Himki

Himki
Химки

Lidnanznam	Flag
Valdkund	Venäma
Eläjiden lugu (2024)	256,684 ristitud
Pind	109,8 km²
Pämez'	Dmitrii Vološin (sügüz'ku 2016—)
Telefonkod	+7−495-xxx-xx-xx, +7−498
Avtokod	50, 90, 150, 190, 750
Aigvö	UTC+3 (MSK+0)

Himki (ven.: Хи́мки) om Venäman lidn da lidnümbrik Moskvan agjan keskuzpalan lodehes. Se om agjan koumanz' lidn eläjiden lugun mödhe, Moskvan lodehline ezilidn.

Istorii

Äiluguižed žilod da küläd mainitasoiš Himkin territorijal 16. voz'sadaspäi, sidä kesken Himki-külä. Nügüdläižen eländpunktan aluz om pandud vl 1850 kuti Himskai-raudtestancii da žilo senno «Moskv — Piter»-raudtel, radaškanzi vn 1851 kül'mkus. Stancijan ümbrišt oli kezaküläpertiden tahondaks 1920-nzihe vozihesai. Kätihe Himkid radnikžiloks vl 1937 i sauvoškatihe kahtent aviategint. Anttihe lidnan statusad vn 1939 26. päiväl keväz'kud. Lidn oli Himkin rajonan keskuseks vll 1940−1960 i 1965−2005. Ühtištadihe Shodn'-lidnad Himkinke vn 2004 sügüz'kus.

Himki šingotase aviakosmižen sarakon kahtel tegimel (raketlikutimed, kosmižed apparatad), zenitraketsistemiden projektiruindan konstruktorbürol, sauvondan edheotandoil, Venäman kaikiš järedamban Šeremetjevo-lendimportan logistižil keskusil.

Geografijan andmused

Lidnümbrikon sijaduz agjas, röunad vspäi 2023

Himki-lidümbrikon kart (2023)

Lidnan päpala sijadase ümbrikon suvipäivnouzmaižes čogas, kanalan Moskvan nimed oiktal randal tobjimalaz (ven.: Канал имени Москвы 128 km pitte, ühtenzoitab Volgad Moskv-jogenke), 180 m ü.m.t. keskmäižel korktusel. Om penid jogid lidnan territorijal, niiden kesken Moskvan hurad ližajoged: Himk-jogen (ven.: Хи́мка vai Хи́нска, Хи́нка 18 km pitte) üläjoksmuz Himkan mecas i Shodn'-jogi (ven. Схо́дня 47 km pitte) lidnümbrikon päivlaskmas. Seičeme tošt nimitadud mikrorajonad i lendimportan zon oma lidnümbrikon erazvuiččiš poliš.

Himki-lidnümbrik röunatab Moskvanke suves, keskuzpalas i lodehes. Toižed lähembaižed lidnad oma Dolgoprudnii ani päivnouzmha, Lobn' kümnes kilometras pohjoižpäivnouzmha, Krasnogorsk 12 km suvipäivlaskmha i Zelenograd (Moskvan pala) nelläs kilometras lodeheze.

«Moskv — Piter»-raudtekeskust i «Venäma»-avtote (M10-trass, Moskv — Piter) mändas lidnan keskuzpalan kal't. Maksline «Neva»-avtote (M11-trass, Moskv — Piter) läbitab lidnan päivnouzmad. Rahvahidenkeskeine civiline Šeremetjevo-lendimport (SVO / ШРМ / UUEE, 50 mln passažiroid vl 2019) radab Himkin pohjoižes.

Tobmuz

Himki oli lidnümbrikon üks'jäižeks eländpunktaks vll 2005−2022. Vspäi 2023 kaik 36 küläeländpunktad oma alištunuded Himkin tobmudele, ende mülütihe niid Solnečnogorsk-lidnümbrikho: viž žilod i 31 küläd. Niišpäi surembad oma Bröhovo-külä (5 901 rist. vl 2021), Lunövo-žilo (3 412 rist. sil-žo vodel), Podolino-külä (3 410 rist.). Lidnümbrikon pind — 257,62 nellikkilometrad.

Eläjad

Vl 1926 žilon ristitišt oli 2 876 eläjad, vl 1939 lidnan — 23 092 eläjad. Vn 2010 Venäman rahvahanlugemižen mödhe lidnan eläjiden lugu oli 207 425 ristitud, vn 2021 — 257 128 ristitud. Kaik 244 668 eläjad oli lidnas vl 2017. Kaikiš suremb lidnan ristitišt oli 259 550 eläjad vl 2020.

Rahvahad (ozutadud rahvahudenke vl 2010): venälaižed — 91,9 %, ukrainalaižed — 1,8 %, armenijalaižed — 1,3 %, toižed rahvahad — 5,0 %.

Ortodoksižen hristanuskondan kaks'kümne viž pühäpertid oma saudud lidnas: seičemetoštkümne jumalanpertid i kahesa časounäd. Protestantizman kaks' jumalanpertid oma avaitud (baptistoiden i evangelistoiden).

Openduz

Lapsiden opendusen aluzkundad oma päivkodid, keskškolad.

Himkin tehnikum, üläopendusen kaks' akademijad (civiližen kaičendan, privatine turizman) i Moskvan valdkundaline kul'turan institut oma lidnan professionaližen opendusen aluzkundoikš.

Galerei

• 
  Phh. Pedran da Paulan jumalanpert', vn 2016 nägu (om saudud vll 1829−1848)
• 
  Himki-biznespark vl 2009
• 
  «Arena Himki»-futbolstadion (2012)
• 
  Himki-raudtestancii vl 2008

Irdkosketused

• Lidnümbrikon Deputatoiden nevondkundan sait (sdhimki.ru). (ven.)
• Lidnümbrikon administracijan sait (admhimki.ru). (ven.)