Zelenograd

Zelenograd
Зеленоград

Lidnanznam	Flag
Valdkund	Venäma
Eläjiden lugu (2024)	270,527 ristitud
Pind	37,2 km²
Pämez'	Anatolii Smirnov (viluku 2000—)
Telefonkod	+7−495-. 496-. 498-. 499-xxx-xxxx
Avtokod	77, 97, 99, 177, 197, 199, 777
Aigvö	UTC+3 (MSK+0)

Zelenograd (ven.: Зеленогра́д, sana sanha «vihand lidn») om Venäman lidn, mülüb Moskvha Zelenogradan administrativižeks ümbrikoks.

Istorii

Nügüdläižen eländpunktan formaline aluz om pandud vn 1958 3. päiväl keväz'kud NSTÜ:n Ministrišton Nevondkundan käsköl kuti Moskvan kaimdailidn tekstil'tegimišton, pörütügiden i časuiden tegimen sirdandan Moskvaspäi täht. Zavottihe lidnan sauvondad vl 1960. Vl 1962 vajehtihe lidnan projektan koncepcijad, i sauvoškanzihe Zelenogradad elektronižen tegimišton keskuseks.

Zelenograd šingotase elektronižen tegimišton kaikenvuiččil edheotandoil — elektronik fizižiden i tegimištoližiden kulutajiden, kosmosan i medicinan täht, elektronižmašiništon i komponentoiden tehmine, elektronikan tedoinstitutad, mugažo leibtegim i zell'fabrik ratas.

Geografijan andmused

Zelenogradan administrativine ümbrik Moskvan kartal (2025)

Lidn sijadase Moskv-regionan lodehes, Shodn'-jogen randoil (ven.: Схо́дня, Moskv-jogen oiged ližajogi), mecan keskes (8,76 km² lidnan südäimes).

Matkad Moskvan keskuzpalaspäi om nell'kümne kilometrad lodeheze orhal vai 45 kilometrad avtotedme, Leningradan mantedme tobjimalaz, 20 km Moskvan rengazavtotespäi. Lähembaine lidn om Himki (Moskvan agj) vižtoštkümnes kilometras suvipäivnouzmha.

Tobmuz

Zelenograd om administrativižen ümbrikon üks'jäižeks eländpunktaks. Vspäi 1991 jagase videks municipaližeks ühtnikaks: Matuškino, Savölkid, Vanh Krükovo, Silino, Krükovo.

Eläjad

Vn 2010 Venäman rahvahanlugemižen mödhe lidnan eläjiden lugu oli 221 712 ristitud. Kaik 239 861 ristitud elihe lidnas vl 2017. Kaikiš suremb lidnan ristitišt om nügüd'.

Ortodoksižen hristanuskondan kümne pühäpertid oma saudud lidnas: kuz' jumalanpertid i nell' časounäd. Baptizman loičendpert' om avaitud. Mormoniden pühäpert' om sätud.

Openduz

Lapsiden opendusen aluzkundad oma päivkodid, keskškolad.

Professionaližen opendusen aluzkundad oma politehnine kolledž nomer 50, medkolledžan nomer 7 filial, «Moskvan elektronižen tehnikan institut»-tedoiduzuniversitet (alusenpanend 1965, 4,8 tuh. üläopenikoid vl 2021), Moskv-lidnan pedinstitutan Zelenogradan palakund (Azjaližen administriruindan institut).

Transport

Üntenzoitajad Moskvan päpalanke transportsoned (2015)

Avtobusad (26 maršrutad) oma kundaližeks transportaks lidnas. Om avtobusühtenzoitust lähižidenke suridenke eländpunktoidenke i Moskvan päpalanke.

Lidn ühtenzoitase Moskvan päpalanke nenil teil: Leningradskoje-mante (federaline M10-trass), Pätnickoje-mante, maksline federaline M11-trass, Oktäbrin raudte (Krükovo-stancii, Leningradan päraudtestancijaspäi) i sen paloin Moskvan kiruhdiametr nomer 3.

Galerei

• 
  Zelenogradan administrativižen ümbrikon prefekturan sauvuz (ezimal, 2010)
• 
  Ph. Mikulai-čudonsädajan jumalanpert', vn 2009 nägu
• 
  Mikron-tegimen päofis vl 2024 (tagamal)
• 
  «Moskvan elektronižen tehnikan institut»-tedoiduzuniversitet (kül'mku 2023)
• 
  «Zelenograd»-kul'turkeskuz Keskuztorgul (2015)
• 
  Passažirine Krükovo-raudtestancii rekonstrukcijan al vn 2022 sügüz'kus

Irdkosketused

• Zelenograd-lidnan-ümbrikon prefekturan oficialine sait (zelao.mos.ru). (ven.)