Voronež

Voronež
Воронеж

Lidnanznam	Flag
Valdkund	Venäma
Eläjiden lugu (2024)	1,046,425 ristitud
Pind	596,51 km²
Pämez'	Vadim Kstenin (sulaku 2018—)
Telefonkod	+7−473-xxx-xxxx
Avtokod	36, 136
Aigvö	UTC+3 (MSK+0)

Sil sanal voib olda toižid znamoičendoid; miše nähta niid, tulgat tänna.

Lidnan kart (2014)

Voronež (ven.: Воро́неж) om millionerlidn da lidnümbrik Venäman päivlaskmas. Se om Voronežan agjan administrativine keskuz i kaikiš suremb lidn, järed openduzkeskuz, «sodahoštusen lidn»-arvnimenke (vspäi 2008), Voronežan aglomeracijan keskuz (1,3 mln rist.).

Istorii

Eländpunktan aluz om pandud vl 1586 kuti lidnuz lidnan statusanke kaičemha tahondad kalaidajiden heimoiden londoid vaste. Vspäi 1715 lidn oli Azovan gubernijan keskuseks (oli sätud vl 1708), udesnimitihe Voronežan gubernijaks vl 1725. Vn 1748 semendkus lämoipalo mureni lidnan edelišt keskust.

7. heinku 1942 — 25. viluku 1943 oma lidnan palahižen okkupacijan datad Suren voinan aigan, Voronežan pertišton 92 % oli pandud mantazole (18 tuhad pertid). Lidnan udessauvond oli vaumitud tobjas palas vodele 1950.

Voronež šingotase tegimišton nenil sarakoil: himine, mašinansauvomine (avia- da raudtetransportine, torviden i kaivuzmašiništ), sömtegimišt, elektronine, meblin edheotandad.

Geografijan andmused

Lidn sijadase agjan lodehes, ühtennimižen jogen muugotil randoil (Voronežan vezivaradim, Donan hura randpol'), 154 metrad ü.m.t. keskmäižel korktusel. Hural randal reljef om tazo da madal, oiktal randal — kukhikaz, 100..160 m korktusil. Voronežan keskuz sijadase kahesas kilometras Donaspäi. Muga nimitadud «Voronežan pol'sar'» sijadase Donan da Voronežan vezivaradimen keskes. Lidn seižub mecstepin rajonan suves.

Matkad Moskvhasai om 515 km pohjoižhe. Lähembaine lidn om Semiluki ani päivlaskmha Donan vastrandal.

Klimat om ven kontinentaline. Voden keskmäine lämuz om +7,5 C°, kezakun-elokun +19,1..+21,1 C°, tal'vkun-uhokun −4,3..−6,0 C°. Ekstremumad oma −36,5 C° (viluku, uhoku) i +40,5 C° (heinku, eloku). Kezaaigan minimum om −1,6 C° (kezaku), tal'vaigan maksimum om +12,4 C° (tal'vku). Ei voi panda halad heinkus-elokus (elokun minimum om +0,4 C°). Paneb sadegid 572 mm vodes, läz tazomäras kuidme, enamba kezakus-heinkus (58..61 mm kus), vähemba uhokus-keväz'kus (38..39 mm kus). Il'man vozne keskmäine relätivine nepsuz om 74 %.

Tobmuz

Voronežan administrativižed rajonad: (vn 2016 kart)
1. Raudteiden rajon
2. Keskuzrajon
3. Kominternan rajon
4. Leninan rajon
5. Nevondkundaline rajon
6. Hurarandaine rajon

Voronež om lidnümbrikon üks'jäižeks eländpunktaks. Se jagase kudeks administrativižeks rajonaks. Om ümbärtud agjan viden rajonan territorijal.

Edeline lidnan pämez' om Aleksandr Gusev (2013 — sulaku 2018).

Eläjad

Vl 1913 lidnan ristitišt oli 94 800 ristitud. Vn 2010 Venäman rahvahanlugemižen mödhe lidnan eläjiden lugu oli 975 373 ristitud, vn 2021 — 1 057 681 ristitud. Vozil 2010−2011 enamba kaks'kümned ezilidnan žilod ližaduihe lidnümbrikho, kahtes vodes lidnan ristitišt sureni 136 tuhan ristituid, i kändihe millionnikaks oficialižeks vn 2012 tal'vkus. Kaik 1 039 801 eläjad oli lidnas vl 2017. Kaikiš suremb lidnan ristitišt oli 1 058 261 eläjad vl 2020.

Rahvahad (enamba 0,4 % vl 2010): venälaižed — 87,2 %, ukrainalaižed — 0,9 %, armenijalaižed — 0,4 %, toižed rahvahad — 1,5 %, rahvahuden ozutandata — 10,0 %.

Nened pühäpertid oma avaitud lidnas: ortodoksine hristanuskond — ph. Oleksijan Akatov-naižjumalankodi, Jumalanmaman Blagoveššenjan i Katken päjumalanpertid, läz 70 jumalanpertid i kümne časounäd, riman katoline jumalankodikund — loičendpert', protestantizm — kuz' jumalanpertid (sidä kesken baptizm kaks', lüteranine jumalankodikund üks', metodizm koume), judaizm — üks' pühäpert'.

Transport

Avtobusad, trolleibusad da maršruttaksid oma kundaližeks transportaks lidnas. Kaik nell' avtotesildad, raudtesild da avtote Voronežan padoseinädme ühtenzoittas Voronežan vezivaradimen randoid.

Vl 1868 raudte tuli Voronežha. Koume päraudtestancijad ratas lidnas: Voronež I, Voronež-Kurskii i Pridač (Voronež-Suvine).

Rahvahidenkeskeine civiline Voronež-lendimport Petran I nimed (VOZ / UUOO / ВРН, ende Čertovickoje, 853 tuh. passažiroid vl 2019) sijadase kümnes kilometras pohjoižhe lidnan keskusespäi. Sišpäi tehtas reisid Evropan i Keskuzazijan maihe, Venämadme tobjimalaz, mugažo čarterreisid lebutahoiže; Moskvan regionan varalendimport. Sen ližaks Baltimor-sodalendimpöud da aviategimen Pridač-lendimpöud oma lidnan röunoiden südäimes.

Galerei

• 
  Lidnümbrikon Administracijan sauvuz (2012)
• 
  Venäman Keskuzbankan palakund Teatral'nai-irdal (2015)
• 
  Pühän Jumalanmaman Blagoveššenjan kafedraline päjumalanpert', vn 2012 nägu
• 
  Ph. Aleksijan Akatan naižjumalankodi, vn 2007 nägu jogen randaspäi
• 
  Voronežan mehanine tegim, administrativine korpus vl 2008
• 
  Elektronižen tehnikan tedoinstitut vl 2011
• 
  Brno-adivpert' vl 2008
• 
  Voronežan valdkundaline universitet, päkorpus (2012)
• 
  Voronežan valdkundaline agrarine universitet, päkorpus (2012)
• 
  Voronežan valdkundaline tätüižteatr (2013)
• 
  Pohjoine sild (ven.: Северный) üläjononke tramvain täht vl 2012
• 
  Voronež I-päraudtestancii vl 2007
• 
  Voronež-lendimportan terminal vl 2016

Irdkosketused

• Lidnan Duman oficialine sait (gorduma-voronezh.ru). (ven.)
• Voronež-lidnümbrikon ohjastusen oficialine sait (voronezh-city.ru). (ven.)