Toržok

Toržok
Торжок
Lidnanznam;	Flag;
Valdkund	Venäma
Eläjiden lugu (2021)	41,116 ristitud
Pind	58,8 km²
Pämez'	Sergei Kulagin; (uhoku 2022—)
Telefonkod	+7−48 251-xx-xxx
Avtokod	69
Aigvö	UTC+3 (MSK+0)

Toržok (ven.: Торжо́к) om Venäman lidn, lidnümbrik da raudtesol'm Tverin agjan keskuses. Se om agjan nellänz' surtte lidn eläjiden lugun mödhe, mugažo Toržokan rajonan administrativižeks keskuseks (ei mülü sihe).

Istorii

Uz'lidnan torgovanad panihe eländpunktan alust 9.-10. voz'sadoiden röunal. Eländpunkt mainitase ezmäižen kerdan Uz'lidnan aigkirjas vl 1139 kuti Uz' Torg (ven.: Новыи търгъ). 13. voz'sadale puine lidnuz oli saudud kivižidenke čuhundusidenke, vl 1742 seinäd paloiba lophu. Vl 1775 Toržok kändihe makundan lidnaks. Istorine pertišt om kaičenus hüvin, kaik om läz nell'sadad mel'heižtahoid. Vodele 2016 19 tohesišt kirješt om löutud lidnas.

Toržokan ižandusen päsarakod oma elektrotehnine tegimišt, mecan ümbriradmine, sömtegimišt i turizm. Mugažo vagonantegim, lämoipalovastaižen da toižen päzutandmašiništon edheotand, poligrafižmujuiden tegim, voižimiden järed tegim (Royal Dutch Shell), vuivodsistemiden tegim da omblendfabrikad oma saudud. Omblendan kuldnitil pramozl om kaičenus.

Geografijan andmused

Lidnan sijaduz rajonas i agjas vn 2000 kartal

Lidn sijadase Tverc-jogen keskjoksmusen molembil randoil (ven.: Тверца́ 188 km pitte, Volgan hura ližajogi), seižub Valdai-ülüden ezikukhil sen päivnouzmas, 165 m ü.m.t. keskmäižel korktusel.

Matkad Tverin keskushesai om 64 km suvipäivnouzmha avtotedme. Lähembaine lidn om Lihoslavl' 35 km päivnouzmha raudtedme.

Tobmuz

Toržok om lidnümbrikon üks'jäižeks eländpunktaks.

Lidnan pämez' om sen Administracijan pämez'. Edeližed lidnan pämehed oma Jurii Gurin (uhoku 2020 — uhoku 2022), Anatolii Rubailo (tal'vku 2011 — eloku 2018). Lidnan Duman ezimez' om Stanislav Doroguš vn 2020 redukuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 47 644 ristitud. Kaik 46 031 eläjad oli lidnas vl 2017. Kaikiš suremb lidnan ristitišt oli 49..50 tuhad eläjid vll 1986−2003 (51 tuh. rist. vl 1987).

Ortodoksižen hristanuskondan 33 pühäpertid^[1] oma kaičenus lidnas: phh. Borisan i Gleban jumalankodi (päjumalanpert', koume jumalanpertid, časoun'), Sündun Eläbzdusen naižjumalankodi (päjumalanpert', jumalanpert', časoun'), Spasan Toižetamižen päjumalanpert', 19 jumalanpertid, kaks' kodijumalanpertid, koume časounäd. Niiden ližaks nell' jumalanpertid i kaks' časounäd ei ole kaičenus.

Lapsiden opendusen aluzkundad oma kaks'kümne päivkodid, aluzškol, ühesa keskškolad, čomamahtoiden škol. Politehnine^[2] (Rosrezerv:an), pedagogine^[3], valdkundaline tegimištoliž-gumanitarine^[4] kolledžad oma lidnan professionaližen keskopendusen aluzkundoikš. Mugažo lendajiden škol da pölvhan tedoinstitut oma olmas.

Transport

Avtobusad, maršruttaksid, taksid i ezilidnelektrojonused oma kundaližeks transportaks lidnas da sen ümbrištos. Raudtestancii om Toržok. Raudted lähttas Rževha, Lihoslavlihe da Soblagoho.

Magistraližed gazanveim i kivivoinveim läbitadas ezilidnad.

Galerei

Toržokan rajonan administracijan sauvuz vl 2017
Sündun Tulendan Jerusalimha jumalanpert' i Spasan Toižetamižen päjumalanpert', vn 2014 nägu
Kaiken Venäman istoriž-etnografine muzei vl 2013
Kul'turkeskuz (2013)
Pölvhan tedoinstitut vl 2019
Toržok-raudtestancii vl 2005

Homaičendad

Irdkosketused

Toržok Vikiaitas

	Tverin agjan lidnad
	Andreapol' \| Belii \| Bežeck \| Bologoje \| Kaläzin \| Kašin \| Kimri \| Konakovo \| Krasnii Holm \| Kuvšinovo \| Lihoslavl' \| Nelidovo \| Ostaškov \| Päivlaskmpol'ne Dvin \| Ržev \| Staric \| Zubcov \| Toropec \| Toržok \| Tver' \| Udoml' \| Ves'jegonsk \| Višnii Voločok

[1] Toržokan pühäpertid sobory.ru-saital. (ven.)

[2] Toržokan politehnižen kolledžan sait (tpkrosreserv.ru). (ven.)

[3] Valdkundaližen Toržokan pedagogižen kolledžan F.V. Badülinan nimed sait (torped.1mcg.ru). (ven.)

[4] Toržokan valdkundaližen tegimištoliž-gumanitarižen kolledžan sait (tgpgk.1mcg.ru). (ven.)

[1]

[2]

[3]

[4]