Urüpinsk

Urüpinsk
Урюпинск
Lidnanznam;	Flag;
Valdkund	Venäma
Eläjiden lugu (2025)	34,783 ristitud
Pind	39,32 km²
Pämez'	Jurii Horošen'kov; (uhoku 2020—)
Telefonkod	+7−84 442-xx-xxx
Avtokod	34, 134
Aigvö	UTC+3 (MSK+0)

Urüpinsk (ven.: Урю́пинск) om Venäman lidn da lidnümbrik Volgogradan agjan lodehes. Se om Urüpinskan rajonan administrativižeks keskuseks mugažo, ei mülü sihe.

Istorii

Eländpunkt mainitase ezmäižen kerdan 14. voz'sadan Uz'lidnan Ezmäižes aigkirjas kuti Urüpesk-lidn Červlönii Jar-tahondas. Nügüdläižen eländpunktan aluz om pandud kozakoil läz 1618. vot kuti Urüpinskai-stanic (ven.: станица Урюпинская), mülüi Donan sodavägiden agjaha. Urüpino-raudtestancii radab vspäi 1871, se oli vaiše jüguiden täht vll 2011−2020, om sarakon lopstancijaks «Lipeck — Volgograd»-jonospäi. Stanic sai lidnan statusad nügüdläiženke nimenke vn 1929 7. päiväl vilukud. Toižen mail'man sodan aigan lidn oli alištunu avialondoile.

Urüpinsk šingotase sömtegimišton edheotandoil (pühävointegim, leibtegim), mugažo libutimiden tegim, söndtavaroiden pakuitesen tegim i trikotažfabrik ratas siš. Paikoiden tehmine kozan alakarvaspäi om tetabaks pramozlaks, se vedab turistoid.

Geografijan andmused

Lidn sijadase ümbärdajan rajonan keskuzpalan päivnouzmas, Hopr-jogen hural randal (Donan oiged ližajogi), 80 m ü.m.t. keskmäižel korktusel.

Matkad Volgogradhasai om 295 km suvipäivnouzmha orhal vai 335 km avtotedme. Lähembaižed lidnad oma Voronežan agjan Novohopörsk nell'kümne koume kilometrad lodeheze orhal vai 105 km avtotedme i Povorino 50 km pohjoižhe orhal vai 80 km avtol.

Tobmuz

Urüpinsk om lidnümbrikon üks'jäižeks eländpunktaks.

Lidnümbrikon tobmuden pämez' om lidnan Administracijan pämez' vn 2020 uhokuspäi. Jurii Horošen'kov radoi lidnan Administracijan pämehen vn 2008 redukuspäi vn 2020 uhokuhusai. Lidnümbrikon edeline pämez' (lidnan Duman ezimez') om Ella Čermašenceva (sügüz'ku 2014 — uhoku 2020), hän radoi Duman ezimehen vn 2022 semendkuhusai. Lidnan Dum kogoneb 21 deputataspäi.

Eläjad

Vn 2010 Venäman rahvahanlugemižen mödhe lidnan eläjiden lugu om 41,590 ristitud, vn 2021 — 36,669 ristitud. Vl 2017 kaik 38,267 ristitud eliba lidnas. Kaikiš suremb lidnan ristitišt oli 44,200 eläjad vl 1996.

Rahvahad (enamba 0,4 % vl 2021): venälaižed — 87,1 %, toižed rahvahad — 2,3 %, rahvahuden ozutandata — 10,6 %.

Ortodoksižen hristanuskondan nell' pühäpertid^[1] oma avaitud lidnas: Jumalanmaman Katken kafedraline päjumalanpert' (kivine om saudud vll 1785−1792, udessündutamas vspäi 2011), Raštvoiden jumalanpert' (om letud vl 1850) i kaks' časounäd.

Openduz

Lapsiden opendusen aluzkundad^[2] oma kahesa nimitadud i nomeruidud päivkodid (nomer 1, 2, 4..9), kuz' keskškolad (nomer 3..8), licei, gimnazii, lapsiden sädamižen keskuz, čomamahtoiden škol, lapsiden da norišton sportškol nomer 1.

Professionaližen opendusen aluzkundad: Urüpinskan agrotegimištoline tehnikum^[3], Volgogradan medicinižen kolledžan filial^[4] i Urüpinskan biznesan kolledž^[5] (Volgogradan biznesan institutan filial).

Galerei

Lidnümbrikon i Urüpinskan rajonan ohjandaikundoiden sauvuz Leninan torgul (2012)
Jumalanmaman Katken kafedraline päjumalanpert', vn 2012 nägu
ZAGS i kuvagalerei (2012)
Lidnan puišton verai (2012)
Urüpino-päraudtestancijan sauvuz vl 2012

Homaičendad

Irdkosketused

Lidnümbrikon tobmuden sait (urupinsk.net). (ven.)

Urüpinsk Vikiaitas

	Volgogradan agjan lidnad
	Dubovk \| Frolovo \| Kalač Donal \| Kamišin \| Kotel'nikovo \| Kotovo \| Krasnoslobodsk \| Leninsk \| Mihailovk \| Nikolajevsk \| Novoanninskii \| Pallasovk \| Petrov Val \| Serafimovič \| Surovikino \| Žirnovsk \| Urüpinsk \| Volgograd \| Volžskii

[1] Urüpinskan pühäpertid sobory.ru-saital. (ven.)

[2] Urüpinskan municipaližed aluzkundad lidnümbrikon urupinsk.net-saital. (ven.)

[3] Urüpinskan agrotegimištol'žen tehnikuman sait (uryupagrotech.ru). (ven.)

[4] Volgogradan medicinine kolledž — Urüpinskan filialan sait (umk.vmk1.ru). (ven.)

[5] Urüpinskan biznesan kolledžan sait (ukbvib.ru). (ven.)

[1]

[2]

[3]

[4]

[5]