Mglin

Mglin
Мглин

Lidnanznam	Flag
Valdkund	Venäma
Eläjiden lugu (2021)	6,919 ristitud
Pind	15 km²
Pämez'	Gennadii Podverbnii (kezaku 2021—)
Telefonkod	+7−48 339-xx-xxx
Avtokod	32
Aigvö	UTC+3 (MSK+0)

Mglin (ven.: Мглин) om Venäman lidn da lidnankund Bränskan agjan keskuzpalan lodehes. Se om Mglinan rajonan administrativine keskuz.

Istorii

Eländpunktan aluz om pandud vl 1154 kuti Zaroi (ven.: Зарой), mainitase ph. Ipatijan Gangralaižen jumalankodin aigkirjas, mugažo Zartii (ven.: Зартый) i Zarub. Oli pandud mantazole mongoliž-totarižen londan aigan. Vspäi 1359 mainitase nügüdläiženke nimenke Litvanman aigkirjoiš. Mglin sai lidnan statusad vl 1781. Toižen mail'man sodan aigan lidn oli okkupiruidud nacistižen Germanijan sodavägil (16. eloku 1941 — 22. sügüz'ku 1943). Okkupacijan aigan 2,7 tuh. lidnalaižid oli riktud (amptihe evrejalaižid massižikš vn 1942 2. keväz'kud), 2,5 tuh. oliba kükstud Germanijha radoile. Udessündutihe Mglinad sodan jäl'ghe, saudihe severt-se uzid tegimid.

Mglin šingotase sömtegimištol sijaližel torhudel (argvoi, sagud, trahmal, leib) i mecedheotandoil (pilindmaterialad). Nevondkundaližen aigan savičuntegim i tegimištoline kombinat radoiba mugažo.

Geografijan andmused

Mglinan rajonan sijaduz agjas vn 2010 kartal

Lidn sijadase rajonan keskuzpalan suvipäivlaskmas, Sudink-jogen randal (ven.: Судынка, Voronusan ližajogi, Iputin bassein), 180 m ü.m.t. keskmäižel korktusel.

Matkad Bränskhasai om 103 km päivnouzmha orhal vai 125 km avtotedme. Lähembaižed lidnad oma Uneč 32 km suvipäivlaskmha i Suraž 36 km päivlaskmha avtoteil.

Tobmuz

Mglin om lidnankundan üks'jäižeks eländpunktaks.

Lidnankundan tobmuden pämez' om sen Rahvahandeputatoiden nevondkundan ezimez'. Edeližed nevondkundan ezimehed oma Lüdmila Perluhina (reduku 2019 — kezaku 2021), Anna Fomina (radoi vn 2019 redukuhusai). Lidnan erigoittud Administracii om likvidiruidud vn 2015 uhokus, Lüdmila Perluhina oli likvidacižen laudkundan ohjandajan vn 2014 sügüz'kuspäi.

Eläjad

Vl 1939 lidnan ristitišt oli 7 290 eläjad, vl 1959 — 6 083 eläjad. Vn 2010 Venäman rahvahanlugemižen mödhe lidnan eläjiden lugu oli 7 916 ristitud, rajonan nell' ühesandest, vn 2021 — 6 919 ristitud. Kaik 7 884 eläjad oli lidnas vl 2017. Kaikiš suremb lidnan ristitišt oli vl 1913 (9 900 rist.) i vl 1998 (9 000 rist.).

Rahvahad (enamba 0,4 % vl 2021): venälaižed — 95,9 %, toižed rahvahad — 1,9 %, rahvahuden ozutandata — 2,2 %.

Ortodoksižen hristanuskondan nell' pühäpertid oma saudud lidnas: Jumalanmaman Emäganpäivän päjumalanpert' (saudihe vll 1815−1830), kaks' jumalanpertid i časoun'.

Lapsiden opendusen aluzkundad oma kaks' päivkodid (nomer 1 i 2), kaks' keskškolad (nomer 1 i 2), Mglinan škol-internat, muzikškol, čomamahtoine škol, sportškol. Bränskan agrarižen tehnikuman (Starodub) filial om lidnan professionaližen opendusen aluzkundaks.

Galerei

• 
  Suren sodan velleskaum Nevondkundaližel torgul (2021)
• 
  Pühän Jumalanmaman Emäganpäivän päjumalanpert', vn 2013 nägu
• 
  Ph. Varvaran jumalanpert', vn 2021 nägu
• 
  Nevondkundaline lidnanznam (oli vspäi 1983)

Irdkosketused

• Lidnankundan lehtpoled Mglinan rajonan tobmuden mgladm.ru-saital. (ven.)
• Lidnan istorijan sait (mglin-krai.ru). (ven.)