Lihoslavl'

Lihoslavl'
Лихославль

Lidnanznam
Valdkund	Venäma
Eläjiden lugu (2017)	11,790 ristitud
Pind	16,15 km²
Pämez'	Jevgenii Kotov (2013—)
Telefonkod	+7−48 261-xx-xxx
Avtokod	69
Aigvö	UTC+3 (MSK+0)

Lihoslavl' (ven.: Лихославль) om Venäman lidn da raudtesol'm Tverin agjan keskuses. Se om Lihoslavlin rajonan da lidnankundan administrativižeks keskuseks.

Istorii

Lihoslavl'-usadib mainitase ezmäižen kerdan revizijan nimikirjutesiš vl 1816. Lähevenui Ostaškovo-külä mainitase ezmäižen kerdan Novotoržokan makundan aigkirjas vl 1624. Ühtištuihe raudtestancijad Ostaškovo-külänke vl 1907 udenke nügüdläiženke nimenke erištamha Ostaškov-lidnaspäi. Lihoslavl' sai lidnan statusad vl 1925. Vozil 1937−1939 se oli Karjalan rahvahaližen ümbrikon administrativižeks keskuseks.

Geografijan andmused

Lidn sijadase Kavanjogen oiktal randpolel (2 kilometras, ven.: река Кава, Tverc-jogen hura ližajogi, Volgan bassein), 170 m keskmäižel korktusel valdmeren pindan päl. Pen' Čerömuški-jogi lankteb Lihoslavlin järvhe ani lidnan päivnouzmaižen röunan taga, järv om ratud vl 1906. Matkad Tverin röunhasai om 40 km lodeheze orhal vai 45 km avtotedme. Lähembaine lidn om Toržok 35 km päivlaskmha orhal.

Koume pen't eländpunktad mülüdas lidnankundha Lihoslavlin ližaks.

Eläjad

Vn 2010 Venäman rahvahanlugemižen mödhe lidnan eläjiden lugu oli 12 257 ristitud, lidnankundan — 12 730 ristitud, rajonan ristitišton nell' ühesandest. Kaikiš suremb lidnan ristitišt oli vozil 1989−2001, enamba 13 tuhad eläjid (13 449 rist. vl 1989).

Ortodoksižen hristanuskondan Ph. Jumalanmaman Emäganpäivän pühäpert' om olmas lidnas.

Ižanduz da transport

Ižandusen päsarakod oma elektrotehnine tegimišt (pidatezarmatur) da sömtegimišt, mugažo avtoradiatoriden tegim da čomamahtkeramiktegesiden tegim oma olmas. Professionaližen opendusen aluzkundad: profškol i Toržokan pedagogižen kolledžan filial.

Lihoslavl'-raudtestancii om Moskv — Piter raudtel vspäi 1850 (vll 1897−1902 Novotoržskai, edel nimi oli Ostaškovo), sarak Toržokha om olmas vspäi 1870. Ezilidnelektrojonused ühtenzoittas lidnad Bologojenke, Tverinke i Moskvanke. Kaks'kümnekilometrine sarak tuleb lidnha suves Moskv — Piter avtotespäi.

Galerei

• 

  Lihoslavlin rajonan administracijan sauvuz (2010)

• 

  Jumalanmaman Emäganpäivän pühäpert', vn 2021 nägu

• 

  Karjalan rahvahaline kodirandantedištandmuzei (2021)

• 

  Škol nomer seičeme (2010)

• 

  Lihoslavl'-päraudtestancii vl 2006

Irdkosketused

• Lidnan sijaližen tobmuden aluzkundoiden oficialine sait (admlihoslavl.ru). (ven.)