Novovoronež

Novovoronež
Нововоронеж

Lidnanznam	Flag
Valdkund	Venäma
Eläjiden lugu (2021)	30,658 ristitud
Pind	46,13 km²
Pämez'	Nikolai Netäga (sügüz'ku 2015—, Николай Нетяга)
Telefonkod	+7−47 364-xx-xxx
Avtokod	36, 136
Aigvö	UTC+3 (MSK+0)

Novovoronež (ven.: Нововоро́неж) om Venäman lidn da lidnümbrik Voronežan agjan lodehes. Se om agjan kudenz' lidn eläjiden lugun mödhe, om ümbärtud Kaširskojen i Hohol'skijan rajoniden territorijal.

Istorii

Eländpunktan aluz om pandud vl 1957 kuti lidnanvuitte Novo-Gresovskii-žilo (ven.: Ново-Грэсовский), sid' Novovoronežskii, sauvomha da holitamha atomelektrostancijad. Atomstancii om rados vn 1964 sügüz'kuspäi, vl 2020 nell' reaktorad radoiba. Vll 1959−1963 žilo oli Novovoronežskijan rajonan keskuseks. Se sai lidnan statusad vn 1987 23. päiväl keväz'kud nügüdläiženke nimitusenke. Lidnümbrik om sätud vl 2008.

Novovoronež šingotase AES:al (elektrusen i lämuden tehmine) da sidotud sihe edheotandoil, niiden kesken radiacižjändusiden ümbriradmine, kalankazvatuz.

Geografijan andmused

Lidn vedase pidust' Don-jogen hurad randad i sijadase AES:an vilugoitajan uiton (läz kut nellikkilometrad) randal Don-jogenno, 110 m ü.m.t. keskmäižel korktusel. AES:an rad zavodiše koumes polenke kilometras suvhe lidnan keskuzfartaloišpäi. Matkad Voronežhasai om 39 km pohjoižhe orhal, 47 km avtotel vai 62 km raudtel. Toine lähembaine lidn om Liski 41 km suvipäivnouzmha-suvhe orhal, 80 km avtotedme vai 54 km raudtedme.

Novovoronežskai-jügustancii (ven.: Нововоронежская) radab lidnan suves vspäi 1963 ühesakilometrižen sarakon lopstancijaks «Voronež — Rossoš»-raudtekeskustaspäi, sarak läbitab kaiked lidnad. «Don»-avtote (M4-trass) mäneb 25 km päivnouzmha orhal lidnaspäi.

Novovoronež om lidnümbrikon üks'jäižeks eländpunktaks. Lidnümbrikon pind — 46,13 km².

Eläjad

Vl 1959 žilon ristitišt oli 3 011 eläjad, vl 1979 — 25 750 eläjad. Vn 2010 Venäman rahvahanlugemižen mödhe lidnan eläjiden lugu oli 32 635 ristitud. Kaik 31 607 eläjad oli lidnas vl 2017. Kaikiš suremb lidnan ristitišt oli 39,8..40 tuhad eläjid vll 1996−2001 (40 tuh. rist. vl 1998).

Rahvahad (2010): venälaižed — 97,9 %, ukrainalaižed — 1,2 %, toižed rahvahad — 0,9 %.

Ortodoksižen hristanuskondan koume jumalanpertid oma saudud lidnas.

Novovoronežan politehnine institut (ende kolledž) — Nacionaližen südäitukuižen «MIFI»-tedoiduzuniversitetan filial om lidnan professionaližen opendusen aluzkundaks.

Lidnümbrikon tobmuden pämez' om lidnan Duman ezimez'. Lidnan Administracijan pämez' om Roman Jefimenko vn 2023 kezakuspäi. Edeline lidnan Administracijan pämez' om Vladimir Leščenko (tal'vku 2018 — keväz'ku 2021, kezaku 2021 — kezaku 2023).

Galerei

• 
  Novii Dom-torguindkeskuz (2010, «uz' pert'»)
• 
  Sündun mel'kuvan jumalanpert', vn 2014 nägu (om saudud vll 2000−2009)
• 
  Novovoronežan AES vl 2011
• 
  Kul'turkeskuz (2016)
• 
  Novovoronežskai-raudtestancii vl 2013

Irdkosketused

• Lidnümbrikon tobmuden aluzkundoiden sait (novovoronezh-20.gosweb.gosuslugi.ru). (ven.)