Krasnogorsk

Krasnogorsk
Красногорск

Lidnanznam	Flag
Valdkund	Venäma
Eläjiden lugu (2024)	193,127 ristitud
Pind	25,65 km²
Pämez'	Dmitrii Volkov (kül'mku 2021—)
Telefonkod	+7−495, +7−498
Avtokod	50, 90, 150, 190, 750
Aigvö	UTC+3 (MSK+0)

Krasnogorsk (ven.: Красного́рск) om Venäman lidn agjan alištusenke Moskvan agjan keskuses. Se om agjan seičemenz' lidn eläjiden lugun mödhe, Krasnogorsk-lidnümbrikon (edel vn 2017 sulakud — Krasnogorskan rajonan) administrativine keskuz da pala. Krasnogorsk ei ole agjan oficialižeks administrativižeks keskuseks, no vspäi 2007 Moskvan agjan ohjastusen pertid da agjan käskuzkundan pert' sijadasoiš Krasnogorskan territorijal.

Istorii

Eländpunktan aluz om pandud vl 1932 Rusked Mägut-žilon (ven.: Красная Горка), Ban'ki-žilon da Pavšino-külän ühtištusel. Krasnogorsk panihe radnikžiloks šingotamha optiktegimištod, mugažo letihe raudbetonkonstrukcijoiden tegint sauvomha Moskvan metropolitenad i kanalad. Vl 1940 radnikžilo sai lidnan statusad. Lühüdaks aigaks (vozil 1960−1961) Krasnogorsk oli alištunu Moskv-lidnan Deputatoiden nevondkundale.

Krasnogorskan ižandusen päsarakod oma:

• optikan da optiž-elektronine ladimensauvomine (tegihe tutabid «Zenit»-fotoapparatoid enččel);
• sauvondmaterialoiden tegimišt (gipstegesed, kuivad sauvondsegoitused, erazmujuine asfal'tbeton);
• mašiništon pästand cementan, himijan da metallurgijan sarakoiden täht;
• sömtegimišt;
• mugažo poligrafijan edheotandad oma olmas.

Geografijan andmused

Krasnogorsk-lidnümbrikon sijaduz agjas vn 2023 vilukun kartal

Lidn sijadase ümbrikon päivnouzmaižes čogas, Moskvanjogen hural randal, läbitase sen hural Ban'k-ližajogel, seižub 190..220 m korktusil valdmeren pindan päl (Smolenskan da Moskvan ülüden sarakod).

Krasnogorsk röunatab Moskvan Mitino- i Strogino-rajonidenke. Matkad Moskvan keskuzpalhasai om kaks'kümne kaks' kilometrad suvipäivnouzmha.

Klimat om ven kontinentaline. Voden keskmäine lämuz om +4,5 C°, kezakun-elokun +17..+19 C°, tal'vkun-uhokun −8..−9 C°.

Ende äi käpid oli nügüdläižen lidnan territorijal.

Tobmuz

Krasnogorsk-lidnümbrikon kart, viluku 2023

Oficialitomašti Krasnogorsk jagase vižtoštkümneks lidnanlaptaks.

Lidnan pind — 25,65 nellikkilometrad, lidnümbrikon pind (edel 2017. vot Krasnogorskan rajon) — 223,39 km². Lidnanvuitte Nahabino-žilo (41 983 rist. vl 2017) i 35 žilod da küläd mülüdas lidnümbrikho Krasnogorskan ližaks.

Lidnümbrikon tobmuden pämez' om sen Administracijan pämez'. Edeližed lidnümbrikon Administracijan pämehed oma El'mira Haimurzina (tal'vku 2018 — keväz'ku 2021) i Radii Habirov (viluku 2017 — reduku 2018). Lidnan Deputatoiden nevondkundan ezimez' om Sergei Trifonov vn 2014 elokuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 116 896 ristitud, rajonan (nüg. lidnümbrik) — 179 872 ristitud, vn 2021 lidnan — 187 634 ristitud. Vl 2017 kaik 153 393 eläjad oli lidnas i 231 673 eläjad kaikes lidnümbrikos. Kaikiš suremb lidnan da lidnümbrikon ristitišt om nügüd'. Ristitišt ližadub heredas Moskvan lähembusen tagut. Krasnogorskan lidnümbrikon ristitišton kaks' koumandest eläb Krasnogorskas.

Ortodoksižen hristanuskondan kuz' pühäpertid om avaitud lidnas: ph. Mikulai-čudonsädajan päjumalanpert' (saudihe vll 2013−2020) Pavšinon luhtal, nell' jumalanpertid i časoun'.

Openduz

Lapsiden opendusen aluzkundad oma 34 municipališt i kaks' privatišt päivkodid, augotižškol nomer 17, kaks'toštkümne valdkundališt keskškolad (nomer 1, 3, 8..12, 14..16, 18, Opalihan mikrorajonan), nell' gimnazijad (nomer 2, 5..7), licei (nomer 4), lapsiden da norišton sädamižen šingotesen keskuz, muzikškol, čomamahtoine škol, olimpižen varan sportškol basketbolas.

Kaik nell' specialižen keskopendusen aluzkundad ratas lidnas: ekonomikan da oiktusen tehnikum, Krasnogorskan kolledž (edel 2007. vot optiž-elektronine kolledž i politehnine tehnikum eriži), Moskvan agjan medkolledžan nomer 1 Krasnogorskan filial. MVTU:n Baumanan nimed filial om üläopendusen aluzkundaks lidnas.

Transport

Avtobusad da maršruttaksid oma kundaližeks transportaks lidnan südäimes. Moskv—Rig-raudte jagab lidnad kahteks palaks: pohjoižeks i suvižeks, i vaiše üks' avtote ühtenzoitab niid.

Äiluguižed kiruhted i kaks' raudted ühtenzoittas lidnad Moskvanke. Vspäi 2010 Moskvan metropolitenan Mäkinino-metrostancii sijadase lidnas.

Galerei

• 
  Moskvan agjan Ohjastusen (keskuses) i Duman (huralpäi) sauvused vl 2020
• 
  Ph. Mikulai-čudonsädajan päjumalanpert', vn 2020 nägu
• 
  «Knauf»-kompanijan gipstegesiden da sauvondsegoitusiden tegim vl 2013
• 
  Ph. Lukan pühäpert' i klinik Višnevskijan nimed, vn 2007 nägu
• 
  Podmoskovje-kul'turkeskuz vl 2022 («Moskvanaluine»)
• 
  Valdkundaližen kinoarhivan päkorpus (2018)
• 
  Ijun' -torguimižbobuštuzkeskuz («Kezaku», 2013)
• 
  Pavšino-päraudtestancii vl 2020
• 
  «Mäkinino»-metrostancijan tulend vl 2009

Irdkosketused

• Lidnümbrikon Deputatoiden nevondkundan oficialine sait (krasnogorsk-sovet.ru). (ven.)
• Lidnümbrikon Administracijan oficialine sait (krasnogorsk-adm.ru). (ven.)
• Lidnan informacine sait (krasnogorsk.info). (ven.)