Uneč

Uneč
Унеча

Lidnanznam
Valdkund	Venäma
Eläjiden lugu (2021)	24,274 ristitud
Pind	15 km²
Pämez'	Oksana Drozdova (reduku 2019—)
Telefonkod	+7−48 351-xx-xxx
Avtokod	32
Aigvö	UTC+3 (MSK+0)

Uneč (ven.: Уне́ча) om Venäman lidn da lidnankund Bränskan agjan päivlaskmas. Se om Unečan rajonan administrativine keskuz, mülüb rajonha.

Istorii

Eländpunktan aluz om pandud vl 1887 kuti Uneč-raudtestancii «Bränsk — Gomel'»-jonol. Vl 1929 «Har'kov — Orš»-raudtejono läbiti stancijad, i Uneč kändihe järedaks raudtesol'meks. Se sai lidnan statusad vl 1940.

Radiotegim (elektroladimed i komponentad — rezistorad), vedimdepo i vagondepo ratas Unečas, sömtegimišton edheotandad oma saudud, jügedsuladajiden metalloiden tegim (terased, instrument i katalizatorad vol'framanke da molibdenanke) i mehanine tegim (torvveimiden metalližed alused) oma saudud.

Geografijan andmused

Unečan rajonan sijaduz agjas vn 2010 kartal

Lidn sijadase rajonan päivlaskmaižes palas, ühtennimižen jogen hural randal tobjimalaz (ven.: Унеча 92 km pitte, Iputin hura ližajogi, Dnepran bassein), 180 m ü.m.t. keskmäižel korktusel.

Matkad Bränskhasai om 140 km pohjoižpäivnouzmha «Bränsk — Gomel'»-trassadme (A-240) vai raudtedme. Lähembaižed lidnad oma Klincad 35 km päivlaskmha raudtedme, Suraž koumekümne kilometrad lodeheze avtotedme i Mglin 30 km pohjoižpäivnouzmha avtol.

Tobmuz

Kaik kaks' žilod da nell' küläd mülüdas lidnankundha Unečan ližaks 118,8 km² pindal.

Lidnankundan tobmuden pämez' om Rahvahandeputatoiden nevondkundan ezimez'. Edeližed lidnan pämehed oma Aleksandr Zaicev (edel vn 2019 redukud) i Andrei Golovinskii (vspäi 2010).

Eläjad

Vn 2010 Venäman rahvahanlugemižen mödhe lidnan eläjiden lugu oli 26 197 ristitud, rajonan koume nelländest, vn 2021 — 24 274 ristitud. Vl 2017 kaik 23 971 ristitud elihe lidnas i 24 524 ristitud kaikes lidnankundas. Kaikiš suremb lidnan ristitišt oli 31 tuhad eläjid vll 1996−1998.

Ortodoksižen hristanuskondan koume pühäpertid oma saudud i avaitud lidnas: Pühän Jumalanmaman Blagoveššenjan jumalanpert' (1991−1998), Mikulai-čudonsädajan jumalanpert' (2003−2014), vn 1998 časoun'.

Lapsiden opendusen aluzkundad oma päivkodid, keskškolad. Unečan saraktehnologijoiden da transportan tehnikum om lidnan professionaližen opendusen aluzkundaks.

Irdkosketused

• Unečan lidnankund rajonan tobmuden aluzkundoiden oficialižel unradm.ru-saital. (ven.)
• Lidnan enciklopedijan sait (unecha.net). (ven.)