Bränsk

Bränsk
Брянск

Lidnanznam	Flag
Valdkund	Venäma
Eläjiden lugu (2020)	402,675 ristitud
Pämez'	Marina Dbar (sügüz'ku 2019—, Марина Дбар)
Telefonkod	+7−4832-xxx-xxx
Avtokod	32
Aigvö	UTC+3 (MSK+0)

Bränskan administrativižed rajonad:
     Bežican rajon      Fokinan rajon      Nevondkundaline rajon      Volodarskijan rajon

Bränsk (ven.: Брянск) om lidn da lidnümbrik Venäman päivlaskmas. Se om Bränskan agjan administrativine keskuz da kaikiš suremb lidn.

Istorii

Eländpunkt mainitase ezmäižen kerdan Ph. Ipatijan jumalankodin aigkirjas vl 1146 kuti Debränsk-lidn. Kaivandusiden andmusiden mödhe, eländpunktan aluz om pandud 10. voz'sadan lopus, lugetas vl 985.

Bränsk šingotase transportižel mašiništonsauvomižel (soda- i jüguavtoiden šassid, traktorad, avtovedimed, lämuzvedimed, vagonad, asfal'tanpanijad, libutimed), Bežickan terasenvalamižtegimel, sauvondmaterialiden pästandal (beton, lämuzizoläcii), sömtegimištol (vin, konditerižed tegesed, jauh, olud, maid- da lihaproduktad), himižel tegimel, bumagfabrikal i omblendedheotandoil.

Geografijan andmused

Lidn sijadase agjan pohjoižpäivnouzmas, Desn-jogen molembil randoil (ven.: Десна, Dnepran hurapol'ne bassein), 190 m keskmäižel korktusel valdmeren pindan päl. Bränskan rajon ümbärdab lidnad. Matkad Moskvan keskushesai om 349 km pohjoižpäivnouzmha orhal, 382 km avtotedme vai raudtel. Lähembaine sur' lidn om Orel 117 km päivlaskmha orhal, 129 km avtotel vai raudtedme.

Klimat om ven kontinentaline. Voden keskmäine lämuz om +6,2 C°, paksud sulasäd oleldas tal'vel. Paneb sadegid 683 mm vodes, enamba kezakus-sügüz'kus (63..87 mm kus).

Koume žilod mülüdas lidnümbrikho Bränskan ližaks: Vauktad Randad, Sur' Polpino, Radica-Krilovk. Lidnümbrikon pind — 186,73 km². Bränsk-lidn jagase nelläks (vspäi 1956) administrativižeks rajonaks, ned ei olgoi municipaližikš ühtnikoikš. Žilod alištudas lidnan rajoniden tobmudele.

Eläjad

Vn 2010 Venäman rahvahanlugemižen mödhe lidnan eläjiden lugu oli 415 721 ristitud, lidnümbrikon — 435 245 ristitud. Kaikiš suremb lidnan ristitišt oli läz 460 tuhad eläjid vozil 1991−1999 (462 tuh. rist. vl 1997). Vl 2018 kaik 405 723 ristitud elihe lidnas i 423 981 ristitud kaikes lidnümbrikos.

Edeline lidnan pämez' om Aleksandr Hlimankov (reduku 2014 — sügüz'ku 2019).

Transport

Avtobusad, trolleibusad, ezilidnelektrojonused, maršruttaksid da taksid oma kundaližeks transportaks lidnas i ezilidnas. Bränsk om järed raudtesol'm. Avtote ümbärdab lidnad päivlaskmaspäi.

Rahvahidenkeskeine civiline Bränsk-lendimport (BZK / БРЯ / UUBP, 20,4 tuh. passažiroid vl 2017) sijadase 14 km suvipäivlaskmha lidnan keskusespäi, seičemes kilometras röunaspäi Oktäbr'skoje-žilonno. Tehtas reisid Piterihesai.

Galerei

• 

  Lidnan Nevondkundaližen rajonan Administracijan sauvuz (2012)

• 

  Sündun Eläbzdusen jumalanpert', vn 2013 nägu

• 

  Lämuzvedim Bränskan mašinansauvomižel tegimel vl 2019

• 

  Bränskan mašinansauvomižen tegimen kul'turkeskuz (2015)

• 

  Bränsk I-päraudtestancii vl 2010

• 

  Bränsk-lendimportan terminal vl 2019

Tetabad ristitud

Sündnuded

• Sergei Černäkov (sünd. 1959) — Nevondkundaližen Ühtištusen i Venäman rok-muzikant, barabananvändai.
• Boris Kamorzin (sünd. 1966) — Venäman kinon da teatran akt'or.
• Maksim Trošin (1978−1995) — oli venälaine priha, Venäman bard-pajatai.

Elänuded

• Leonid Dobičin (1894−1936) — oli venälaine mez', Nevondkundaližen Ühtištusen kirjutai.

Irdkosketused

• Lidnan Rahvahanezitajiden Nevondkundan oficialine sait (bryansk032.ru). (ven.)
• Lidnan administracijan oficialine sait (bga32.ru). (ven.)