Zlink

Zlink
Злынка
	Lidnanznam;
Valdkund	Venäma
Eläjiden lugu (2021)	5,270 ristitud
Pämez'	Aleksandr Morozov; (reduku 2019—)
Telefonkod	+7−48 358-xx-xxx
Avtokod	32
Aigvö	UTC+3 (MSK+0)

Zlink (ven.: Злы́нка) om Venäman lidn da lidnankund Bränskan agjan suvipäivlaskmas. Se om Zlinkan rajonan administrativine keskuz, agjan kaikiš penemb lidn.

Istorii

Eländpunktan aluz om pandud pagenuzil vanhuskolaižil vl 1700. Se sai lidnan statusad vl 1925. Vozil 1959−1988 Zlinkan rajonan territorii mülüi Novozibkovan rajonha. Vspäi 1986 radiacine redustuz painab Zlinkha Černobilin stancijan avarijan jäl'ghe.

Zlink šingotase gipskartonan tegimel, almazdiskoiden edheotandal^[1], mezivinan tegimel^[2]. Ende mänetusenmäričimiden i pompiden pästandan edheotand radoi mugažo.

Geografijan andmused

Lidn sijadase rajonan pohjoižes, ühtennimižen jogen randal (Iputin ližajogi), 151 m ü.m.t. keskmäižel korktusel, om ümbärtud mecoil.

Matkad Bränskhasai om 220 km pohjoižpäivnouzmha avtotedme, Vaugedvenäman röunhasai om 11 km päivlaskmha. Lähembaižed lidnad oma Dobruš (Gomelin agj, Vaugedvenäma) 30 km päivlaskmha i Novozibkov 25 km pohjoižpäivnouzmha. Lähembaine raudtestancii nimitase Zlink:aks, sijazihe sidä Viškov-žilho kahesas kilometras lodeheze.

Tobmuz

Pavlovk-žilo (ven.: Павловка, kaikenaigaižeta ristitištota) i Petrovk-külä (ven. Петровка, 83 rist. vl 2010) mülüdas lidnankundha Zlinkan ližaks. Lidnankundan pind om 88,55 km².

Lidnankundan pämez' om lidnan Rahvahandeputatoiden nevondkundan ezimez'. Edeline lidnan pämez' om Galina Lukašova (reduku 2014 — reduku 2019).

Eläjad

Vn 2010 Venäman rahvahanlugemižen mödhe lidnan eläjiden lugu oli 5 507 ristitud, rajonan nell' ühesandest, vn 2021 — 5 270 ristitud. Kaik 5 460 ristitud elihe lidnas i 5 535 ristitud kaikes lidnankundas vl 2017. Kaikiš suremb lidnan ristitišt oli 7 600 eläjad vl 1917 i 8 754 eläjad vl 1939.

Ortodoksižen hristanuskondan nell' jumalanpertid^[3] oma saudud lidnas 19. voz'sadan kahtendes polespäi: puine Pühän Jumalanmaman Katken i koume vanhuskolaižiden (Sündun Voznesenjan, Mikulai-čudonsädajan, Mikoi-arhangelan).

Lapsiden opendusen aluzkundad oma kaks' nimitadud päivkodid, kaks' keskškolad (nomer 1 i 2), Zlinkan kul'turan da joudan ühtelmaz (rajonan lapsiden sädamižen keskuz oli edel vn 2017 kezakud), čomamahtoiden škol, Zlinkan sportškol. Bränskan agrarine tehnikum (Starodub), sen Zlinkan filial^[4] om lidnan professionaližen opendusen aluzkundaks.

Homaičendad

Irdkosketused

Lidnan da Zlinkan rajonan tobmuden sait (admzlynka.ru). (ven.)

Zlink Vikiaitas

	Bränskan agjan lidnad
	Bränsk \| Dät'kovo \| Fokino \| Karačev \| Klincad \| Mglin \| Novozibkov \| Počep \| Sel'co \| Sevsk \| Starodub \| Suraž \| Zlink \| Žukovk \| Trubčevsk \| Uneč

[1] Almazdiskoiden edheotandan sait (zd-kristall.ru). (ven.)

[2] Zlinkan vintegimen sait (kaskads.ru). (ven.)

[3] Zlinkan pühäpertid sobory.ru-saital. (ven.)

[4] Tedod Zlinkan filialas Bränskan agrarižen tehnikuman техникумзайцева.рф-saital. (ven.)

[1]

[2]

[3]

[4]