Fräzino

Fräzino
Фрязино

Lidnanznam	Flag
Valdkund	Venäma
Eläjiden lugu (2024)	58,661 ristitud
Pind	9,18 km²
Pämez'	Dmitrii Vorobjov (kül'mku 2020—)
Telefonkod	+7−496−56x-xx-xx. +7−496−25x-xx-xx
Avtokod	50, 90, 150, 190, 750
Aigvö	UTC+3 (MSK+0)

Fräzino (ven.: Фря́зино) om Venäman lidn da lidnümbrik Moskvan agjan keskuzpalan pohjoižpäivnouzmas. Om tedolidnan statusanke vn 2003 tal'vkuspäi.

Istorii

Eländpunkt mainitaškanzihe voziden 1584−1586 aigkirjas kuti Fräzinov- vai Samsonov-külä (ven.: деревня Фрязинова, а Самсонова тоже). Külän da lähižiden žiloiden (Fränovo, Fräzevo) nimi libub Venän italijalaižiden fräzad (fräzinad)-nimitusespäi, hö sauvoiba Moskvan Kremlid. Fräzino (Fräzin) om kirjutadud vll 1784−1926 küläks. Se oli muretud edel tegimištzonan sauvomišt 1960-nzile vozile, sirtihe eläjid Novofräzino-külähä. Vll 1901−1929 šuukkanghiden fabrik radoi küläs, udesprofiliruihe vl 1933 radiolampoiden tegimeks. Vl 1936 raudte tuli Fräzinho Ivantejevkaspäi. Kätihe Fräzinod radnikžiloks vl 1938. Se sai lidnan statusad vl 1951, šingotihe üläkorktan paksuden elektronikal. Alištub agjan tobmudele oikti vspäi 1968.

Fräzino šingotase «IRE-Polüs»-tedoühtelmasel (stökolkuidun lazerad), «Istok»-tedoedheotandal (ladimed gastroenteroskopijan täht, kulumižapparatad, lämuzdiodad). Eläjiden znamasine pala radab Moskvas.

Geografijan andmused

Fräzino-lidnümbrikon sijaduz agjas vn 2014 kartal

Lidnümbrikon sijaduz kesked Ščolkovo-lidnümbrikod (2019)

Lidn sijadase Lübosejevk-jogen üläjoksmusen randoil (ven.: Любосеевка 12 km pitte, Kläz'man hurapol'ne bassein), 165 m ü.m.t. keskmäižel korktusel.

Matkad Moskvhasai (Moskvan rengazavtotehesai) om kaks'kümne kilometrad suvipäivlaskmha. Lähembaižed lidnad oma Ivantejevk vides kilometras päivlaskmha i Ščolkovo üks' kilometr suvhe.

Fräzino-raudteplatform (vspäi 1949) radab keskustan Bolševo-stancijaspäi (Korolöv) lopstancijaks lidnan keskuses, elektrojonused lähttas Moskvan Jaroslavlin päraudtestancijaspäi. Fräzino-jügustancii om saudud lidnan päivlaskmas.

Tobmuz

Fräzino om lidnümbrikon üks'jäižeks eländpunktaks, lugemata pen't Čižovo-küläd (4 rist. vl 2018, 16 rist. vl 2024). Lidn om ümbärtud Ščolkovo-lidnümbrikon territorijal.

Lidnümbrikon tobmuden pämez' om sen Administracijan pämez'. Edeližed lidnan Administracijan pämehed oma Konstantin Bočarov (viluku 2019 — kül'mku 2020), Aleksandr Lobkov (kezaku 2018 — viluku 2019), Igor' Sergeev (radoi vn 2018 semendkuhusai). Lidnümbrikon Deputatoiden nevondkundan ezimez' om Polina Konovalova vn 2025 redukuspäi. Edeližed lidnan nevondkundan ezimehed oma Jelena Romanova (reduku 2020 — reduku 2025), Konstantin Tihonov (uhoku 2016 — reduku 2020), Vladimir Uhalkin (radoi vn 2016 uhokuhusai).

Eläjad

Vl 1939 žilon ristitišt oli 5 901 eläjad, vl 1959 lidnan — 19 130 eläjad. Vn 2010 Venäman rahvahanlugemižen mödhe lidnan eläjiden lugu oli 55 369 ristutud, vn 2021 — 60 580 ristitud. Kaik 60 408 eläjad oli lidnas vl 2017. Kaikiš suremb ristitišt om 55..60 tuhad eläjid vspäi 2010 (60 580 rist. vl 2021).

Rahvahad (ozutadud rahvahudenke vl 2010): venälaižed — 93,0 %, ukrainalaižed — 2,0 %, armenijalaižed — 1,2 %, toižed rahvahad — 3,8 %.

Ortodoksižen hristanuskondan nell' jumalanpertid oma saudud lidnas.

Openduz

Lapsiden opendusen aluzkundad oma kaks'toštkümne nomeruidud päivkodid (nomer 2..6, 8..12, 14, 15), viž keskškolad (nomer 1..5), gimnazii (ende keskškol nomer 6), licei (ende keskškol nomer 7), lapsiden sädamižen keskuz, čomamahtoiden škol M.I. Dunajevskijan nimed, kaks' sportškolad («Fräzino» i «Olimp»).

Professionaližen opendusen aluzkund om Venäman tehnologižen universitetan (ende MIREA, Moskv-lidn) Fräzinon filial i Ščolkovon kolledžan palakund.

Galerei

• 
  Fräzino-lidnümbrikon tobmuden sauvuz vn 2024 heinkus
• 
  Raštvoiden jumalanpert', vn 2011 nägu
• 
  «Istok»-tedoedheotandan sauvuz i vagzalan torg vl 2012
• 
  Läžundkodi (2014. voz' vai sen aigemba)
• 
  Fräzino-stancijan passažirplatform vl 2011

Irdkosketused

• Lidnümbrikon tobmuden aluzkundoiden oficialine sait (adm-fryazino.ru). (ven.)