Korolöv (lidn)

Korolöv
Королёв
Lidnanznam;	Flag;
Valdkund	Venäma
Eläjiden lugu (2024)	226,007 ristitud
Pind	55,47 km²
Pämez'	Igor' Trifonov; (reduku 2021—)
Telefonkod	+7−495-xxx-xx-xx.; +7−496, 498, 499
Avtokod	50, 90, 150, 190, 750
Aigvö	UTC+3 (MSK+0)

Korolöv (ven.: Королёв, edel vn 1996 26. heinkud nimi oli Kaliningrad) om Venäman lidn da lidnümbrik Moskvan agjan keskuzpalan pohjoižpäivnouzmas. Se om agjan nellänz' lidn eläjiden lugun mödhe, Moskvan pohjoižpäivnouzmaine ezilidn. Sai tedolidnan statusad vn 2001 sulakuspäi.

Istorii

Eländpunktan aluz om pandud 19. voz'sadan lopus kuti kezaküläpertiden Podlipki-žilo da stancii «Mitišči — Ščolkovo»-jonol (1895), tämbäi Podlipki-Dačnije-stancii lidnan päivlaskmas. Vll 1928−1938 žilon nimi oli Kalininskii.

Nügüdläine eländpunkt om sätud lidnan statusanke vn 1938 26. päiväl tal'vkud Kaliningrad-nimitusenke. Udesnimitihe Sergei Korolöv-konstruktoran kanzannimen mödhe vl 1996 erištamha päivlaskmaižes Kaliningradaspäi. Erigoittihe Jubileinii-lidnad sišpäi vl 1992, no ühtištadihe tagaz vn 2014 semendkus (läz 30 tuhad eläjid). Mülütihe severzid-se lähižid žiloid Korolövha vll 2003−2004.

Korolöv šingotase valdkundaližen «Roskosmos»-korporacijan tedotegimištol'žil edheotandoil, sidä kesken raketkosmine «Energii»-korporacii, ladimensauvomižen tegimel (varjoičendsistemad, Alfa Laval-koncernan lämudenvajehtamižen ladimed), mecanümbriradajal tegimel, kosmetiksubstancijoiden i bioližadusiden pästandal.

Geografijan andmused

Lidn sijadase Kläz'm-jogen oiktal randal tobjimalaz, 160 m ü.m.t. keskmäižel korktusel. Rahvahaline «Hirbin sar'»-puišt (ven.: Лосиный Остров) levitase ani suvhe lidnaspäi.

Matkad Moskvhasai (Moskvan rengazavtotehesai) om viž kilometrad suvipäivlaskmha. Toižed lähembaižed lidnad (orhal) oma Puškino koumes kilometras i Ivantejevk kahtes kilometras pohjoižhe, Fräzino seičemes kilometras pohjoižpäivnouzmha, Ščolkovo nelläs kilometras päivnouzmha, Balaših seičemes kilometras suvipäivnouzmha, Mitišči üks' kilometr päivlaskmha.

Bolševo-raudtestancii radab lidnan keskuses «Mitišči — Ščolkovo»-keskustal vspäi 1896, elektrojonused tuldas Moskvan Jaroslavlin päraudtestancijaspäi. Raudtesarak lähteb pohjoižhe Fräzinonnoks. «Holmogori»-mante (M8-trass) om lidnan päivlaskmaižeks röunaks.

Tobmuz

Korolöv om lidnümbrikon üks'jäižeks eländpunktaks.

Lidnümbrikon tobmuden pämez' om sen Administracijan pämez'. Edeližed lidnan Administracijan pämehed oma Aleksandr Hodirev (reduku 2019 — reduku 2021), Jurii Kopcik (sügüz'ku 2014 — reduku 2019). Lidnümbrikon Deputatoiden nevondkundan ezimez' om Aleksandr Hodirev vn 2021 redukuspäi, oli sil-žo radnikusel vn 2019 redukuhusai. Edeline lidnan nevondkundan ezimez' om Dmitrii Denisov (reduku 2019 — reduku 2021).

