Kurovskoje

Kurovskoje
Куровское

Lidnanznam	Flag
Valdkund	Venäma
Eläjiden lugu (2024)	19,890 ristitud
Pind	9 km²
Telefonkod	+7−4964-xx-xx-xx
Avtokod	50, 90, 150, 190, 750
Aigvö	UTC+3 (MSK+0)

Kurovskoje (ven.: Куровско́е) om Venäman lidn da raudtesol'm Moskvan agjan päivnouzmas. Mülüb Orehovo-Zujevon lidnümbrikho, sen koumanz' surtte lidn nelläspäi.

Istorii

Eziauguižed eländpunktad oliba lidnan tahondas kiviaigan völ. Kurovskoi-počinok oli olmas 16. voz'sadal.

Nügüdläine eländpunkt mainitase ezmäižen kerdan vl 1646 kuti Kurovskai-külä (ven.: деревня Куровская). Se šigotaškanzihe 19. voz'sadan keskes bumagkanghiden tehmižel. Vl 1890 saudihe «Orehovo-Zujevo — Jegor'jevsk»-raudtekeskust läz küläd. Vl 1913 «Moskv — Kazan'»-raudte mäni külänno Kurovskai-stancijanke. Vodele 1929 letihe ut kezerduzfabrikad. Sid' melanžlangan kombinat radaškanzi. Vll 1929−1959 žilo oli Kurovskajan rajonan keskuseks. Oli radnikžiloks vspäi 1931. Sai lidnan statusad nügüdläiženke nimitusenke vl 1952. Kezerduzfabrik om likvidiruidud vl 2000.

Kurovskoje šingotase sömtegimištol (lihapol'fabrikatad, makaronad) i erazvuiččel torguindal. Polikarbonatlehtesiden edheotand radab enččen kudondfabrikan sijas (oli vhesai 2000).

Geografijan andmused

Orehovo-Zujevon lidnümbrikon röunad vn 2019 sulakuspäi i sijaduz agjas

Lidn sijadase lidnümbrikon suvipäivlaskmas, Nerskai-jogen molembil randoil (ven.: Не́рская 92 km pitte, Moskvanjogen hura ližajogi), 121 m ü.m.t. keskmäižel korktusel.

Matkad Moskvhasai om ühesakümne kilometrad päivlaskmha, lidnümbrikon Orehovo-Zujevo-keskushesai om 29 km pohjoižhe. Toižed lähembaižed lidnad oma Likino-Dulövo vižtoštkümne kilometrad pohjoižhe i Jegor'jevsk 23 km suvhe-suvipäivnouzmha. Moskvan Suren avtorenghan pala (A108-mante) om lidnan päivlaskmaižeks röunaks. Kurovskai-raudtestancii radab lidnan suves.

Tobmuz

Vhesai 2018 Kurovskoje oli rajonan lidnankundan üks'jäižeks eländpunktaks. Lidnankundan pind oli 19,57 km².

Eläjad

Vl 1939 žilon ristitišt oli 11 422 eläjad, vl 1959 lidnan — 16 350 eläjad. Vn 2010 Venäman rahvahanlugemižen mödhe lidnan eläjiden lugu oli 21 819 ristutud (kaikiš suremb ristitišt), rajonan (nüg. lidnümbrik) üks'toštkümnendez, vn 2021 — 19 857 ristitud. Kaik 21 089 eläjad oli lidnas vl 2017.

Rahvahad (ozutadud rahvahudenke vl 2010): venälaižed — 94,1 %, toižed rahvahad — 5,9 %.

Ortodoksižen hristanuskondan kuz' pühäpertid oma avaitud lidnas: Spasan Toižetamižen Guslickii-mez'jumalankodi (vspäi 1859, Spasan Toižetamižen päjumalanpertinke i kahtenke jumalanpertinke), ph. Jurgii-vägestusenkandajan časoun', Spasan Toižetamižen jumalanpert' i vanhuskolaižiden Ioann Lestouknikan jumalanpert'.

Openduz

Lapsiden opendusen aluzkundad oma nell' päivkodid (nomer 3, 30, 65, raudteiden privatine nomer 44) i školanedeližed gruppad — školoiden palakundad, koume keskškolad (nomer 1, 2, 6), gimnazii, lapsiden sädamižen Otkritije-keskuz («Avaiduz»), muzikškol, ümbrikon «Legion»-sportškolan (Orehovo-Zujevo) alajaguz.

Orehovo-Zujevon tehnikuman (baziruiše Likino-Dulövos) Kurovskojen alajaguz om lidnan professionaližen opendusen aluzkundaks.

Galerei

• 
  Znam lidnan röunal Moskvan Suren avtorenghan teverenno (2016)
• 
  Spasan Toižetamižen Guslickii-mez'jumalankodi, vn 2007 nägu
• 
  Kurovskojen kul'turkeskuz (vn 2009 olend)
• 
  Lidnan sportpert'kulu (2009)
• 
  Avtostancii vl 2009
• 
  Kurovskai-raudtestancii vl 2016

Irdkosketused

• Territorialižed ohjanduzkundad Orehovo-Zujevon lidnümbrikon oficialižel ozmo.ru-saital. (ven.)