Ivantejevk

Ivantejevk
Ивантеевка

Lidnanznam	Flag
Valdkund	Venäma
Eläjiden lugu (2024)	83,941 ristitud
Pind	14,59 km²
Telefonkod	+7−496-xxx-xx-xx
Avtokod	50, 90, 150, 190, 750
Aigvö	UTC+3 (MSK+0)

Ivantejevk (ven.: Иванте́евка) om Venäman lidn Moskvan agjan keskuzpalan pohjoižpäivnouzmas, Puškinon lidnümbrikon kahtenz' surtte lidn koumespäi (edel 2021. vot lidn oli lidnümbrikoks ičeksaz). Se om Moskvan pohjoižpäivnouzmaine ezilidn, agjan 24nz' lidn eläjiden lugun mödhe.

Istorii

Eländpunktan aluz om pandud vl 1564 kuti Vantejevo-žilo (i lähine Kopnino, mainitase село Копнино и Ванте́ево тож). Vll 1576−1628 Vantejevo-külä oli Stroican jumalankodin tobmuden al. Kaik koume fabrikad radoiba žilonno 18. voz'sadaspäi: vatken, kirjutandbumagan i špaleroiden. Nell' fabrikad oliba rados vodele 1917: kaks' tekstilišt, kanghiden mujutandan, villan kezerdusen. Kätihe Ivantejevskii-radnikžiloks vn 1928 21. päiväl semendkud. Raudte ühtenzoiti Moskvanke vll 1929−1930. Vl 1931 ühtištadihe tekstil'fabrikoid trikotažkombinataks. Mülütihe lähižid žiloid da anttihe lidnan statusad nügüdläiženke nimitusenke vn 1938 uhokun 2. päiväl.

Ivantejevk šingotase sauvondan betonsol'mel i edheotandoil (betonantegimed, raudbetontegesed, metalližen vanundan varažomad, elektrolämbitusen sistemad), sömtegimištol (leibänkombinat, oluden tegim) i mecan tedokeskusel. Vaiše pened tekstiližed edheotandad jäihe rados nügüd'.

Geografijan andmused

Puškinon lidnümbrikon sijaduz agjas vn 2021 kezakun kartal

Lidn sijadase ümbrikon suviröunanno, Uč-jogen randoil (ven.: Уча́ 42 km pitte, Kläz'man hura ližajogi), 150 m ü.m.t. keskmäižel korktusel.

Matkad Moskvhasai (Moskvan rengazavtotehesai) om seičemetoštkümne kilometrad suvipäivlaskmha. Lähembaižed lidnad oma Puškino ani päivlaskmha i lodeheze, Fräzino vides kilometras päivnouzmha, Ščolkovo kahtes kilometras suvipäivnouzmha, Korolöv ühtes kilometras suvipäivlaskmha.

Ivantejevk-2-, Ivantejevk- (edeline vspäi 1936, nüg. vspäi 1967) i Detskai- (vspäi 1946) raudteplatformad ratas «Moskv (Jaroslavlin päraudtestancii) — Fräzino»-keskustal. «Holmogori»-avtote (M8-trass) mäneb ühtes..koumes kilometras päivlaskmha lidnaspäi.

Tobmuz

Ivantejevk oli lidnümbrikon üks'jäižeks eländpunktaks. Puškinon lidnümbrikon Deputatoiden nevondkund radab Ivantejevkas (sen enččen lidnümbrikon Administracijan sauvuses). Lidn röunatab Korolövanke suves, Ščolkovo-lidnümbrikonke päivnouzmas.

Maksim Krasnocvetov radoi lidnümbrikon tobmuden pämehen vn 2018 tal'vkuspäi.

Eläjad

Vl 1939 lidnan ristitišt oli 22 207 eläjad, vl 1959 — 30 945 eläjad. Vn 2010 Venäman rahvahanlugemižen mödhe lidnan eläjiden lugu oli 58 626 ristutud, vn 2021 — 82 827 ristitud. Kaik 74 497 eläjad oli lidnas vl 2017. Kaikiš suremb lidnan ristitišt om nügüd'.

Rahvahad (ozutadud rahvahudenke vl 2010): venälaižed — 93,0 %, ukrainalaižed — 1,6 %, armenijalaižed — 1,1 %, toižed rahvahad — 4,3 %.

Ortodoksižen hristanuskondan kahesa pühäpertid oma kaičenus i saudud lidnas: nell' jumalanpertid, kodijumalanpert' läžundkodiš, koume časounäd. Baptizman pühäpert' om avaitud mugažo.

Openduz

Lapsiden opendusen aluzkundad oma päivkodid, keskškolad.

Moskvan politehnižen universitetan Ivantejevkan filial i Moskvan telikundan inspekcijan openduzkeskuz oma lidnan professionaližen opendusen aluzkundoikš.

Galerei

• 
  Enččen lidnümbrikon tobmuden sauvuz (2010)
• 
  Jumalanmaman Smolenskan jumalaižen pühäpert' (om saudud vl 1808), vn 2013 nägu
• 
  «Olimp»-sportpert'kulu (2015)
• 
  Lidnan läžundkodin hirurgine korpus (2010)

Irdkosketused

• Lidnümbrikon tobmuden sait (adm-pushkino.ru). (ven.)
• Lidnan informacine sait (ivanteevka-24.ru). (ven.)