Stupino

Stupino
Ступино

Lidnanznam	Flag
Valdkund	Venäma
Eläjiden lugu (2024)	63,506 ristitud
Pind	35,5 km²
Telefonkod	+7−4966-xx-xx-xx
Avtokod	50, 90, 150, 190, 750
Aigvö	UTC+3 (MSK+0)

Stupino (ven.: Сту́пино) om Venäman lidn Moskvan agjan suves. Se om Stupino-lidnümbrikon (edel vn 2017 heinkud — rajonan) administrativižeks keskuseks i üks'jäižeks lidnaks.

Istorii

Eländpunktan aluz om pandud vl 1507 kuti Stupinskii počinok-külä, möhemba Stupino-külä. Sauvoškanzihe Elektrovoz-radnikžilod («elektrovedim») vll 1934−1938, no nevondkundaline tobmuz päti šingotada puruvedimid, i sauvond oli udesprofiliruidud tehmaha lendimiden paloid. Radnikžilo sai lidnan statusad nügüdläiženke nimenke vn 1938 17. päiväl kezakud. Stupino oli alištunu agjan tobmudele oikti vll 1939−2001 i oli sauptud lidnaks vhesai 1991.

Stupino šingotase sömtegimištol (maidkombinat, leibänkombinat, konditerižen «Mars»-kompanijan tegimed), sauvondmaterialiden pästandal (raudbetontegesed, kuivad segoitused, keramine apakut, lämuzizoläcii, špalerad), aviamašiništon tegimil i mujumetallurgijan kompanijal, kodihimijan, gigijenan i stökolplastikan tegimil, mugažo alüminiiastjoiden, paličikoiden i pakuitesen edheotandoil.

Geografijan andmused

Stupino-lidnümbrikon sijaduz agjas vn 2014 kartal

Lidnümbrikon kart (2014)

Lidn sijadase lidnümbrikon suves, Okan hural randpolel, 185 m ü.m.t. keskmäižel korktusel.

Matkad Tulan agjan röunhasai om kümne kilometrad suvipäivlaskmha orhal. Matkad Moskvan röunhasai (Moskvan rengazavtotehesai) om kahesakümne kahesa kilometrad pohjoižhe-lodeheze orhal, avtotel vai raudtel. Lähembaine lidn om Kašir ani suvipäivnouzmha Okan oiktal randal.

Stupino-raudtestancii radab lidnan pohjoižes vspäi 1900, koume seižutezpunktad om lidnas mugažo. «Don»-mante (M4-trass) mäneb kahtes kilometras päivlaskmha lidnaspäi. Stupino (Krutiški)-sodalendimport om tomha jüguid.

Eläjad

Vl 1939 lidnan ristitišt oli 18 980 eläjad, vl 1959 — 45 295 eläjad. Vn 2010 Venäman rahvahanlugemižen mödhe lidnan eläjiden lugu oli 66 816 ristitud, rajonan koume videndest, vn 2021 — 64 412 ristitud. Kaik 66 341 eläjad oli lidnas vl 2017. Kaikiš suremb lidnan ristitišt oli 72..74 tuhad eläjid vll 1982−1992 (74 476 rist. vl 1989).

Rahvahad (ozutadud rahvahudenke vl 2010): venälaižed — 95,6 %, ukrainalaižed — 1,3 %, toižed rahvahad — 3,1 %.

Ortodoksižen hristanuskondan üks'toštkümne pühäpertid oma kaičenus i saudud lidnas: Eläban Eziauguižen Stroican Belopesockii-naižjumalankodi (aluz om pandud vl 1498) ühtennimiženke päjumalanpertinke i koumenke jumalanpertinke, koume tošt jumalanpertid i nell' časounäd.

Openduz

Lapsiden opendusen aluzkundad oma ühesa nimitadud i nomeruidud päivkodid (nomer 2, 4, 6, 8, 9, 14, 21, 23, 28), kuz' keskškolad (nomer 1 (nell' adresad), 2 (koume adresad i kaks' nimitadud päivkodid), 4 (nell' adresad i päivkodi), 5 (i kaks' päivkodid), 8 (i koume päivkodid), 9 (i koume päivkodid)), kaks' liceid (nomer 1 i 2 i niiden kuz' školanedelišt palakundad), kaks' korrekcišt školad (nomer 10 i škol-internat), ümbrikon lapsiden sädamižen pert', Stupinon čomamahtoiden škol, olimpižen varan sportškol Vsevolod Bobrovan nimed.

Professionaližen opendusen aluzkundad oma Stupinon tehnikum, Moskvan agjan medicinižen kolledžan filial (ende medkolledžan nomer 1), Moskvan üläopendusen aluzkundoiden koume filialad.

Galerei

• 
  Lidnümbrikon tobmuden sauvuz (2021)
• 
  Vanh lidn i Stupinon GRES taivhanröunal vl 2012
• 
  Eläban Eziauguižen Stroican Belopesockii-naižjumalankodi, vn 2016 nägu
• 
  «Ibis»-adivpert' vl 2021
• 
  Lendimport vl 2014
• 
  Läžundkodi territorijanke (vn 2012 olend)
• 
  Stupino-raudtestancii vl 2009

Irdkosketused

• Lidnümbrikon tobmuden sait (stupinoadm.ru). (ven.)