Ertil'

Ertil'
Эртиль

Lidnanznam	Flag
Valdkund	Venäma
Eläjiden lugu (2021)	10,024 ristitud
Pind	20 km²
Pämez'	Jevgenii Močalov (viluku 2021—)
Telefonkod	+7−47 345-xx-xxx
Avtokod	36, 136
Aigvö	UTC+3 (MSK+0)

Ertil' (ven.: Эрти́ль) om Venäman lidn da lidnankund Voronežan agjan pohjoižes. Se om Ertilin rajonan administrativine keskuz, mülüb sihe.

Istorii

Eländpunktan aluz om pandud vll 1891−1897 žiloks sauvomha da holitamha sahartegint, nimitihe jogen mödhe. Edel ut sauvondad Jertil-žilo (ven.: Ертыл, mainitase vspäi 1698) oli tetab 17. voz'sadaspäi 20 km päivlaskmha nügüdläižes lidnaspäi, sen uz' nimituz om Vanh Ertil' (ven.: Старый Эртиль). Sahartegim radaškanzi vl 1897, se voz' lugese lidnan alusenpanendan oficialižeks. «Lipeck — Borisoglebsk»-raudtekeskust läbiti lidnad vl 1915. Rahvahanikoiden sodan aigan polttihe tegint, saudihe ut sahartegint vll 1931−1934 sijaliženke maižanduzbazanke. Kätihe Ertilid radnikžiloks vn 1938 4. päiväl tal'vkud, panihe sil-žo vodel rajonan keskuseks. Toižen mail'man sodan aigan lidn ei olend okkupiruidud nacistoil, no frontan pird mäni läz. Radnikžilo sai lidnan statusad vn 1963 1. päiväl uhokud.

Ertil' šingotase mašinansauvomižen (valamiž-mehanine tegim — mašiništ sömtegimišton i kivivointegimišton täht, kodvindmehanine tegim — varapalad sömtegimišton mašiništon täht), sömtegimištol (saharantegim, pühävoitegim, maidon edheotand, jauhkombinat) i mecan udessündutandan da melioracijan edheotandal.

Geografijan andmused

Lidn sijadase rajonan pohjoižes, ühtennimižen jogen molembil randoil (ven.: (Большой) Эртиль 92 km pitte, Don-jogen hurapol'ne bassein), 140 m ü.m.t. keskmäižel korktusel. Matkad Tambovan agjhasai om koume kilometrad pohjoižhe i viž kilometrad päivnouzmha orhal. Matkad Voronežhasai om 112 km päivlaskmha orhal, 134 km avtotel vai 223 km raudtel. Lähembaine lidn om Žerdevk (Tambovan agj) 46 km päivnouzmha orhal, 84 km avtotedme vai 88 km raudtedme. Ertil' -raudtestancii radab lidnan pohjoižpalas, se om 31-kilometrižen sarakon lopstancijaks Tambovan agjan Mordovo-žilospäi (Oboron-stancii).

Kaik kahesa žilod mülüdas lidnankundha Ertilin ližaks. Lidnankundan pind — 196,58 km².

Eläjad

Vl 1939 lidnan ristitišt oli 7 100 eläjad. Vn 2010 Venäman rahvahanlugemižen mödhe lidnan eläjiden lugu oli 11 387 ristitud, lidnankundan — 12 996 ristitud, rajonan pol'. Kaik 10 410 ristitud elihe lidnas i 11 955 ristitud kaikes lidnankundas vl 2017. Kaikiš suremb lidnan ristitišt oli 16 tuhad eläjid vl 1967 i 13..14 tuhad eläjid vll 1979−2001 (14 300 rist. vl 1992).

Rahvahad (2010): venälaižed — 98,5 %, toižed rahvahad — 1,5 %.

Ortodoksižen hristanuskondan kaks' jumalanpertid oma saudud lidnas: Jumalanmaman Iverižen jumalaižen (letihe vll 1991−1994) i ph. Serafim Sarovalaižen (om sätud vll 1999−2001).

Borisoglebskan maižanduztehnikuman Ertilin filial om lidnan professionaližen opendusen aluzkundaks.

Lidnankundan tobmuden pämez' om sen Administracijan pämez'. Edeline lidnan pämez' om Aleksandr Prokudin (2002 — viluku 2021).

Irdkosketused

• Lidnankundan tobmuden aluzkundoiden sait (ertilcity.ru). (ven.)