Novozibkov

Novozibkov
Новозыбков

Lidnanznam	Flag
Valdkund	Venäma
Eläjiden lugu (2021)	38,680 ristitud
Pind	31,5 km²
Pämez'	Aleksandr Ščipakin (kül'mku 2019—)
Telefonkod	+7−48 343-xx-xxx
Avtokod	32
Aigvö	UTC+3 (MSK+0)

Novozibkov (ven.: Новозы́бков) om Venäman lidn da lidnümbrik Bränskan agjan suvipäivlaskmas. Se om agjan koumanz' surtte lidn, mugažo om Novozibkovan rajonan administrativižeks keskuseks (ei mülü sihe).

Istorii

Eländpunktan aluz om pandud vl 1701 kuti sirdanuziden Venäman keskuzregionoišpäi vanhuskolaižiden Zibkai-slabad (ven.: слобода Зыбкая). Se sai lidnan statusad vl 1809 nügüdläiženke nimenke.

Novozibkov om openduzkeskuseks, šingotase elektrotermižen mašiništon pästandal (suladuzpäčid, ühthekeitandapparatad), nahkan i tekstilin edheotandoil, sömtegimištol, mugažo betonližadusiden tegim radab. Ende tehtihe jüguzvagonoid i virid mugažo.

Geografijan andmused

Lidnan sijaduz ümbärdajas rajonas i agjas vn 2007 kartal

Lidn sijadase ümbärdajan rajonan keskuzpalan suvipäivnouzmas, 160 m ü.m.t. keskmäižel korktusel.

Matkad Bränskhasai om 207 km pohjoižpäivnouzmha, Vaugedvenämahasai — 25 km päivlaskmha orhal. Lähembaižed lidnad oma Klincad 35 km pohjoižpäivnouzmha orhal i Zlink 25 km suvipäivlaskmha orhal. Ühtennimine Novozibkov-raudtestancii radab «Bränsk — Gomel'»-jonol vspäi 1887.

Tobmuz

Novozibkov om lidnümbrikon üks'jäižeks eländpunktaks.

Lidnan Rahvahandeputatoiden nevondkundan ezimez' om lidnümbrikon pämez'. Edeline lidnan pämez' om Aleksandr Matvejenko (viluku 2014 — kül'mku 2019). Lidnümbrikon Administracijan pämez' om Aleksandr Grek vn 2022 kül'mkuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 40 553 ristitud, vn 2021 — 38 680 ristitud. Kaik 40 476 eläjad oli lidnas vl 2017. Kaikiš suremb lidnan ristitišt oli 47 tuhad eläjid vozil 1985−1988.

Rahvahad (enamba 0,4 % vl 2021): venälaižed — 80,9 %, ukrainalaižed — 0,6 %, vaugedvenälaižed — 0,4 %, toižed rahvahad — 2,3 %, rahvahuden ozutandata — 15,8 %.

Ortodoksižen hristanuskondan ühesa pühäpertid oma avaitud lidnas: Mikoi-arhangelan čudon päjumalanpert' (saudihe vll 1867−1898), Spasan Toižetamižen päjumalanpert' (vanhuskolaižiden, om letud vll 1911−1914), nell' jumalanpertid i koume časounäd. Niiden ližaks koumen jumalanpertid sauvused kävutasoiš toižin i koume jumalanpertid ei ole kaičenus.

Vozil 1963−2002 Venäman amuižortodoksižen jumalankodikundan keskuz sijazihe lidnas, sid' keskusen sirtihe Moskvha da kätihe patriarhataks.

Openduz

Lapsiden opendusen aluzkundad oma koumetoštkümne nomeruidud päivkodid (nomer 1, 2, 6..10, 13, 16, 17, 19..21), kaks' aluzškolad (nomer 7, 8), viž keskškolad (nomer 1, 3, 4, 6, 9), gimnazii (edel 1994. vot keskškol nomer 2), specialine (korrekcine) keskškol-internat (kurdhoiden i lamanoiden täht), specialine (korrekcine) škol-internat 8. toižendan, lapsiden sädamižen pert', čomamahtoine škol, muzikškol I.D. Kobzonan nimed, lidnan sportškol.

Lidnan professionaližen opendusen aluzkundad oma Novozibkovan professionaliž-pedagogine kolledž, medicinine kolledž, maižanduztehnikum (Bränskan valdkundaližen agrarižen universitetan filial), Bränskan energomašinansauvomižen da radioelektronikan tehnikuman filial, Bränskan valdkundaližen universitetan filial.

Galerei

• 
  Mikoi-arhangelan čudon päjumalanpert', vn 2021 nägu
• 
  Spasan Toižetamižen jumalanpert' (vanhuskolaižiden), vn 2013 nägu
• 
  Kul'turkeskuz (2015)
• 
  M.I. Kalininan muštnik tömašinoiden tegimen kul'turkeskusenno (2015)
• 
  Novozibkov-raudtestancii vl 2017 vai sen aigemba

Irdkosketused

• Lidnümbrikon Rahvahandeputatoiden nevondkundan sait (sovet-nvz.ru). (ven.)
• Lidnan Administracijan oficialine sait (zibkoe.ru). (ven.)
• Lidnan informacine novozybkov.ru-portal. (ven.)