Maiskii (Kabardinii da Balkarii)

Maiskii
Майский (ven.)
Майскэ (kab. da čerk.)
Майски (kar. da balk.)
Lidnanznam;	Flag;
Valdkund	Venäma
Eläjiden lugu (2025)	26,210 ristitud
Pämez'	Tat'jana Guseva; (reduku 2021—)
Telefonkod	+7−86 633-xx-xxx
Avtokod	07
Aigvö	UTC+3 (MSK+0)

Maiskii (ven.: Ма́йский, kab. da čerk.: Майскэ, kar. da balk.: Майски, turk.: Mayskıy) om Venäman lidn da lidnankund Kabardinijan da Balkarijan Tazovaldkundan päivnouzmas. Se om Maiskijan rajonan administrativižeks keskuseks da palaks.

Istorii

Eländpunktan aluz om pandud vl 1824 kuti varmitez, vspäi 1829 — Prišibskai-stanic (ven.: станица Пришибская). Vl 1925 ühtištadihe sidä lähiženke Kotlärevskii-raudtežilonke da udesnimitihe nügüdläižikš. Vl 1965 žilo sai lidnan statusad.

Maiskii-lidn šingotase röntgenladimiden «Sevkavrentgen-D»-tegimel^[1], raudbetontegimel, likörvodkantegimel i oludtegimel. Ende elektronižen mašinansauvomižen tegim i kalankazvatusen tegim radoiba mugažo.

Geografijan andmused

Lidn sijadase rajonan keskuzpalas, Čerek- da Terek-jogiden keskes, kus ned jokstas kaikiš lähemba toine toiženke edel ühthejoksmust, 217 m ü.m.t. keskmäižel korktusel.

Matkad Nal'čikhasai om nell'kümne viž kilometrad suvipäivlaskmha. Lähembaižed lidnad oma Prohladnii 15 km pohjoižhe, Terek kaks'kümne viž kilometrad suvhe i Nartkal 25 km suvipäivlaskmha. Kotlärevskai-raudtestancii radab «Murtazovo — Prohladnai»-keskustal vspäi 1875, sišpäi raudtesarak 40 km pitte lähteb Nal'čikannoks.

Tobmuz

Kaik nell' žilod da Baksan-tesar mülüdas lidnankundha Maiskijan ližaks. Lidnankundan pind — 138,3 km².

Lidnankundan tobmuden pämez' om sen nevondkundan ezimez'. Sijaližen ičeohjandusen nevondkundan ezimez' om Tat'jana Guseva vn 2021 redukuspäi. Edeline lidnan nevondkundan ezimez' om Vasilii Čepurnoi (reduku 2016 — reduku 2021). Sijaližen administracijan pämez' om Gennadii Milokost vn 2019 sulakuspäi. Edeližed lidnan Sijaližen administracijan pämehed oma Vladimir Protasov (reduku 2017 — sulaku 2019), Sergei Vasil'čenko (keväz'ku 2016 — eloku 2017).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 26 755 ristitud, lidnankundan — 27 416 ristitud, rajonan seičeme kümnendest, vn 2021 lidnan — 26 632 ristitud. Vl 2017 kaik 27 055 ristitud elihe lidnas i 27 738 ristitud kaikes lidnankundas. Kaikiš suremb lidnan ristitišt om 26..27 tuhad eläjid vspäi 2002 (27 301 rist. vl 2009).

Rahvahad (enamba 0,7 % vl 2010, ozutadud rahvahudenke): venälaižed — 70,0 %, turkad — 11,4 %, kabardalaižed — 5,6 %, korejalaižed — 3,3 %, čiganalaižed — 2,9 %, ukrainalaižed — 1,2 %, osetinalaižed — 0,9 %, balkarijalaižed — 0,7 %, toižed rahvahad — 4,0 %.

Ortodoksižen hristanuskondan ph. Mikoi-arhangelan jumalanpert'^[2] om avaitud lidnas, letihe pühäpertid vll 1907−1909. Islaman uz' pühäpert' om avaitud vl 2018.

Openduz

Lapsiden opendusen aluzkundad oma ühesa nimitadud augotižškolad-päivkodid, progimnazii nomer 13, aluzškol nomer 10, viž keskškolad (nomer 2..5, 14), gimnazii nomer 1, lapsiden sädamižen keskuz, čomamahtoiden škol Z. N. Konteran nimed, lapsiden da norišton sportškol.

Kabardinijan da Balkarijan agrotegimištol'žen kolledžan (Vanh Čerek-žilo) Maiskijan filial^[3] andab professionališt opendust lidnas.