: Mikulai-čudonsädajan (vspäi 2003) i Eläban Eziauguižen Stroican (vspäi 2007).

Openduz

Lapsiden opendusen aluzkundad oma nell' päivkodid, nell' školad, lapsiden sädamižen keskuz, čomamahtoiden škol.

Volgogradan vezitransportan tehnikuman Krasnoslobodskan filial (ende proflicei Aleksandr Nevalaižen nimed) om lidnan professionaližen opendusen aluzkundaks.

Galerei

• 
  Venäman kazmuzvodindan tedoinstitutan Vavilovan nimed eksperimentaline stancii vl 2012
• 
  «Klub rečnikov»-kul'turkeskuz (2021, Jogimehiden klub)
• 
  Debarkader lidnan valdmoidenno vl 2011

Irdkosketused

• Lidnan tobmuden oficialine sait (krasnoslobodsk-admin.ru). (ven.)