Nikolajevsk (Volgogradan agj)

Nikolajevsk
Николаевск
Valdkund	Venäma
Eläjiden lugu (2021)	13,460 ristitud
Pämez'	Aleksandr Makeev; (reduku 2009—)
Telefonkod	+7−84 494-xx-xxx
Avtokod	34, 134
Aigvö	UTC+3 (MSK+0)

Sil sanal voib olda toižid znamoičendoid; miše nähta niid, tulgat tänna.

Nikolajevsk (ven.: Никола́евск) om Venäman lidn da lidnankund Volgogradan agjan pohjoižpäivnouzmas. Se om Nikolajevskan rajonan administrativižeks keskuseks da palaks.

Istorii

Eländpunktan aluz om pandud vl 1747 kuti Nikolajevskai-slabad (ven.: слобода Николаевская). Kätihe sidä radnikžiloks vl 1936. Vl 1957 žilo oli sirtud udhe sijha vezivaradimen sauvondan tagut. Žilo sai lidnan statusad kümnes vodes päliči, vl 1967.

Nikolajevsk šingotase maižandusen rajonan keskuseks, argvoikombinat radab.

Geografijan andmused

Lidn sijadase rajonan päivlaskmaižes čogas, Volgogradan vezivaradimen (Volgan) hural randal, 50 m ü.m.t. keskmäižel korktusel.

Kamišin-lidn om vezivaradimen vastrandal (vides kilometras). Erižed ehtatimed ratas jüguiden i passažoroiden täht kezaaigan. Lähembaine avtotesild Volgas päliči radab Volžskii-lidnas 167 km suvhe. Matkad Volgogradhasai om 162 km suvipäivlaskmha orhal, 179 km avtol vai 190 km jogedme.

Tobmuz

Nikolajevsk om lidnankundan üks'jäižeks eländpunktaks. Lidnankundan pind — 271,58 km².

Lidnan erine Administracii om likvidiruidud vn 2020 uhokule, Aleksandr Makeev oli sen pämehen (reduku 2009 — uhoku 2020). Rajonan Administracii tegeb sen velgusidme, Makeev jätktab radod lidnankundan pämeheks (Deputatoiden Nevondkundan ezimez') vn 2020 vilukuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 15 075 ristitud, vn 2021 — 13 460 ristitud, rajonan ristitišton läz pol't. Vl 2017 kaik 13 840 ristitud elihe lidnas. Kaikiš suremb lidnan ristitišt oli enččes slabadas vozil 1904−1914 (27..30 tuh. eläjid), lidnas — vozil 1989−2003 (ümbri 16 tuhas ristituid).

Ortodoksižen hristanuskondan Eläban Eziauguižen Stroican jumalanpert'^[1] om saudud lidnas vll 2001−2011.

Openduz

Lapsiden opendusen aluzkundad oma viž nimitadud päivkodid, koume keskškolad (nomer 1..3), čomamahtoiden škol, lapsiden da norišton sportškol.

Profškol nomer 44^[2] i Žirnovskan kivivoitehnikuman filial oma professionaližen opendusen aluzkundoikš Nikolajevskas.

Homaičendad

Irdkosketused

Lidnan tobmuden aluzkundoiden oficialine sait (gorodnikolaevsk.ru). (ven.)

Nikolajevsk (Volgogradan agj) Vikiaitas

	Volgogradan agjan lidnad
	Dubovk \| Frolovo \| Kalač Donal \| Kamišin \| Kotel'nikovo \| Kotovo \| Krasnoslobodsk \| Leninsk \| Mihailovk \| Nikolajevsk \| Novoanninskii \| Pallasovk \| Petrov Val \| Serafimovič \| Surovikino \| Žirnovsk \| Urüpinsk \| Volgograd \| Volžskii

[1] Nikolajevskan pühäpertid sobory.ru-saital. (ven.)

[2] Nikolajevkan Profškolan nomer 44 sait (nikolaevskpu44.ucoz.ru). (ven.)

[1]

[2]