Ščolkovo

Ščolkovo
Щёлково

Lidnanznam	Flag
Valdkund	Venäma
Eläjiden lugu (2024)	135,918 ristitud
Pind	52 km²
Telefonkod	+7−496−56x-xx-xx, +7−496−25x-xx-xx
Avtokod	50, 90, 150, 190, 750
Aigvö	UTC+3 (MSK+0)

Ščolkovo (ven.: Щёлково) om Venäman lidn Moskvan agjan keskuzpalan pohjoižpäivnouzmas. Se om agjan 12nz'-13nz' lidn eläjiden lugun mödhe, Ščolkovo-lidnümbrikon (edel vn 2019 vilukud — rajonan) administrativine keskuz da üks'jäine lidn.

Istorii

Eländpunkt mainitaškanzihe vspäi 1521 kuti Ščolkovo-külä. Se tegihe tahondan ekonomižeks keskuseks 19. voz'sadan augotišes. Kätihe radnikžiloks vl 1923. Žilo sai lidnan statusad vl 1925. Oli rajonan keskuseks vspäi 1929.

Ščolkovo šingotase metallurgižel tegimel i kal'hiden metalloiden ümbriradmižen tegimel, sömtegimištol (leibän edheotand, südäiveziden tegim), zell'tegimel, elektropompiden tegimel, puvillkanghiden kombinatal, kazmusiden himižen kaičendan substancijoiden edheotandal. Himižen mašinansauvomižen tedoinstitut radab lidnas.

Geografijan andmused

Ščolkovo-lidnümbrikon sijaduz agjas vn 2021 kartal

Lidnümbrikon kart (2021)

Lidn sijadase ümbrikon suvipäivlaskmas, Kläz'm-jogen molembil randoil, 150 m ü.m.t. keskmäižel korktusel.

Matkad Moskvhasai (Moskvan rengazavtotehesai) om 15 km suvipäivlaskmha. Lähembaižed lidnad oma Fräzino üks' kilometr pohjoižhe, Losino-Petrovskii 10 km päivnouzmha-suvipäivnouzmha, Balaših 10 km suvhe, Korolöv nelläs kilometras päivlaskmha, Ivantejevk kahtes kilometras lodeheze.

Ščolkovo-raudtestancii radab lidnan keskuzpalas «Mitišči — Fräzevo»-keskustal vspäi 1896, elektrojonused lähttas Moskvan Jaroslavlin päraudtestancijaspäi. Čkalovskii-sodalendimport sijadase lidnan suvipäivnouzmas.

Eläjad

Vl 1939 lidnan ristitišt oli 27 209 eläjad, vl 1959 — 62 051 eläjad. Vn 2010 Venäman rahvahanlugemižen mödhe lidnan eläjiden lugu oli 110 411 ristutud, rajonan (nüg. lidnümbrik) kaks' koumandest, vn 2021 — 134 211 ristitud. Kaik 125 843 eläjad oli lidnas vl 2017. Kaikiš suremb lidnan ristitišt om nügüd', ületi 100 tuhad vl 1979.

Rahvahad (ozutadud rahvahudenke vl 2010): venälaižed — 92,0 %, ukrainalaižed — 2,6 %, totarlaižed — 1,3 %, toižed rahvahad — 4,1 %.

Ortodoksižen hristanuskondan kahesa pühäpertid oma kaičenus i saudud lidnas: Eläban Eziauguižen Stroican päjumalanpert' (om saudud vll 1909−1916), kuz' jumalanpertid i časoun'. Islaman mečet' radab vspäi 2001.

Openduz

Lapsiden opendusen aluzkundad oma läz koumekümned päivkodid, kaks'toštkümne keskškolad (nomer 1..4, 6, 8, 10..13, 16, 17), kaks' liceid (Ščolkovon i nomer 14 Gagarinan nimed), Ščolkovon gimnazii, avoin škol, specialine (korrekcine) škol nomer 5 8. toižendan, ümbrikon sädamižen šingotesen i gumanitarižen opendusen «Romantik»-keskuz, ümbrikon čomamahtoiden škol Ju. A. Rozuman nimed, ümbrikon olimpižen varan sportškol.

Ščolkovon kolledž i Olimpižen rezervan valdkundaline škol-tehnikum oma lidnan professionaližen opendusen aluzkundoikš.

Galerei

• 
  Valdkundmaksoiden radnikoičend (vn 2009 olend)
• 
  Eläban Eziauguižen Stroican päjumalanpert', vn 2015 nägu
• 
  Lidnan torguz vl 2007
• 
  Astrum-adivpert' Kläz'man randal udenno sildanno (2019)
• 
  «Ščolkovo»-torguindkeskuz (kül'mku 2025)
• 
  Podmoskovje-stadion (2016, «Moskvanaluine»)
• 
  Ščolkovo-raudtestancii vl 2009

Irdkosketused

• Lidnümbrikon tobmuden aluzkundoiden oficialine sait (shhyolkovo.ru). (ven.) (+ äikel'ne avtomatine känduz)