Karačev

Karačev
Карачев

Lidnanznam
Valdkund	Venäma
Eläjiden lugu (2021)	17,449 ristitud
Pind	15 km²
Pämez'	Jevgenii Klüjev (sulaku 2025—)
Telefonkod	+7−48 335-xx-xxx
Avtokod	32
Aigvö	UTC+3 (MSK+0)

Karačev (ven.: Кара́чев) om Venäman lidn Bränskan agjan päivnouzmas. Se om Karačevan rajonan administrativine keskuz.

Istorii

Eländpunkt mainitase ezmäižen kerdan ph. Ipatijan jumalankodin aigkirjas vl 1146. Vozil 1246−1360 oli Karačevan ruhtinazkundan pälidnaks. Vll 1778−1920 Karačev-lidn oli Orelan gubernijan makundan keskuseks. Vspäi 1920 mülütihe Bränskan gubernijha. Toižen mail'man sodan aigan lidn oli okkupiruidud nacistižen Germanijan sodavägil (6. reduku 1941 — 15. eloku 1943), sen aigan evrejan getto sijazihe siš.

Karačev šingotase polimeriden «Metaklei»-tegimel nanosilikatoišpäi, uden voden bobaižiden tegimel, sömtegimišton edheotandoil (maidkombinat, trahmalan tehmine), mugažo elektroühtištoitajiden detaliden tegim om saudud, omblendfabrik radab.

Geografijan andmused

Karačevan rajonan sijaduz agjas vn 2010 kartal

Lidn sijadase rajonan keskuzpalan päivnouzmas, Snežet'-jogen randal (ven.: Сне́жеть 80 km pitte, Desnan hura ližajogi), 200 m ü.m.t. keskmäižel korktusel.

Matkad Bränskan röunhasai om nell'kümne nell' kilometrad päivlaskmha-lodeheze raudtedme i avtol, Orelan agjhasai — seičeme kilometrad päivnouzmha orhal.

Tobmuz

Kaik 11 žilod da 20 küläd mülüdas lidnankundha Karačevan ližaks 280,71 km² pindal.

Lidnankundan tobmuden pämez' om sen Rahvahandeputatoiden nevondkundan ezimez'. Edeližed lidnan nevondkundan ezimehed oma Marina Ivanova (reduku 2024 — sulaku 2025), Margarita Nikolajeva (reduku 2019 — reduku 2024), Jurii Bratäkov (heinku 2012 — reduku 2019). Lidnan erigoittud Administracii om likvidiruidud vn 2008 sügüz'kus, Vasilii Piterskii radoi sen Administracijan pämehen vn 2005 redukuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 19 715 ristitud, rajonan ristitišton pol', vn 2021 — 17 449 ristitud. Vl 2017 kaik 17 981 eläjad oli lidnas i 24 761 ristitud kaikes lidnankundas, rajonan seičeme kümnendest. Kaikiš suremb lidnan ristitišt oli 21 800 rist. vl 1913 i 21..22 tuhad vll 1989−2001 (22 600 rist. vl 1992).

Rahvahad (enamba 0,4 % vl 2021): venälaižed — 95,3 %, armenijalaižed — 0,9 %, toižed rahvahad — 1,9 %, rahvahuden ozutandata — 1,9 %.

Ortodoksižen hristanuskondan kuz' pühäpertid oma kaičenus i saudud lidnas: ph. Mikoi-arhangelan päjumalanpert' (letihe vll 1700−1750) i viž jumalanpertid. Niiden ližaks viž jumalanpertid i časoun' ei ole kaičenus.

Lapsiden opendusen aluzkundad oma kuz' nimitadud i nomeruidud päivkodid (nomer 1, 7, 8, 10..12), nell' keskškolad (Kirovan nimed, Gor'kijan nimed, nomer 4 i 5), lapsiden sädamižen pert', čomamahtoiden škol V.F. Kol'covan nimed, lapsiden da norišton sportškol. Orelan valdkundaližen universitetan filial om lidnan professionaližen opendusen aluzkundaks.

Galerei

• 
  Lidnan kirjišt (2015)
• 
  Ph. Mikoi-arhangelan päjumalanpert', vn 2022 nägu
• 
  Torguindkeskuz (2015)
• 
  Avtobusstancii vl 2015
• 
  Karačev-päraudtestancijan sauvused vl 2015

Irdkosketused

• Karačevan lidnankundan Rahvahandeputatoiden nevondkundan oficialine sait (gorsovet.karadmin.ru). (ven.)
• Karačevan rajonan da lidnan tobmuden sait (karadmin32.gosuslugi.ru). i sen vanh versii (karadmin.ru, om täuttud vn 2025 vilukuhusai). (ven.)