Uf

Uf
Уфа (ven.)
Өфө (bašk.)

Lidnanznam	Flag
Valdkund	Venäma
Eläjiden lugu (2018)	1 120 547 ristitud
Pind	707,93 km²
Pämez'	Ul'fat Mustafin (kül'mku 2 018—)
Telefonkod	+7-347-xxx-xxxx
Avtokod	02, 102
Aigvö	UTC+5 (MSK+2)

Uf (ven.: Уфа [ʊˈfa], bašk.: Өфө [ʏ̞ˈfʏ̞], tot.: Уфа) om millionerlidn Venämas. Se om Baškortostanan Tazovaldkundan pälidn da kaikiš suremb lidn, sädab Ufan lidnümbrikod, mugažo om Ufan rajonan administrativižeks keskuseks.

Ufanlidn om Venäman järed transporttesol'm, kivivoin ümbriradmižen i himižen tegimišton keskuz, openduzkeskuz.

Istotii

Nügüdläižen eländpunktan aluz om pandud vl 1574 kuti lidnuz (puine kreml'). Se sai lidnan statusad vl 1586.

Vspäi 1802 Uf oli Orenburgan gubernijan pälidnaks, sid' vozil 1865−1919 — Ufan gubernijan keskuseks.

Geografijan andmused

Ufan administrativižed rajonad:
1. Döman rajon
2. Kalininan rajon
3. Kirovan rajon
4. Leninan rajon
5. Oktäbr'skii rajon
6. Ordžonikidzen rajon
7. Nevondkundaline rajon

Lidn sijadase tazovaldkundan keskuses, ühtennimižen jogen muugotil randoil sen lanktendan sijas Vaugedjogehe (Volgan bassein), 150 metrad keskmäižel korktusel valdmeren pindan päl. Reljef om tazo jogialangištoidenke. Lidnan keskuz sijadase muga nimitadud «Ufan pol'sarel» Vauged- da Uf- jogiden keskes. Uf seižub mecstepin zonan pohjoižes. Kaik 20 karad om lidnan manaluižes. Matkad Moskvhasai om 1567 km raudtel päivlaskmha. Lähembaine toine järed lidn om Sterlitamak 100 kilometras suvhe.

Uf jagase seičemehe administrativižhe rajonha, sen ližaks 24 eländpunktad mülüdas lidnümbrikho.

Eläjad

Vl 1913 lidnan ristitišt oli 100 700 eläjad. Vn 2010 kaiken Venäman rahvahanlugemižen mödhe lidnan eläjiden lugu oli 1 062 319 ristitud, lidnümbrikon — 1 071 640 ristitud. Vl 2017 kaik 1 126 098 eläjad om lidnümbrikos, tazovaldkundan ristitišton kaks' seičemendest. Hristanuskondan 24, islaman 18 pühäpertid da judaizman 1 pühäpert' oma olmas lidnas.

Rahvahad (enamba 1% vl 2010, ozutadud rahvahudenke): venälaižed — 48,9%, totarlaižed — 28,3%, baškiralaižed — 17,1%, ukrainalaižed — 1,2%, toižed rahvahad — 4,5%.

Transport

Rahvahidenkeskeine civiline Uf-lendimport (UFA / УФА) sijadase 22 kilometras suvhe lidnan keskusespäi. Sišpäi tehtas reisid Evropan i Azijan maihe, Venämadme tobjimalaz, mugažo čarterreisid lebutahoihe.

Avtobusad, trolleibusad, tramvaid da taksid oma kundaližeks transportaks lidnas. Raudtesild da koume avtotesildad ühtenzoittas Vaugedjogen randoid. Jogitransport om šingotadud, kezaaigan om ehtatimid jogiš päliči.

19. voz'sadan lopus «Samar — Čeläbinsk»-raudte tuli lidnha. Ühesa raudtestancijad om Ufas.

Tetabad sündnuded

• Andrei Gubin (sünd. 1974) — Venäman estradan pajatai, muzikankirjutai, muzikprodüser.

Irdkosketused

• Lidnümbrikon Nevondkundan oficialine sait (gorsovet-ufa.ru). (ven.)
• Lidnümbrikon ohjastusen oficialine sait (ufacity.info) (ven.) (bašk.), mugažo saitan enzne versii anglijan kelel.