Počep

Počep
Почеп
	Lidnanznam;
Valdkund	Venäma
Eläjiden lugu (2021)	14,991 ristitud
Pind	19,93 km²
Pämez'	Aleksandr Kozlov; (kül'mku 2012—)
Telefonkod	+7−48 345-xx-xxx
Avtokod	32
Aigvö	UTC+3 (MSK+0)

Počep (ven.: По́чеп) om Venäman lidn da lidnankund Bränskan agjan keskuzpalas. Se om Počepan rajonan administrativine keskuz.

Istorii

Eländpunkt mainitase ezmäižen kerdan vl 1447^[1]. Oli lidnuseks 16.-17. voz'sadal, sen mapudotesed oma kaičenus lidnanno tähäsai. Vl 1897 evrejalaižed otiba koumandest Počepan ristitištos, vl 1910 nell' judaizman pühäpertid radoiba i privatine evrejan škol mehiden täht, no nevondkundaližen aigan evrejan ristitišton lugu poleneškanzi. Žilo sai lidnan statusad vl 1925. Vozil 1941 (22. eloku) — 1943 (21. sügüz'ku) se oli okkupiruidud nacistižen Germanijan sodavägil, tehtihe sijaližiden evrejalaižiden rikondad — 1800 ristitud, heiden velleskaum om znamoitud muštnikal. Ei ole himižen azegišton varoid lidnan ümbrištos (ende Venäman kudendez oli), likvidiruihe niid täuzin.

Počepan ižandusen päsarakod oma sömtegimišt (pästtas leibäd, maidod, void, kanaproduktoid) i mecan ümbriradmine, mugažo omblendfabrik^[2] om saudud.

Geografijan andmused

Lidn sijadase rajonan keskuzpalas, Sudost'-jogen randoil (ven.: Су́дость 208 km pitte, Desnan oiged ližajogi), 150 m ü.m.t. keskmäižel korktusel.

Matkad Bränskhasai om kahesakümne nell' kilometrad pohjoižpäivnouzmha avtotedme vai raudtedme. Lähembaižed lidnad (avtotedme) oma Trubčevsk 51 km suvipäivnouzmha, Uneč 64 km päivlaskmha i Mglin 48 km lodeheze.

Tobmuz

Počep om lidnankundan üks'jäižeks eländpunktaks.

Lidnankundan tobmuden pämez' om sen Rahvahandeputatoiden nevondkundan ezimez'. Lidnan erigoittud Administracii om likvidiruidud vn 2015 vilukus, Pavel Gricuk oli sen likvidacižen laudkundan ohjandajan vn 2014 elokuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 17 161 ristitud, rajonan nell' ühesandest, vn 2021 — 14 991 ristitud. Kaik 16 663 eläjad oli lidnas vl 2017. Kaikiš suremb lidnan ristitišt oli 18 200 eläjad vozil 1998−2001.

Ortodoksižen hristanuskondan seičeme pühäpertid^[3] oma saudud lidnas: Sündun Eläbzdusen päjumalanpert' (letihe vll 1765−1771), nell' jumalanpertid i kaks' časounäd. Niiden ližaks koume jumalanpertid ei ole kaičenus.

Kaik om koume keskškolad i gimnazii, čomamahtoiden škol i sportškol lapsiden täht. Počepan mehaniž-agrarine tehnikum^[4] om lidnan professionaližen opendusen aluzkundaks.

Transport

«Bränsk — Gomel'»-mante läbitab lidnan suvipalad.

Počep-raudtestancii radab lidnas vspäi 1887 «Bränsk — Gomel'»-jonol.

Galerei

Počtan sauvuz (2017)
Sündun Eläbzdusen päjumalanpert', vn 2012 nägu
Illä-endustajan jumalanpert', vn 2013 nägu
Lapsiden kirjišt (2013, ende Kirila Razumovskijan pert'kulu)
Počep-raudtestancii vl 2005

Homaičendad

↑ «Пану Захари Почапъ, а Сетолоска, а Бобынина земля, а Шумърома; у вотъчину. Инъдик[тъ] 10. Панъ Монивидъ». // Литовская метрика (Litvanman aigkirj). T. I. — Piter, 1910. — Lp. 48. (ven.)
↑ Počepan omblendfabrikan nadezhda-stil.inni.info-lehtpol'. (ven.)
↑ Počepan pühäpertid sobory.ru-saital. (ven.)
↑ Počepan mehaniž-agrarižen tehnikuman sait (pocheptechn.ucoz.ru). (ven.)

Irdkosketused

Počep Vikiaitas

	Bränskan agjan lidnad
	Bränsk \| Dät'kovo \| Fokino \| Karačev \| Klincad \| Mglin \| Novozibkov \| Počep \| Sel'co \| Sevsk \| Starodub \| Suraž \| Zlink \| Žukovk \| Trubčevsk \| Uneč

[1] «Пану Захари Почапъ, а Сетолоска, а Бобынина земля, а Шумърома; у вотъчину. Инъдик[тъ] 10. Панъ Монивидъ». // Литовская метрика (Litvanman aigkirj). T. I. — Piter, 1910. — Lp. 48. (ven.)

[2] Počepan omblendfabrikan nadezhda-stil.inni.info-lehtpol'. (ven.)

[3] Počepan pühäpertid sobory.ru-saital. (ven.)

[4] Počepan mehaniž-agrarižen tehnikuman sait (pocheptechn.ucoz.ru). (ven.)

[1]

[2]

[3]

[4]