Povorino

Povorino
Поворино

Lidnanznam	Flag
Valdkund	Venäma
Eläjiden lugu (2021)	16,417 ristitud
Pind	18 km²
Pämez'	Vladimir Buravlev (sügüz'ku 2017—)
Telefonkod	+7−47 376-xx-xxx
Avtokod	36, 136
Aigvö	UTC+3 (MSK+0)

Povorino (ven.: Пово́рино) om Venäman lidn, lidnankund da raudtesol'm Voronežan agjan päivnouzmas. Se om Povorinon rajonan administrativine keskuz, mülüb sihe.

Istorii

Eländpunktan aluz om pandud vl 1870 kuti raudtestancii da žilo senno, nimitihe lähižen Povorino (Roždestvenskoje) žilon mödhe. Kätihe radnikžiloks vl 1938. Se sai lidnan statusad vl 1954, kändihe rajonan keskuseks ühtenaigašti.

Povorino šingotase čulkfabrikal, sömtegimištol (saharankombinat) i raudten edheotandoil (vedimdepo).

Geografijan andmused

Lidn sijadase rajonan keskuzpalan päivlaskmas, Hopr-jogen keskjoksmusen hural randal (ven.: Хопёр 979 km pitte, Don-jogen hura ližajogi), 115 m ü.m.t. keskmäižel korktusel. Matkad Volgogradan agjhasai om kuz' kilometrad suvhe orhal. Matkad Voronežhasai om 216 km päivlaskmha orhal, 248 km avtotel vai 320 km raudtel. Lähembaine lidn om Borisoglebsk 22 km pohjoižhe-lodeheze orhal, 39 km avtotedme vai 26 km raudtedme. Povorino-raudtestancii radab lidnan keskuzpalas, se om saudud «Liski — Balašov»- i «Lipeck — Volgograd»-keskustoiden ristikoičendal. Raudte jagab lidnad poleti, päivlaskmpolehe i päivnouzmpolehe.

Povorino om lidnankundan üks'jäižeks eländpunktaks. Lidnankundan pind — 37,03 km².

Eläjad

Vl 1939 žilon ristitišt oli 10 800 eläjad. Vn 2010 Venäman rahvahanlugemižen mödhe lidnan eläjiden lugu oli 17 692 ristitud, rajonan pol'. Kaik 17 095 eläjad oli lidnas vl 2017. Kaikiš suremb lidnan ristitišt oli 19..20 tuhad eläjid vll 1959−2001 (20 591 rist. vl 1970).

Rahvahad (2010): venälaižed — 95,2 %, toižed rahvahad — 4,8 %.

Ortodoksižen hristanuskondan Jumalanmaman Kazanin jumalaižen pühäpert' om saudud lidnas.

Liskin tehmištoliž-transportižen tehnikuman Povorinon filial om lidnan professionaližen opendusen aluzkundaks.

Lidnankundan tobmuden pämez' om sen Rahvahandeputatoiden nevondkundan ezimez'. Lidnan Administracijan pämez' om Mihail Bragin vn 2018 uhokuspäi.

Irdkosketused

• Lidnankundan tobmuden aluzkundoiden sait (povorino-r20.gosweb.gosuslugi.ru). i sen vanh versii (povorinosity.ru). (ven.)