Tverin agj

Vikipedii
Hüpähtada: navigacii, Ecind
Tverin agj
Тверская область
Tverin agjan flag Tverin agjan znam
Tverin agjan flag Tverin agjan znam
Map of Russia - Tver Oblast.svg
Pälidn Tver'
Pind

- Ühtes
- saum vezid (%).

38-nz'

84 201 km²
1,9

Eläjiden lugu

- Kaik
- Sageduz

37-nz'

1 315 071 ristitud (2015)
15,62 rist./km²

Federaline ümbrik Keskuzline
Venäman ekonomine region Keskuzline
Gubernator Andrei Ševelöv
Ohjastusen ezimez' hän-žo
Käskusenandajan Suiman ezimez' Andrei Jepišin
Avtokod 69
Aigvöd UTC+3 (MSK+0)

Tverin agj (ven.: Тверская область) om Venälaižen Federacijan subjekt (agj).

Se mülüb Federaližhe keskuzümbrikho.

Agjan administrativine keskuz da kaikiš suremb lidn om Tver'.

Istorii[redaktiruida | redaktiruida purde]

Tverin agj om olmas vl 1935 vilukun 29. päivälpäi. Vhesai 1992 semendkun 16. päivhäsai sidä nimitihe Kalininan agj:aks.

Tverin agjan Päkäskuz[1] om vahvištadud vl 1996 kül'mkun 5. päiväl agjan Käskusenandajan Suiman ezitajil da om väges äiluguižiden vajehtusidenke.

Geografijan andmused[redaktiruida | redaktiruida purde]

Tverin agjan reljefan kart.

Tverin agj sijadase Päivnouzmaižen Evropan tazangišton keskpalan päivlaskmas. Se vedase pohjoižespäi suvhesai 260 km matkad da päivlaskmaspäi päivnouzmhasai 450 km matkad. Agjan röunaspäi Moskvan ümbärtehesai — 90 km.

Agjal om röunoid Moskvan da Smolenskan agjoidenke suves, Pskovan agjanke päivlaskmas, Uz'lidnan agjanke lodehes, Vologdan agjanke pohjoižes da Jaroslavlin agjanke päivnouzmas. Tverin agj om mererandatoi.

Pind om 84 201 km², sidä kesken mec otab 54%. Kaikiš znamasižembad järved oma Seliger-järv da Brosno-järv. Koumen suren jogen niškad sijadase Valdai-kukhil: Volg-, Päivlaskmpol'ne Dvin- da Dnepr-joged.

Reljef om tazo päivnouzmas. Valdai-ülüz otab agjan päivlaskmašt pol't. Agjan kaikiš korktemb čokkoim om Valdain pä (347 m). Kunj-jogen kendäk om kaikiš madalamb (61 m) Uz'lidnan agjan röunanno agjan pohjoižes.

Klimat om ven kontinentaline, kontinentaližuz ližadab suvipäivlaskmaspäi pohjoižpäivnouzmha. Heinkun keskmäine lämuz om +17...+19°C, vilukun kesklämuz om -6...-10°C. Paneb sadegid 650 mm vodes.

Londuseližed varad oma bur hil', turbaz, sauvondmaterialad (mouckivi, letked, saved), mec, reskvezi.

Tobmuz[redaktiruida | redaktiruida purde]

Agjan gubernatoran da Ohjastusen pert' Tveriš, 2008. semendku.

Agjan pämez' nimitase gubernatoraks. Andrei Vladimirovič Ševelöv radab gubernatoran vs 2011 heinkun 7. päiväspäi[2], agjan Käskusenandajan Suiman ühtnijad panihe händast radnikusele Venäman prezidentan taričendan mödhe. Vl 2016 sügüz'kun 18. päiväl kaik rahvaz änestaškandeb gubernatorad videks vodeks, enamba kaht strokud jäl'geten ei sa. Gubernator om mugažo agjan Ohjastusen ezimez', hän märičeb sen strukturad da paneb sen ühtnijoid radnikusile. Ohjastusen ezmäine varaezimez' da viž Ohjastusen muite varaezimest oma hänele abhu.

Tverin agjan üks'kodine parlament om Käskusenandai Suim. Kaik rahvaz valičeb sen 40 ezitajad videks vodeks. Andrei Nikolajevič Jepišin radab Käskusenandajan Suiman ezimeheks vs 2005 tal'vkuspäi kahtenden strokun jäl'geten.

Radonoigendai tobmuz om Tverin agjan Ohjastuz. Agjan ministrused, päohjandused da komitetad alištudas Ohjastusele.

Järgvaličendad Käskusenandajha Suimha oliba vl 2011 keväz'kun 13. päiväl.

Administrativine jagand[redaktiruida | redaktiruida purde]

   Kacu kirjutuz: Tverin agjan administrativiž-territorialine jagand.

Agj kogoneb 7 lidnümbrikospäi da 36 municipaližes rajonaspäi.

Eläjad[redaktiruida | redaktiruida purde]

Vl 2010 kaiken Venäman rahvahanlugemižen mödhe eläjiden lugu oli 1 353 392 ristitud[3]. Kaikutte koumanz' eläi nelläspäi om lidnalaine.

Agjas om kaks'kümne koume lidnad da 30 lidnanvuittušt žilod. Toižed sured lidnad (enamba 40 tuh. eläjidenke, surembaspäi penembha) oma Ržev, Višnii Voločok, Kimri, Toržok da Konakovo. Vl 2015 kaik om 17 eländpunktad enamba mi 10 tuh. eläjidenke.

Rahvahad (enamba 0,4% vl 2010): venälaižed (86,6%), ukrainalaižed (1,1%), armenijalaižed (0,7%), karjalaižed (0,6%), totarlaižed (0,5%), vaugedvenälaižed (0,4%), azerbaidžanlaižed (0,4%), čiganalaižed (0,4%), toižed — 2,0%, rahvahuden ozutandata — 7,3%.

Transport[redaktiruida | redaktiruida purde]

Federaližed avtoted M10 «Venäma» (Moskv — Piter) da M9 «Baltii» (Moskv — Rig) läbitadas agjan. Kovas kattud teiden piduz — 16 032 km.

Läz Tverid om kaks' civilišt lendimportad: rahvahidenkeskeine «Migalovo» (KLD, UUEM) lendahtamiž-ištutandsarganke jüguaviacijan täht 2500 m pitte da «Zmejovo»-punolendimpöud.

Homaičendad[redaktiruida | redaktiruida purde]

  1. Tverin agjan Päkäskusen tekst (constitution.garant.ru). (ven.)
  2. Тверские депутаты наделили Андрея Шевелёва полномочиями губернатора (Tverin agjan deputatad andoihe Ševelövan Andreile gubernatoran valdatusid). — Mediaryazan.ru. — 07.07.2011. (ven.)
  3. Venäman kaikenaigaine ristitišt vl 2010. — Rosstat (gks.ru). (ven.)

Irdkosketused[redaktiruida | redaktiruida purde]

Tobmuz
Toižed


Tverin agjan lidnad
Andreapol' | Belii | Bežeck | Bologoje | Kaläzin | Kašin | Kimri | Konakovo | Krasnii Holm | Kuvšinovo | Lihoslavl' | Nelidovo | Ostaškov | Päivlaskmpol'ne Dvin | Ržev | Staric | Zubcov | Toropec | Toržok | Tver' | Udoml' | Ves'jegonsk | Višnii Voločok