Mihailovk (lidn)

Mihailovk
Михайловка
Lidnanznam;	Flag;
Valdkund	Venäma
Eläjiden lugu (2025)	54,343 ristitud
Pind	60 km²
Pämez'	Aleksandr Türin; (sulaku 2021—)
Telefonkod	+7−84 463-xx-xxx
Avtokod	34, 134
Aigvö	UTC+3 (MSK+0)

Sil sanal voib olda toižid znamoičendoid; miše nähta niid, tulgat tänna.

Mihailovk (ven.: Миха́йловка) om Venäman lidn Volgogradan agjan lodehes. Se om agjan nellänz' lidn eläjiden lugun mödhe, Mihailovkan lidnümbrikon (edel 2012. vot — lidnan i rajonan eriži) administrativine keskuz, mülüb sihe.

Istorii

Nügüd'aigaižen eländpunktan aluz om pandud vl 1762 Medvedic-jogen hural randal kuti Mihail Sebräkovan slabad, Mihailovk lühüdaks, polknikan-alusenpanijan nimen mödhe. Kätihe slabadad radnikžiloks vl 1934. Toižen mail'man sodan aigan žilo ei olend okkupiruidud, no oli kahesakümnes kilometras ezipirdaspäi, raudtestancii i severz'-se kundaližid pertid oliba muretud bombardiruindoil. Vn 1948 keväz'kun 15. päiväl Mihailovk sai lidnan statusad. Sen-žo voden NSTÜ:n ministrišton käskön mödhe cementtegimen sauvond zavodihe varatoitmaha Stalingradan (nüg. Volgograd) toštmižsauvondad cemental, se tegim om lidnan kaikiš znamasižembaks edheotandaks tähäsai.

Mihailovkan ižandusen päsarakod oma sauvondmaterialoiden pästand (cement^[1], raudbetontegesed, savič, azbesttorved) da sömtegimišt, mugažo pörkičimiden tegim da mebel'fabrik oma saudud.

Geografijan andmused

Lidn sijadase ümbrikon keskuzpalan suves, Medvedic-jogen oiktal randal (Donan ližajogi), 83 m keskmäižel korktusel valdmeren pindan päl.

Matkad Volgogradhasai om 178 km suvipäivnouzmha orhal vai 192 km avtotedme. Lähembaine lidn om Frolovo vižkümnes kilometras suvipäivnouzmha.

Tobmuz

Mihailovk jagase kümneks lidnanlaptaks.

Edeline lidnümbrikon pämez' om Sergei Fomin (reduku 2017 — uhoku 2021).

Eläjad

Vn 2010 Venäman rahvahanlugemižen mödhe lidnan eläjiden lugu oli 59,132 ristitud, vspäi 2013 — lidnümbrikon ristitišton kaks' koumandest. Vn 2021 rahvahanlugemižen mödhe lidnan eläjiden lugu oli 56,031 ristitud. Kaik 58,407 eläjad oli lidnas vl 2017. Vll 1979−2018 lidnan ristitišton lugu oli stabiline, vajehtihe 58..60 tuhad röunoiš (60,034 rist. vl 2002).

Ortodoksižen hristanuskondan nell' jumalanpertid^[2] oma kaičenus i saudud lidnas.

Openduz

Lapsiden opendusen aluzkundad oma vižtoštkümne päivkodid, kahesa keskškolad (nomer 2..5, 7, 9..11), škol-internat sogedoiden täht, sportškol.

Kaik kuz' professionaližen opendusen aluzkundad ratas lidnas: Sebräkovon tehnologine tehnikum^[3], Mihailovkan professionaliž-pedagogine kolledž^[4], biznesan kolledž, Volgogradan medicinižen kolledžan filial i kaks' Volgogradan universitetoiden filialad.

Transport

Avtobusad oma kundaližeks transportaks lidnas da sen ümbrištos. Erine avtobusstancii om tranzitavtobusoiden täht.

Sebräkovo-raudtestancii sijadase «Volgograd — Povorino (Voronežan agj)»-keskustal vspäi 1870.

Galerei

Muštpacaz i igähine lämoi Suren sodan pölištunuzile saldatoile (2009)
Raštvoiden jumalanpert' lidnümbrikon Razdori-futoras, vn 2011 nägu
«Sebräkovskai»-adivpert' vl 2009
Cementnikoiden kul'turkeskuz (2009)
Sebräkovo-päraudtestancijan sauvuz vl 2009

Homaičendad

Irdkosketused

Mihailovkan lidnümbrikon tobmuden sait (mihadm.com). (ven.)
Lidnan Duman sait (mihduma.ru). (ven.)

Mihailovk (lidn) Vikiaitas

	Volgogradan agjan lidnad
	Dubovk \| Frolovo \| Kalač Donal \| Kamišin \| Kotel'nikovo \| Kotovo \| Krasnoslobodsk \| Leninsk \| Mihailovk \| Nikolajevsk \| Novoanninskii \| Pallasovk \| Petrov Val \| Serafimovič \| Surovikino \| Žirnovsk \| Urüpinsk \| Volgograd \| Volžskii

[1] Sebräkovon cementtegimen sait (sebcement.ru). (ven.)

[2] Mihailovkan pühäpertid sobory.ru-saital. (ven.)

[3] Sebräkovon tehnologižen tehnikuman sait (sebrteh.ru). (ven.)

[4] Mihailovkan prifessionaliž-pedagogižen kolledžan sait (mihppk.ru). (ven.)

[1]

[2]

[3]

[4]