Eläjad

Vl 1939 lidnan ristitišt oli 28 122 eläjad, vl 1959 — 41 427 eläjad. Vn 2010 Venäman rahvahanlugemižen mödhe lidnan eläjiden lugu oli 183 402 ristutud, vn 2021 — 228 095 ristitud (kaikiš suremb ristitišt). Kaik 221 797 eläjad oli lidnas vl 2017.

Rahvahad (ozutadud rahvahudenke vl 2010): venälaižed — 92,8 %, ukrainalaižed — 1,9 %, armenijalaižed — 1,2 %, toižed rahvahad — 4,1 %.

Ortodoksižen hristanuskondan koumetoštkümne jumalanpertid^[1] i nell' časounäd oma saudud lidnas.

Openduz

Lapsiden opendusen aluzkundad oma nell'kümne viž municipališt päivkodid, seičemetoštkümne keskškolad, viž gimnazijad, kaks' liceid (tedoinženerižen profilän i fiziž-matematine nomer 19), specškol-internat sogedoiden täht, škol-internat openikoiden täht tervhuden röunatud voimusidenke, čomamahtoiden školad, sportškolad, kel'keskused.

Lidnan professionaližen opendusen aluzkundad oma Tehnikum S.P. Korolövan nimed^[2], Korolövan Tehnologine universitet A.A. Leonovan nimed^[3], sen dizainan tehnikum i kosmosmašinansauvomižen kolledž, mugažo Moskvan üläopendusen aluzkundoiden severz'-se filialoid ratas.

Galerei

Lidnan tobmuden pert' (2011)
Eläban Eziauguižen Stroican jumalanpertin sur' pühäpert', vn 2015 nägu
Kosmoslendandoiden ohjanduzkeskuz vl 2014
Kul'turkeskuz (2011)
Bolševo-raudtestancii vl 2011
Nevondkundaline lidnanznam (1988)

Homaičendad

↑ Korolövan pühäpertid sobory.ru-saital. (ven.)
↑ Tehnikuman S.P. Korolövan nimed sait (tspk-mo.ru). (ven.)
↑ Korolövan Tehnologižen universitetan sait (unitech-mo.ru). (ven.) (angl.)

Irdkosketused

Lidnümbrikon tobmuden aluzkundoiden oficialine sait (korolev.ru). (ven.)

Korolöv (lidn) Vikiaitas

	Moskvan agjan lidnad
	Aprelevk \| Balaših \| Beloozörskii \| Bronnici \| Čehov \| Černogolovk \| Dedovsk \| Dmitrov \| Dolgoprudnii \| Domodedovo \| Drezn \| Dzeržinskii \| Dubn \| Elektrogorsk \| Elektrostal' \| Elektrougli \| Fräzino \| Golicino \| Himki \| Hot'kovo \| Istr \| Ivantejevk \| Jahrom \| Jegor'jevsk \| Kašir \| Klin \| Kolomn \| Korolöv \| Kotel'niki \| Krasnoarmeisk \| Krasnogorsk \| Krasnozavodsk \| Krasnoznamensk \| Kubink \| Kurovskoje \| Likino-Dulövo \| Litkarino \| Lobn' \| Losino-Petrovskii \| Luhovici \| Lüberci \| Mitišči \| Možaisk \| Naro-Fominsk \| Noginsk \| Odincovo \| Orehovo-Zujevo \| Ozöri \| Pavlovskii Posad \| Peresvet \| Podol'sk \| Protvino \| Puščino \| Puškino \| Ramenskoje \| Reutov \| Rošal' \| Ruz \| Sergijev Posad \| Serpuhov \| Solnečnogorsk \| Stupino \| Šatur \| Ščolkovo \| Zaraisk \| Zvenigorod \| Žukovskii \| Taldom \| Vanh Kupavn \| Verei \| Vidnoje \| Visokovsk \| Volokolamsk \| Voskresensk

[1] Korolövan pühäpertid sobory.ru-saital. (ven.)

[2] Tehnikuman S.P. Korolövan nimed sait (tspk-mo.ru). (ven.)

[3] Korolövan Tehnologižen universitetan sait (unitech-mo.ru). (ven.) (angl.)

[1]

[2]

[3]