Peresvet (lidn)

Peresvet
Пересвет

Lidnanznam	Flag
Valdkund	Venäma
Eläjiden lugu (2024)	11,434 ristitud
Pind	19 km²
Telefonkod	+7−49 654-x-xx-xx. +7−49 655-x-xx-xx
Avtokod	50, 90, 150, 190, 750
Aigvö	UTC+3 (MSK+0)

Peresvet (ven.: Пересве́т) om Venäman lidn Moskvan agjan pohjoižes. Mülüb Sergijev Posadan lidnümbrikho (edel vn 2019 sulakud — rajonha), sen koumanz' lidn eläjiden lugun mödhe nelläspäi.

Istorii

Eländpunktan aluz om pandud vl 1948 kuti Novostroik-radnikžilo (ven.: Новостройка «uz' eländsija») kuti raketižkosmižen tehnikan poligon. Lugetihe sidä Krasnozavodsk-lidnan mikrorajonaks vhesai 2000. Erištuihe Novostroik-radnikžilod vl 2000 i panihe lidnaks nügüdläiženke nimitusenke Kulikovon toran Aleksandr Peresvet-vägimehen mödhe.

Peresvet šingotase raketižkosmižen tegimišton tedokeskusel (kosmostehnikan kodvindad), sauvondmaterialiden pästandal (teraztorved, stekloplastiktorved, pompstancijad), gaz- i lämbituzmašiništon edheotandal. Biatlonan suks'kompleks om saudud koverikahal rel'jefal.

Geografijan andmused

Sergijev Posadan lidnümbrikon sijaduz agjas vn 2010 kartal

Lidn sijadase lidnümbrikon keskuzpalan päivnouzmas, Kunj-jogen randal (ven.: Кунья́, amuine Куньема 46 km pitte, Dubnan hura ližajogi), 230 m ü.m.t. keskmäižel korktusel.

Matkad Vladimiran agjhasai om kümne kilometrad päivnouzmha. Matkad Moskvhasai (Moskvan rengazavtotehesai) om 77 km suvipäivlaskmha-suvhe, lidnümbrikon Sergijev Posad-keskushesai om 12 km suvipäivlaskmha-suvhe. Lähembaine lidn om Krasnozavodsk koumes kilometras pohjoižpäivnouzmha.

«Holmogori»-avtote (M8-trass) mäneb koumes kilometras päivlaskmha lidnaspäi.

Eläjad

Vl 2001 lidnan ristitišt oli 14 500 eläjad. Vn 2010 Venäman rahvahanlugemižen mödhe lidnan eläjiden lugu oli 14 147 ristutud, rajonan (nüg. lidnümbrik) kuz' procentad, vn 2021 — 11 752 ristitud. Kaik 13 756 eläjad oli lidnas vl 2017. Kaikiš suremb lidnan ristitišt oli läz 14 700 eläjad vll 2002−2007 (14 719 rist. vl 2002).

Rahvahad (ozutadud rahvahudenke vl 2010): venälaižed — 94,5 %, ukrainalaižed — 2,3 %, toižed rahvahad — 3,2 %.

Ortodoksižen hristanuskondan kaks' pühäpertid oma saudud lidnas: Jumalanmaman Iverižen jumalaižen pühäpert' i Joann-sodamehen jumalanpert'.

Openduz

Lapsiden opendusen aluzkundad oma viž päivkodid, kaks' keskškolad (nomer 5 i 8), muzikškol nomer 4, čomamahtoiden Garmonija-škol, hihtandškol Aleksandr Legkovan nimed.

Professionaližen opendusen aluzkundad ratas lähembaižiš lidnoiš, ende Sergijev Posadan radiomehanine tehnikum oli lidnas.

Galerei

• 
  Torg Puhovan nimed (2022)
• 
  Lidnan škol (2010)
• 
  Lidnan «Kosmos»-kul'turkeskuz (vn 2012 olend)
• 
  Nacionaline raketkosmižen tehnikan muzei Sergei Korolövan nimed vl 2022

Irdkosketused

• Lidnümbrikon tobmuden aluzkundoiden oficialine sait (sergiev-posad.net). (ven.)
• Lidnan da enččen lidnankundan informacine sait (grad-peresvet.ru). (ven.)
• Toine informacine sait lidnas (peresvet-gorod.ru). (ven.)