Nal'čik

Nal'čik
Нальчик (ven.)
НалщӀэч (kab. da čerk.)
Налчык (kar. da balk.)

Lidnanznam	Flag
Valdkund	Venäma
Eläjiden lugu (2022)	239,610 ristitud
Pind	67 km²
Pämez'	Igor' Muravjov (keväz'ku 2009—)
Telefonkod	+7−8662-xxx-xxx
Avtokod	07
Aigvö	UTC+3 (MSK+0)

Nal'čik (ven.: На́льчик, kab. da čerk.: НалщӀэч, kar. da balk.: Налчык) om lidn da lidnümbrik Venäman suvipäivlaskmas. Se om Kabardinijan da Balkarijan Tazovaldkundan pälidn da kaikiš suremb lidn, järed lebutaho.

Istorii

Eländpunktan aluz om pandud vl 1724. Nal'čik-lidnuz om saudud vozil 1818−1822, nimitihe jogen mödhe. Se sai lidnan statusad vl 1921.

Nal'čik šingotase elektrotehnižel sarakol (pol'veimed, telemehanik, elektrovakuumine tegim, elektroladimed kaičendministrusen täht), mašinansauvomižel (jüguavtoiden vaumičend geotedištelendan i kaivuzsamižen täht), «Gidrometallurg»-tegimel (vol'framan hapandusen pästand), metallanümbriradajan «Čercvetmet»-tegimel, ratud nahkan i vihmankatuzkanghiden «Iskož»-kombinatal, sömtegimištol (halvantegim pästab olut-ki), bal'neologižeks kurortaks (läz 40 aluzkundad — sanatorijad, lebukodid, turistižed bazad, pansionatad).

Geografijan andmused

Lidn sijadase tazovaldkundan keskuzpalas, Kavkazan ezimägištol, Nal'čik-jogen randoil (Terekan i Kaspijan meren bassein), 420..849 m korktusil valdmeren pindan päl, 512 metrad om korktusen keskmäine znamoičend. Matkad Moskvhasai om 1430 km pohjoižhe orhal.

Nell' žilod mülüdas lidnümbrikho Nal'čik-lidnan ližaks: Adijuh, Hasanj (ven.: Хасанья), Kenže, Vauged Jogeihut (Белая Речка). Lidnümbrikon pind om 133,31 km².

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 240 203 ristitud. Kaikiš suremb ristitišt oli 275 tuhad eläjid vozil 2002−2003. Vl 2017 kaik 239 200 ristitud elihe lidnas i 265 162 ristitud kaikes lidnümbrikos.

Rahvahad (eländpunkt vl 2010, enamba 0,4%): kabardalaižed — 49,3%, venälaižed — 28,8%, balkarijalaižed — 12,2%, osetinalaižed — 2,0%, ukrainalaižed — 0,8%, armenijalaižed — 0,7%, čerkesalaižed — 0,7%, čečenalaižed — 0,5%, gruzijalaižed — 0,4%, toižed rahvahad — 4,1%, rahvahuden ozutandata — 0,5%.

Islaman Keskuzline mečet', kahesa organizacijad i Pohjoižkavkazan islamine universitet Abu Hanifa-imaman nimed ratas lidnas. Ortodoksižen hristanuskondan Marija Magdalinan kafedraline päjumalanpert' (letihe vll 2004−2010) i Simeon Stolpnikan jumalanpert' oma avaitud. Judaizman pühäpert' om saudud mägievrejalaižiden täht.

Lidnan üläopendusen aluzkundad oma Kabardinijan da Balkarijan valdkundaline universitet H. M. Berbekovan nimed, Kabardinijan da Balkarijan valdkundaline agrarine universitet V. M. Kokovan nimed, Pohjoižkavkazan valdkundaline čomamahtoiden institut, Kabardinijan da Balkarijan biznesan institut, kahten akademijan i koumen universitetan filialad (Rostov Donal, Belgorod, Taganrog, Krasnodar). Venäman Tedoakademijan Mägiterritorijoiden ekologijan institut radab mugažo.

Lidnümbrikon pämez' om Sijaližen ičeohjandusen nevondkundan ezimez'. Lidnümbrikon Administracijan pämez' om Taimuraz Ahohov vn 2018 sulakuspäi.

Galerei

• 

  Lidnan Administracijan sauvuz (2012)

• 

  Nal'čikan Keskuzline mečet', vn 2017 nägu

• 

  Marija Magdalinan kafedraline päjumalanpert', vn 2016 nägu

• 

  Kožundan torg i Atažukinan sad (Evropan üks' kaikiš järedambišpäi) vl 2016

• 

  Kabardinijan da Balkarijan valdkundaline universitet, päkorpus (2016)

• 

  Kabardinijan da Balkarijan valdkundaline muzikteatr i ühtištusen Venämanke 400-nden voz'päivän muštnik (2012)

• 

  Kabardinijan da Balkarijan valdkundaline koncertzal (2014)

• 

  Nal'čik-lendimport vl 2013

• 

  Nal'čik-päraudtestancijan sauvuz vl 2010

Tetabad ristitud

• Sati Kazanova (Satanei Kazanova) (sünd. 1982) – kabardalaine naine, Venäman pajatai da TV-vedai.
• Jekaterina Lel' (Katä Lel') (sünd. 1974) – Venäman estradan pajatai naine da muzikankirjutai.

Irdkosketused

• Lidnümbrikon tobmuden aluzkundoiden oficialine sait (nalchik.kbr.ru). (ven.)