Visokovsk

Visokovsk
Высоковск

Lidnanznam	Flag
Valdkund	Venäma
Eläjiden lugu (2024)	12,971 ristitud
Pind	4 km²
Telefonkod	+7−49 624−6-xx-xx
Avtokod	50, 90, 150, 190, 750
Aigvö	UTC+3 (MSK+0)

Visokovsk (ven.: Высо́ковск) om Venäman lidn Moskvan agjan lodehes. Mülüb Klinan lidnümbrikho.

Istorii

Eländpunktan aluz om pandud vl 1864. Šingotaškanzihe kanghiden manufaktural vspäi 1877. Kätihe Visokovskii-radnikžiloks vl 1928. Se sai lidnan statusad nügüdläiženke nimitusenke vl 1940. Lidn oli okkupiruidud nacistižen Germanijan sodavägil Toižen mail'man sodan aigan vl 1941 (25. kül'mku — 16. tal'vku), manufaktur oli muretud lujas. Visokovskan rajon oli olmas vll 1939−1957, i lidn oli sen keskuseks. Vl 2009 tekstil'tegim tuli bankrotnendannoks i lopi radod, sauvused oma okaidud.

Visokovsk šingotase sauvondmaterialiden pästandal (metalližed konstrukcijad, asfal'ttegim), čomitesiden tegimel Uden Voden kuzen täht, leibän edheotandal.

Geografijan andmused

Lidn sijadase lidnümbrikon keskuzpalas, Väz-jogen randal (ven.: Вяз, Volgan üläjoksmusen oigedpol'ne bassein), 200 m ü.m.t. keskmäižel korktusel.

Matkad Tverin agjhasai om kaks'kümne kilometrad lodeheze orhal. Matkad Moskvan röunhasai (Moskvan rengazavtotehesai) om 92 km suvipäivnouzmha orhal, avtotel vai raudtel. Lähembaine lidn om Klin üks'toštkümne kilometrad päivnouzmha orhal, avtotedme vai raudtedme.

Ühtennimine Visokovsk-raudtestancii om kümnekilometrižen sarakon Klinaspäi lopstancijaks. Maksline «Neva»-mante (M11-trass) mäneb vides kilometras päivnouzmha lidnaspäi.

Tobmuz

Vll 2005−2017 lidn oli Visokovskan lidnankundan administrativižeks keskuseks. Lidnankundan pind oli kümne nellikkilometrad.

Eläjad

Vl 1897 žilon ristitišt oli 3 700 eläjad, vl 1939 — 11 485 eläjad. Vn 2010 Venäman rahvahanlugemižen mödhe lidnan eläjiden lugu oli 10 635 ristitud, rajonan (nüg. lidnümbrik) üks'toštkümnendez, vn 2021 — 13 081 ristitud. Kaik 10 671 eläjad oli lidnas vl 2017. Kaikiš suremb lidnan ristitišt oli 12 230 eläjad vl 1970 i om nügüd', läz 13 tuhad eläjid vspäi 2021.

Rahvahad (2010): venälaižed — 95,7 %, ukrainalaižed — 1,1 %, toižed rahvahad — 3,2 %.

Ortodoksižen hristanuskondan üks'jäine Oleksii-carinpoigan jumalanpert' om avaitud lidnas vspäi 2000.

Lapsiden opendusen aluzkundad oma nell' nimitadud i nomeruidud päivkodid (nomer 18, 20, 21 i Ogonök «lämoihut»), keskškol nomer 1 (nomerad 4 ei ole vn 2021 sügüz'kuspäi), čomamahtoiden škol, üks'borcuindoiden škol (Klinan olimpižen varan sportškolan filial). Lähembaižed professionaližen opendusen aluzkundad ratas lidnümbrikon Klin-keskuses.

Galerei

• 
  Rahvahanpertin istorine sauvuz (2017)
• 
  Lidnan kezerduzkudondfabrikan sauvuz vl 2013 (manufakturan istorine muštnik)
• 
  Lidnan škol (2013)

Irdkosketused

• Informacii lidnas lidnümbrikon tobmuden aluzkundoiden oficialižel klincity.ru-saital. (ven.)
• Lidnan informacine portal (vysokovsk.narod.ru). (ven.)