Sevsk

Sevsk
Севск

Lidnanznam	Flag
Valdkund	Venäma
Eläjiden lugu (2021)	6,732 ristitud
Pind	14 km²
Pämez'	Jelena Dobrodei (reduku 2014—)
Telefonkod	+7−48 356-xx-xxx
Avtokod	32
Aigvö	UTC+3 (MSK+0)

Sevsk (ven.: Севск) om Venäman lidn da lidnankund Bränskan agjan suvipäivnouzmaižes čogas. Se om Sevskan rajonan administrativine keskuz.

Istorii

Eländpunkt mainitase ezmäižen kerdan vl 1146 nügüdläiženke nimenke da lidnan statusanke Sündun Eläbzdusen i Ph. Ipatijan jumalankodiden aigkirjoiš. 17. voz'sadal oli tetabaks Venäman röunanverižeks lidnuseks da torguindan keskuseks. Vspäi 1778 lidnan sauvond tegese nellikfartaloil pertišton uden planan mödhe. Oli alištunu Černigovan, Kijevan, Belgorodan i Orelan tobmudele ičeze istorijas.

Aigan mändes sirtihe valdkundröunad, 1880-nzil vozil saudihe raudted edahan lidnaspäi, i se kadoti endišt znamoičendad. Lidn oli okkupiruidud nacistižen Germanijan sodavägil (1. reduku 1941 — 27. eloku 1943). Mülüb Bränskan agjaha vspäi 1944.

Sevsk šingotase sömtegimišton edheotandoil: konservtegim, lihakombinat, leibänkombinat, voitegim (argvoi, sagud).

Geografijan andmused

Sevskan rajonan sijaduz agjas vn 2010 kartal

Lidn sijadase rajonan keskuzpalan pohjoižpäivnouzmas, Sev-jogen randoil (ven.: Сев, Nerussan ližajogi, Dnepran bassein), 170 m ü.m.t. keskmäižel korktusel.

Matkad Bränskhasai om 120 km pohjoižhe orhal vai 140 km «Ukrain»-avtotedme (M3). M3-trass (Moskv — Bränsk — Ukrainan röun, edemba Kijevhasai) om ani lidnan päivlaskmaižen röunan taga. Lähembaine lidn om Seredina-Bud (ukr.: Сере́дина-Бу́да, Suman agj, Ukrain) koumekümnes kilometras päivlaskmha orhal. «Trojebortnoje»-röunpäličmänendtaho ühtenzoitab lidnad Ukrainanke.

Tobmuz

Kaik kaks' žilod da kaks' küläd-slabadad mülüdas lidnankundha Sevskan ližaks.

Lidnankundan tobmuden pämez' om sen Rahvahandeputatoiden nevondkundan ezimez'.

Eläjad

Vn 2010 Venäman rahvahanlugemižen mödhe lidnan eläjiden lugu oli 7 282 ristitud, rajonan nell' ühesandest, vn 2021 — 6 732 ristitud. Kaik 6 723 eläjad oli lidnas vl 2017. Kaikiš suremb lidnan ristitišt oli 11 400 eläjad vl 1913.

Ortodoksižen hristanuskondan kaks'toštkümne pühäpertid oma kaičenus lidnas paloin vai täuzin: Ristan Zdviženjan Sevskan naižjumalankodi (vspäi 1808) ühtennimiženke jumalanpertinke, Sevskan mez'jumalankodi Eläban Eziauguižen Stroican päjumalanpertinke, Spasan Toižetamižen jumalankodi (päjumalanpert' i Kaikiden Pühämehiden jumalanpert'), kuz' jumalanpertid i kaks' časounäd. Niiden ližaks kaks' jumalanpertid i časoun' ei ole kaičenus.

Lapsiden opendusen aluzkundad oma koume nomeruidud päivkodid (nomer 1..3), kaks' keskškolad (nomer 1 i 2), rajonan lapsiden sädamižen pert', čomamahtoiden škol, Burevestnik-sportškol («Toroklind»). Trubčevskan politehnižen tehnikuman Sevskan filial om lidnan professionaližen opendusen aluzkundaks.

Galerei

• 
  Sevskan lidnusen ruinan nägu (2021)
• 
  Ristan Zdviženjan jumalanpert', vn 2012 nägu
• 
  Kuvapatsaz Sevskan jaugvägiden polkun muštoks i Emäganpäivän kellčuhunduz Redukun revolücijan torgul vl 2019
• 
  Keskškol nomer üks' (2012)

Irdkosketused

• Lidnan i Sevskan rajonan tobmuden sait (sevskadm.gosuslugi.ru). (ven.)