Reutov

Reutov
Реутов

Lidnanznam	Flag
Valdkund	Venäma
Eläjiden lugu (2024)	112,070 ristitud
Pind	8,89 km²
Pämez'	Aleksei Koväzin (tal'vku 2025—, velgusentäutai)
Telefonkod	+7−495-xxx-xx-xx, +7−498-xxx-xx-xx
Avtokod	50, 90, 150, 190, 750
Aigvö	UTC+3 (MSK+0)

Lidnan kart (2021), lidnümbrikon röun om ozutadud rusttal jonol

Reutov (ven.: Ре́утов) om Venäman lidn, lidnümbrik da raudtesol'm Moskvan agjan keskuzpalan päivnouzmas. Se om agjan 17..19nz' lidn eläjiden lugun mödhe, Moskvan päivnouzmaine ezilidn. Sai tedolidnan statusad vn 2003 lopus.

Istorii

Eländpunktan aluz om pandud 15. voz'sadan lopus. Se mainitase ezmäižen kerdan 16. voz'sadan aigkirjas kuti Reutovo-külä. Kätihe radnikžiloks vl 1928. Žilo sai lidnan statusad nügüdläiženke nimitusenke vn 1940 7. päiväl redukud.

Reutov šingotase mašinansauvomižen tedotehmištol'žel ühtelmasel (raketiž-kosmine sarak) i sömtegimištol (kül'menzoittud pol'fabrikatad, konditerižed i kulinarižed tegesed). Favorit Motors-avtoholding baziruiše lidnas mugažo.

Geografijan andmused

Lidnümbrikon sijaduz agjas vn 2023 kartal

Lidn sijadase 160 m ü.m.t. keskmäižel korktusel. Fabričnii-uit om saudud lidnan keskuzpalan suvipäivnouzmas.

Moskvan rengazavtote om lidnan päivlaskmaižeks röunaks. Toine lähembaine lidn om Balaših ani päivnouzmha i pohjoižhe.

«Volg»-avtote (M7-trass) om lidnan pohjoižröunaks, nimitase Entuziastoiden šosseks edel Balašihad. Reutovo-raudtestancii radab lidnan suvipäivlaskmas «Moskv (Kurskan päraudtestancii) — Vladimir»-keskustal vspäi 1897. Se raudte jagab lidnad kahteks palaks (pohjoine om enamba), ned ühtenzoittas Moskvan rengazavtoten sildal. Raudtesarak ühtenzotab Balašihanke mugažo, Stroik-raudtestancii (ven.: Стройка «Sauvond») om lidnan pohjoižröunanno.

«Novokosino»-metrostancijan üks' lähtendaspäi tuleb lidnan suvhe.

Tobmuz

Lidn jagase nomeruidud mikrorajonikš, administrativižeta jagandata. Se om Reutov-lidnümbrikon üks'jäižeks eländpunktaks. Lidnümbrikon pind — 9,09 nellikkilometrad.

Lidnümbrikon tobmuden pämez' om sen Administracijan pämez'. Lidnan Deputatoiden nevondkundan ühtnijad valitas händast radnikusele videks vodeks. Edeližed lidnan Administracijan pämehed oma Filipp Naumenko (tal'vku 2023 — tal'vku 2025), Stanislav Katorov (heinku 2017 — tal'vku 2023), Sergei Jurov (eloku 2014 — heinku 2017), Aleksandr Hodirev (1996 — eloku 2014). Lidnümbrikon nevondkundan ezimez' om Nikolai Kovalöv vspäi 2024, han-žo oti lidnan rahvahaližiden deputatoiden nevondkundan ezimehen radnikust vll 1990−1993.

Eläjad

Vl 1939 žilon ristitišt oli 14 768 eläjad, vl 1959 lidnan — 24 268 eläjad. Vn 2010 Venäman rahvahanlugemižen mödhe lidnan eläjiden lugu oli 87 314 ristutud, vn 2021 — 113 871 ristitud (se ristitišt oli kaikiš suremb). Kaik 99 989 eläjad oli lidnas vl 2017. Jäl'ghižel 2018. vodel lidnan ristitišt ületi 100 tuhad eläjid i oli 103 779 ristitud.

Rahvahad (ozutadud rahvahudenke vl 2010): venälaižed — 91,8 %, armenijalaižed — 2,0 %, ukrainalaižed — 1,7 %, toižed rahvahad — 4,5 %.

Ortodoksižen hristanuskondan kuz' pühäpertid oma saudud lidnas: koume jumalanpertid, kaks' kodijumalanpertid i časoun'. Niiden ližaks ph. Mikoi-arhangelan jumalanpert' om sauvomižes vspäi 2019.

Openduz

Lapsiden opendusen aluzkundad oma nell'toštkümne municipališt päivkodid i kuz' privatišt, kahesa keskškolad, licei, gimnazii, lapsiden operteatr, norišton kul'turan da joudan keskuz, koume muzikškolad.

Professionaližen opendusen aluzkundad oma Energija-kolledž i Moskvan valdkundaližen tehnižen universitetan Baumanan nimed aerokosmine fakul'tet.

Galerei

• 
  Lidnümbrikon tobmuden sauvuz (2010)
• 
  Eläban Eziauguižen Stroican jumalanpert', vn 2011 nägu
• 
  Hirurgijankeskuz (2010)
• 
  Norišton kul'turan da joudan keskuz (vn 2010 olend)
• 
  Reutovo-raudtestancii vl 2009

Irdkosketused

• Lidnümbrikon tobmuden aluzkundoiden oficialine sait (reutov.net). (ven.)
• Lidnan informacine sait (myreutov.ru). (ven.)