Krasnoarmeisk (Moskvan agj)

Krasnoarmeisk
Красноармейск

Lidnanznam	Flag
Valdkund	Venäma
Eläjiden lugu (2023)	26,583 ristitud
Pind	15 km²
Telefonkod	+7−49 653-x-xx-xx
Avtokod	50, 90, 150, 190, 750
Aigvö	UTC+3 (MSK+0)

Sil sanal voib olda toižid znamoičendoid; miše nähta niid, tulgat tänna.

Krasnoarmeisk (ven.: Красноарме́йск) om Venäman lidn Moskvan agjan pohjoižpäivnouzmas, sen Puškinon lidnümbrikon koumanz' surtte lidn koumespäi i koumanz' surtte eländpunkt. Edel 2021. vot oli erigoittud lidnümbrikoks.

Istorii

Ende Muromcevo-žilo oli olmas lidnan territorijal, se mainitase 16. voz'sadaspäi. Bumagkezerduzfabrik radoi žilos vspäi 1834, nimitihe fabrikad Rusttan Armijan i Laivišton oiktastuseks vn 1917 jäl'ghe.

Nügüdläižen eländpunktan aluz om pandud vl 1928 kuti Krasnoflotskii-radnikžilo. Vl 1934 Sofrinon artillerine poligon radaškanzi, saudihe personalan žilod senno, möhemba kodvihe raketiž-kosmišt-ki tehnikad. Ühtištadihe tekstiližen fabrikan žilod poligonan žiloidenke da anttihe lidnan statusad vn 1947 12. päiväl keväz'kud.

Krasnoarmeisk šingotase kaičendsarakon tedotegimištedheotandoil (mehanizacii, šlibakoiden sädand), himižel tegimel (denaturiruidud spirtad i produkcii niišpäi), sauvondmaterialiden pästandal (betontegim, savičun tegim), gofrokartonpakuitesen edheotandal sömtegimišton täht, mugažo sömkombinat radab. Kezerdusen da kanghiden fabrik ei ole rados vspäi 2014.

Geografijan andmused

Lidn sijadase lidnümbrikon suvipäivlaskmas, Vor'-jogen randal (ven.: Воря 108 km pitte, Kläz'man hura ližajogi), 150 m ü.m.t. keskmäižel korktusel. Lidnümbrik vedase šoidul Vladimiran agjan röunhasai. Matkad Moskvhasai (Moskvan rengazavtotehesai) om 37 km suvipäivlaskmha. Lähembaižed lidnad oma Hot'kovo i Sergijev Posad pohjoižhe, Černogolovk suvipäivnouzmha, Fräzino, Ivantejevk i Puškino suvipäivlaskmha.

Krasnoarmeisk-raudtestancii radab vspäi 1956 15-kilometrižen sarakon passažirižeks lopstancijaks lidnanvuiččes Sofrino-žilospäi, edemba raudte läbitab lidnad i jätktase sodapoligonhasai. Lidn ühtenzoitase Moskvan agjan penenke rengazavtotenke (A107) vižkilometrižel sarakol suvipäivlaskmha. «Holmogori»-mante (M8-trass) mäneb kahesas kilometras päivlaskmha lidnaspäi.

Tobmuz

Enččen lidnümbrikon sijaduz agjan kartal (2017)

Krasnoarmeisk oli enččen lidnümbrikon üks'jäižeks eländpunktaks. Lidnümbrikon pind oli 156,43 km².

Enččen lidnümbrikon tobmuden jäl'gmäižed pämehed oliba Aleksandr Födorov vn 2020 kezakuspäi vhesai 2021 i Kirill Timaškov (eloku 2018 — kezaku 2020).

Eläjad

Vl 1959 lidnan ristitišt oli 18 213 eläjad, vl 1979 — 25 951 eläjad. Vn 2010 Venäman rahvahanlugemižen mödhe lidnan eläjiden lugu oli 26 294 ristutud, vn 2021 — 26 492 ristitud. Kaik 26 608 eläjad oli lidnas vl 2017. Kaikiš suremb lidnan ristitišt om 25..27 tuhad eläjid vspäi 1979 (27 600 rist. vl 1992).

Rahvahad (2010): venälaižed — 94,1 %, ukrainalaižed — 1,3 %, armenijalaižed — 1,1 %, toižed rahvahad — 3,5 %.

Ortodoksižen hristanuskondan koume jumalanpertid oma saudud lidnas: Pühän Jumalanmaman Katken (2010), ph. Aleksandr Nevalaižen (2011), i puine Sündun Voznesenjan (2002−2003).

Opendusen aluzkundad lapsiden täht oma viž nimitadud i nomeruidud päivkodid (nomer 1, 3, 4, 6, 8), kaks' keskškolad (openduzkeskused nomer 1 i 2), škol-internat openikoiden täht tervhuden röunatud voimusidenke, muzikškol, čomamahtoiden škol. Professionaližen opendusen aluzkundad ratas lähembaižiš lidnoiš.

Galerei

• 
  Enččen lidnümbrikon tobmuden sauvuz (2009)
• 
  Nevondkundaline lidnanznam
• 
  Endevanhan tekstiližen fabrikan sauvused Vor'-jogen randal vl 2009
• 
  Kuvagalerei (2006)
• 
  Krasnoarmeisk-raudtestancii vl 2013

Irdkosketused

• Lidnan informacine sait (kracik.ru). (ven.)