Solnečnogorsk

Solnečnogorsk
Солнечногорск

Lidnanznam	Flag
Valdkund	Venäma
Eläjiden lugu (2024)	47,514 ristitud
Pind	21 km²
Telefonkod	+7−49 626-x-xx-xx
Avtokod	50, 90, 150, 190, 750
Aigvö	UTC+3 (MSK+0)

Solnečnogorsk (ven.: Солнечного́рск) om Venäman lidn Moskvan agjan lodehes. Se om Solnečnogorsk-lidnümbrikon (edel vn 2019 vilukud — rajonan) administrativižeks keskuseks da üks'jäižeks lidnaks.

Istorii

Eländpunktan aluz om pandud kuti Gomzino-žilo «Piter — Moskv»-traktan teverel. Imperatoran pert'kulu i adivpert' oliba olmas žilos, i aigan mändes nimitihe sidä Solnišnai i Solnečnai-mägi (ven.: Солнышная, Солнечная Гора). Tehtihe jarmankoid žilos joga nedalil tožnargidme 19. voz'sadan keskes. Sätihe Solnečnogorskii-radnikžilod vl 1928. Se sai lidnan statusad vn 1938 26. päiväl tal'vkud nügüdläiženke nimitusenke. Toižen mail'man sodan aigan lidn oli okkupiruidud nacistižen Germanijan sodavägil vl 1941 (22. kül'mku — 12. tal'vku).

Solnečnogorsk šingotase mašinansauvomižel (mašiništ punümbriradmižen i lämuzümbriradmižen täht, vilugoitimed, metalltegesed), sauvondmaterialiden pästandal (metalline verk, metalližkonstrukcijad, läbinägujad konstrukcijad, beton, letked, šebin', raudbetontegesed), pakuitesen koumel edheotandal, sömtegimištol (konditerine edheotand), mugažo tehnik desantan täht, radioelektronine apparatur, polimerad tehtas lidnas.

Geografijan andmused

Solnečnogorsk-lidnümbrikon sijaduz agjas (2023)

Lidnümbrikon kart (2023)

Lidn sijadase ümbrikon lodehes, Klinan-Dmitrovan ülüdel, 195 m ü.m.t. keskmäižel korktusel. Senež-järven-vezivaradimen rand (ven.: Сенежское 8,5 km²) om lidnan pohjoižpäivnouzmas.

Matkad Moskvan röunhasai (Moskvan rengazavtotehesai) om nell'kümne nell' kilometrad suvipäivnouzmha orhal, avtotel vai raudtel. Lähembaine lidn om Klin 23 km lodeheze orhal i kaikil teil.

Eläjad

Vl 1939 lidnan ristitišt oli 13 548 eläjad, vl 1959 — 24 214 eläjad. Vn 2010 Venäman rahvahanlugemižen mödhe lidnan eläjiden lugu oli 52 944 ristitud, rajonan (nüg. lidnümbrik) koumandez, vn 2021 — 48 413 ristitud. Kaik 52 642 eläjad oli lidnas vl 2017. Kaikiš suremb lidnan ristitišt oli 55..58 tuhad eläjid vll 1989−2009 (58 400 rist. vl 2003).

Rahvahad (ozutadud rahvahudenke vl 2010): venämalaižed — 91,6 %, ukrainalaižed — 2,8 %, armenijalaižed — 1,6 %, toižed rahvahad — 4,0 %.

Ortodoksižen hristanuskondan nell' pühäpertid oma saudud lidnas: kaks' jumalanpertid i kaks' časounäd. Islaman «Nurulla — Allahan vauktuz»-pühäpert' om avaitud.

Openduz

Lapsiden opendusen aluzkundad oma üks'toštkümne päivkodid (nomer 1, 2, 10, 17, 19, 21, 32, 35, 36, 38, 56), koume keskškolad (nomer 2, 4, 5), kaks' liceid (nomer 1 i 7), lapsiden sädamižen pert', čomamahtoiden škol, kaks' sportškolad (nomer 1 i 2).

«Moskvanaluine»-kolledžan pala om lidnan professionaližen opendusen aluzkundaks.

Transport

Podsolnečnai-raudtestancii radab lidnan keskuzpalan lodehes vspäi 1851 «Moskv — Piter»-keskustal.

M10-trass (Moskv — Piter) läbitab lidnad. Maksline «Neva»-avtote (M11-trass) ümbärdab lidnad kahtes..koumes kilometras suvipäivlaskmaspäi.

Galerei

• 
  Imperatoran pert'kulun tulendanno (2014)
• 
  Spasan jumalanpert', vn 2014 nägu (om saudud vl 1759)
• 
  «Nurulla — Allahan vauktuz»-mečet', vn 2013 nägu
• 
  Medicinižen stökolpakuitesen «Solstek»-tegim vl 2008
• 
  Telekommunikacijoiden pert' (2010)
• 
  Podsolnečnai-päraudtestancii vl 2008

Irdkosketused

• Solnečnogorsk-lidnümbrikon tobmuden aluzkundoiden oficialine sait (solreg.ru). (ven.)