Prohladnii

Prohladnii
Прохладный (ven.)
КъалэкӀыхь / Прохладнэ (kab. da čerk.)
Прохладни (kar. da balk.)
Lidnanznam;	Flag;
Valdkund	Venäma
Eläjiden lugu (2025)	60,009 ristitud
Pind	35,08 km²
Pämez'	Väčeslav Arhangel'skii; (tal'vku 2021—)
Telefonkod	+7−86 631-xx-xxx
Avtokod	07
Aigvö	UTC+3 (MSK+0)

Prohladnii (ven.: Прохла́дный, kab. da čerk.: КъалэкӀыхь / Прохладнэ, kar. da balk.: Прохладни) om Venäman lidn da lidnümbrik Kabardinijan da Balkarijan Tazovaldkundas. Se om tazovaldkundan kahtenz' surtte lidn eläjiden lugun mödhe. Lidn om Prohladnijan rajonan administrativižeks keskuseks mugažo, ei mülü sihe vspäi 1964.

Istorii

Eländpunktan aluz om pandud vl 1765 kuti Prohladnai-stanic (ven.: станица Прохладная). «Rostov — Vladikavkaz»-raudtejono läbiti stanicad 1860-nzil vozil, i se šingotaškanzihe järedan maižanduzrajonan produkcijan oigenduzpunktaks. Stanic sai lidnan statusad vl 1937 nügüdläiženke nimenke, raudtestancijan nimituz jäi vajehtuseta. Suren sodan aigan lidn oli okkupiruidud Germanijan sodavägil (26. eloku 1942 — 5. viluku 1943).

Prohladnii šingotase elektrotehnižel sarakol («Kavkazkabel'»-tegim^[1] i «Kavkazkabel' TM»-tegim^[2], pol'veimiden tegim), kohenduzmehanižel tegimel, sauvondmaterialiden pästandal (savič i katusenkived, radubetontegesed), sömtegimišt (alkogoližiden jomiden edheotand, leibtegim, söndtavaroiden kombinat), mugažo meblinfabrik i omblendfabrik ratas lidnas. Avtoteiden i raudteiden znamasine transportsol'm.

Geografijan andmused

Lidn sijadase Prohladnijan i Maiskijan rajonan keskes, tazangištol, mecan da stepin zonas, Malk-jogen hural randal (kab. da čerk.: Балъкъ, Terekan hurapol'ne bassein), 215 m keskmäižel korktusel valdmeren pindan päl. Sur' Prohladnijan irrigacine kanal jokseb pohjoižhe lidnaspäi.

Matkad Nal'čikhasai om nell'kümne viž kilometrad suvipäivlaskmha orhal vai 60 km avtotedme. Lähembaine lidn om Maiskii 18 km suvhe orhal, raudtel vai avtol.

Tobmuz

Prohladnii om lidnümbrikon üks'jäižeks eländpunktaks.

Lidnümbrikon tobmuden pämez' om sen Administracijan pämez'. Edeline lidnümbrikon pämez' om Igor' Taraev (semendku 2016 — tal'vku 2021). Lidnan Sijaližen ičeohjandusen nevondkundan ezimez' om Andrei Birük vn 2019 vilukuspäi.

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 59 601 ristitud, vn 2021 — 59 938 ristitud. Kaik 57 879 eläjad oli lidnas vl 2017. Kaikiš suremb lidnan ristitišt oli 61 800 eläjad vl 2003.

Rahvahad (enamba 1 % vl 2010): venälaižed — 76,7 %, kabardalaižed (čerkesalaižed) — 4,6 %, armenijalaižed — 3,6 %, turkad (turkad-meshetijalaižed) — 3,5 %, korejalaižed — 3,1 %, ukrainalaižed — 1,5 %, čiganalaižed — 1,3 %, saksalaižed — 1,0 %, toižed rahvahad — 4,5 %, rahvahuden ozutandata — 0,2 %.

Ortodoksižen hristanuskondan nell' pühäpertid^[3] oma letud lidnas: ph. Mikulai-čudonsädajan päjumalanpert' (1882−1886) valatusiden jumalanpertinke senno, Jumalanmaman Katken jumalanpert', «Kaikiden gorähižiden ihastuz»-jumalaižen jumalanpert' kaumžomal. Protestantizman nell' loičendpertid oma saudud: seičemenden päivän adventistoiden, baptizman, evangeližen uskon hristanuskojiden, lüteranine. Katoline tulend om registiruidud 1970-nzil vozil (koumanz' nevondkundaline Moskvan i Leningradan jäl'ghe). Islaman sunnitine mečet' om avaitud vl 1998 udenno kaumžomanno.

Openduz

Lapsiden opendusen aluzkundad oma kaks'kümne päivkodid, kahesa keskškolad (nomer 1, 4, 5, 7, 8, 11, 42, 102), kaks' gimnazijad (nomer 2 i 6), licei nomer 3, kaks' valdkundališt školad-internatad (nomer 4 8. toižendan i nomer 6), lapsiden sädamižen keskuz, lapsiden ližaopendusen keskuz, čomamahtoiden škol, čomamahtoine škol, olimpižen varan sportškol futbolas, noriden tehnikanradajiden stancii, noriden londusentedajiden stancii.

Prohladnijan äiprofil'ne kolledž^[4] i Kabardinijan da Balkarijan valdkundaližen maižanduzakademijan filial oma lidnan professionaližen opendusen aluzkundoikš.

Galerei

Lidnan tobmuden sauvuz i adivpert' Leninan torgul (2015)
Ph. Mikulai-čudonsädajan päjumalanpert' (ortodoksine hristanuskond), vn 2010 nägu
Teznam tulendanno «Kavkazkabel'»-tegimennoks vl 2015
«Majak»-torguimižbobuštuzkeskuz (2015)
Prohladnai-päraudtestancijan sauvuz vl 2012
Edeline lidnanznam, oli väges vhesai 2010