Povorino

Povorino
Поворино

Lidnanznam	Flag
Valdkund	Venäma
Eläjiden lugu (2025)	16,224 ristitud
Pind	18 km²
Pämez'	Vladimir Buravlev (sügüz'ku 2017—)
Telefonkod	+7−47 376-xx-xxx
Avtokod	36, 136
Aigvö	UTC+3 (MSK+0)

Povorino (ven.: Пово́рино) om Venäman lidn, lidnankund da raudtesol'm Voronežan agjan päivnouzmas. Se om Povorinon rajonan administrativine keskuz, mülüb sihe.

Istorii

Eländpunktan aluz om pandud vl 1870 kuti raudtestancii da žilo senno. Nimitihe lähižen Povorino (Roždestvenskoje) žilon mödhe, kudamban nimi libui venän повар-sanaspäi «keitai», 15 oigetud küksushe Moskvaspäi radonheitandan tagut keitajad kanzoidenke eläškanziba siš vl 1722. Mugažo pojav venän sana paginoiš om повора «aidoitez». Nevondkundaližen aigan žilon raudtestancijanno pertišt levitaškanzihe, i kätihe radnikžiloks vl 1938. Toižen mail'man sodan aigan transportteiden znamasine sol'm oli alištunu bombardiruindoile. Radnikžilo sai lidnan statusad vn 1954 kezakun 3. päiväl, kätihe rajonan keskuseks ühtenaigašti.

Povorino šingotase čulkfabrikal, sömtegimištol (saharankombinat) i raudten edheotandoil (vedimdepo).

Geografijan andmused

Povorinon rajonan sijaduz agjas vn 2010 kartal

Lidn sijadase rajonan keskuzpalan päivlaskmas, Hopr-jogen keskjoksmusen hural randal (ven.: Хопёр 979 km pitte, Don-jogen hura ližajogi), 115 m ü.m.t. keskmäižel korktusel.

Matkad Volgogradan agjhasai om kuz' kilometrad suvhe orhal. Matkad Voronežhasai om 216 km päivlaskmha orhal, 248 km avtotel vai 320 km raudtel. Lähembaine lidn om Borisoglebsk kaks'kümnes kahtes kilometras pohjoižhe-lodeheze orhal, 39 km avtotedme vai 26 km raudtedme. Povorino-raudtestancii radab lidnan keskuzpalas, se om saudud «Liski — Balašov»- i «Lipeck — Volgograd»-keskustoiden ristikoičendal. Raudte jagab lidnad kaks'haz, päivlaskmpolehe i päivnouzmpolehe.

Tobmuz

Povorino om lidnankundan üks'jäižeks eländpunktaks. Lidnankundan pind — 37,03 km².

Lidnankundan tobmuden pämez' om sen Rahvahandeputatoiden nevondkundan ezimez'. Lidnan Administracijan pämez' om Mihail Bragin vn 2018 uhokuspäi.

Eläjad

Vl 1939 žilon ristitišt oli 10,800 eläjad. Vn 2010 Venäman rahvahanlugemižen mödhe lidnan eläjiden lugu oli 17,692 ristitud, rajonan pol', vn 2021 — 16,427 ristitud. Kaik 17,095 eläjad oli lidnas vl 2017. Kaikiš suremb lidnan ristitišt oli 19..20 tuhad eläjid vll 1959−2001 (20,591 rist. vl 1970).

Rahvahad (2010): venälaižed — 95,2 %, toižed rahvahad — 4,8 %.

Rahvahad (enamba 0,4 % vl 2021): venälaižed — 91,0 %, čiganalaižed — 2,8 %, armenijalaižed — 0,6 %, tadžikalaižed — 0,6 %, uzbekad — 0,4 %, toižed rahvahad — 1,7 %, rahvahuden ozutandata — 2,9 %.

Ortodoksižen hristanuskondan Jumalanmaman Kazanin jumalaižen pühäpert' om saudud lidnas.

Openduz

Lapsiden opendusen aluzkundad oma nell' nomeruidud päivkodid (nomer 1..4), koume keskškolad (nomer 1..3), školanirdpol'žen radon keskuz, čomamahtoiden škol Ju.B. Romanovan nimed, lapsiden da norišton sportškol.

Liskin tehmištoliž-transportižen tehnikuman Povorinon filial om lidnan professionaližen opendusen aluzkundaks.

Irdkosketused

• Lidnankundan tobmuden aluzkundoiden sait (povorino-r20.gosweb.gosuslugi.ru). i sen vanh versii (povorinosity.ru). (ven.)