Dät'kovo

Dät'kovo
Дятьково

Lidnanznam
Valdkund	Venäma
Eläjiden lugu (2017)	27,028 ristitud
Pämez'	Sergei Lukjanenko (reduku 2014—)
Telefonkod	+7−48 333-xx-xxx
Avtokod	32
Aigvö	UTC+3 (MSK+0)

Dät'kovo (ven.: Дятьково) om Venäman lidn da lidnankund Bränskan agjan pohjoižpäivnouzmas. Se om Dät'kovon rajonan administrativine keskuz.

Istorii

Eländpunkt mainitase ezmäižen kerdan vl 1626 kuti külä, vspäi 1810 oli žiloks. Vl 1924 kätihe lidnanvuiččeks žiloks. Vspäi 1938 om lidnan statusanke. Municipaližen «Dät'kovo»-ühtnikan administracii om likvidiruidud vn 2014 redukus, rajonan administracii tegeb sen velgusidme.

Dät'kovo šingotase hrustalin da meblin tehmižel, sauvondmaterialiden (raudbetonkonstrukcijad, keradajad puižed pertid) i sömtegimišton edheotandad ratas, mugažo releiden tegim om olmas.

Geografijan andmused

Lidn sijadase penen Olešn'-jogen randoil (ven.: Олешня), se lankteb lidnan taga vides kilometras Bolv-jogehe oiktalpäi (ven.: Болва 213 km pitte, Desnan hura ližajogi), 200 m ü.m.t. keskmäižel korktusel. Matkad Kalugan agjan röunhasai om 6 km päivnouzmha orhal, Bränskhasai om 25 km suvhe teidme. Dät'kovo-raudtestancii om olmas vspäi 1927 lidnan pohjoižes.

Nell' küläd da Vereščovk-raudtestancii mülüdas lidnankundha Dät'kovon ližaks. Lidnankundan pind — 190,26 km².

Eläjad

Vn 2010 Venäman rahvahanlugemižen mödhe lidnan eläjiden lugu oli 29 439 ristitud, lidnankundan — 29 588 ristitud, rajonan nell' ühesandest. Kaikiš suremb lidnan ristitišt oli 34..35 tuhad vozil 1989−2001 (35 000 rist. vl 1992). Vl 2017 kaik 27 283 ristitud elihe lidnankundas. Hristanuskondan koume pühäpertid om lidnas: 2 — ortodoksižen hristanuskondan, 1 — baptizman.

Bränskan energomašiništonsauvomižen da radioelektronikan tehnikuman filial (edel 2016 vot — Dät'kovon industrialine tehnikum) om professionaližen opendusen aluzkundaks.

Irdkosketused

• Lidnan lehtpoled Dät'kovon rajonan tobmuden aluzkundoiden oficialižel saital (admindtk.ru). (ven.)