Baksan (lidn)

Baksan
Баксан (ven.)
Бэхъсэн (kab. da čerk.)
Бахсан (kar. da balk.)
	Lidnanznam;
Valdkund	Venäma
Eläjiden lugu (2022)	38,810 ristitud
Pind	27,79 km²
Pämez'	Hačim Mamhegov; (kül'mku 2014—)
Telefonkod	+7−86 634-xx-xxx
Avtokod	07
Aigvö	UTC+3 (MSK+0)

Baksan (ven.: Бакса́н, kab. da čerk.: Бэхъсэн, kar. da balk.: Бахсан) om Venäman lidn da lidnümbrik Kabardinijan da Balkarijan Tazovaldkundan pohjoižes. Se om Baksanan rajonan administrativižeks keskuseks mugažo, ei mülü rajonha.

Istorii[vajehta | vajehtada tekst]

Vl 1960 ühtištuihe Vahn Lidnuz-žilod Baksan-futoranke Baksan-žilho. Kätihe sidä lidnanvuiččeks žiloks vl 1964. Baksan sai lidnan statusad vl 1967.

Baksan šingotase avtopaloiden tegimel^[1] (heitmižgazoiden sistemad i kurdištimed avtoiden täht), sauvondmaterialiden pästandal (savič, metalližed uksed), sömtegimištol (konservad, šampanj, maidproduktad), sauvondan edheotandoil, tekstil'fabrik radab vspäi 2016.

Geografijan andmused[vajehta | vajehtada tekst]

Lidn sijadase ühtennimižen Baksan-jogen randal (169 km pitte, Terekan bassein), 455 m keskmäižel korktusel valdmeren pindan päl, lidnümbrik — 515 m. Matkad Nal'čikhasai om 21 km suvhe. Lähembaine lidn om Čegem 15 km suvhe.

Digulibgei-žilo (20 553 rist. vl 2018) mülüb lidnümbrikho Baksanan ližaks. Lidnümbrikon pind — 180,12 km².

Eläjad[vajehta | vajehtada tekst]

Vn 2010 kaiken Venäman rahvahanlugemižen mödhe lidnan eläjiden lugu oli 36 860 ristitud, lidnankundan — 57 088 ristitud. Vll 2003−2008 Digulibgei-žilo mülüi lidnha, i sen kaikiš suremb ristitišt oli 57 800 eläjad vl 2008. Vspäi 2009 ristitišt vajehtub 37..38 tuhad röunoiš (38 192 rist. vl 2018).

Rahvahad (lidn, enamba 1% vl 2010): kabardalaižed (čerkesalaižed) — 90,1%, venälaižed — 7,5%, toižed rahvahad — 2,3%.

Islaman nell' pühäpertid oma olmas lidnas: Džetežjei, Ehušikuei, Žambek, Kušmezikuei (Джэтэжьей, Ехъущыкъуей, Жамбек, Кушмэзыкъуей). Ortodoksižen hristanuskondan Jumalanmaman Katken jumalanpert'^[2] om avaitud enččes privatižes pertiš.

Kabardinijan da Balkarijan maižanduzkolledž^[3] om lidnan professionaližen opendusen aluzkundaks.