Ves'jegonsk

Ves'jegonsk
Весьегонск
	Lidnanznam;
Valdkund	Venäma
Eläjiden lugu (2021)	6,330 ristitud
Pind	10,08 km²
Telefonkod	+7−48 264-xx-xxx
Avtokod	69
Aigvö	UTC+3 (MSK+0)

Ves'jegonsk (ven.: Весьего́нск vai Весьёгонск) om Venäman lidn Tverin agjan pohjoižpäivnouzmas. Se om Ves'jegonskan ümbrikon (edel 2019. vot — rajonan) administrativine keskuz.

Istorii

Eländpunkt mainitase ezmäižen kerdan vl 1564 kuti Ves' Jogonskai-žilo (ven.: село Весь Ёгонская). 16.-19. voz'sadoil rahvahidenkeskeižen torguindan znamasine keskuz, sai lidnan statusad vl 1776 nügüdläiženke nimenke (Ves'jögonsk variantaks). 19. voz'sadan keskes Tihvinan vezisisteman olend tuli lophu, i vl 1885 vaiše 2629 ristitud elihe lidnas. Ves'jegonskan koume nelländest oli upotadud Ribinskan vezivaradimen täutmižen aigan (1941−1947), lidn om sirtud ülembile korktusile.

Ves'jegonsk šingotase valdkundaližil holitišil. Tegimišton sarakod oma mecan ümbriradmine (pumaterialiden varhapanend i pilindmaterialad) da sömtegimišt (vintegim^[1]). Ende leibtegim i lihan ümbriradmižen edheotand radoiba mugažo.

Geografijan andmused

Lidnan sijaduz ümbrikos i agjas vn 2006 kartal

Lidn sijadase ümbrikon päivnouzmas, sokhas tahondas, Ribinskan vezivaradimen Mologan lahten suvipäivlaskmaižel randal, seižub 108 m ü.m.t. keskmäižel korktusel. Darvinan kel'dtaho sijadase kümnes kilometras päivnouzmha lidnaspäi.

Matkad Tverihesai om 216 km suvipäivlaskmha orhal vai 247 km avtotedme. Lähembaine lidn om Ustüžn (Vologdan agj) 52 km lodeheze orhal, järed lidn — Čerepovec 64 km pohjoižpäivnouzmha orhal vai 185 km avtotedme.

Klimat om ven kontinentaline. Voden keskmäine lämuz om +4,9 C°, kezakun-elokun +16..+19 C°, tal'vkun-uhokun −5..−8 C°. Paneb sadegid 720 mm vodes, enamba kezakus-elokus (78..89 mm kus), vähemba uhokus-sulakus (40 mm kus).

Tobmuz

Ves'jegonsk oli lidnankundan üks'jäižeks eländpunktaks.

Edeline lidnan pämez' oli Vladimir Komarov vspäi 2013.

Eläjad

Vn 2010 Venäman rahvahanlugemižen mödhe lidnan eläjiden lugu oli 7 329 ristitud, rajonan ristitišton viž ühesandest, vn 2021 — 6 330 ristitud. Kaik 6 280 eläjad oli lidnas vl 2017. Kaikiš suremb lidnan ristitišt oli 9 700 eläjad vl 1992.

Rahvahad (enamba 0,4 % vl 2021): venälaižed — 97,7 %, toižed rahvahad — 1,7 %, rahvahuden ozutandata — 0,6 %.

Ortodoksižen hristanuskondan viž pühäpertid^[2] oma kaičenus i saudud lidnas: koume pühäpertid i kaks' časounäd. Niiden ližaks Jumalannägundan päjumalanpert' (oli saudud vll 1742−1758) i koume časounäd ei ole kaičenus.

Lapsiden opendusen aluzkundad oma päivkodid, keskškol. Bežeckan tegimištoliž-ekonomižen kolledžan filial om lidnan professionaližen keskopendusen aluzkundaks.

Transport

Avtobusad oma kundaližeks transportaks lidnas, ned-žo ühtenzoittas Ustüžnanke, Tverinke i Moskvanke. Ves'jegonsk-raudtestancii om «Kiriši — Kaläzin»-keskustan sarakon lopstancijaks vspäi 1919.

Sezonine jogiport oleskeleb lidnas. Nevondkundaližen aigan olnu lendimpöud om tactud.

Galerei

Municipaližen ümbrikon administracijan sauvuz (2020)
Eläban Eziauguižen Stroican jumalanpert', vn 2016 nägu
Ves'jegonskan vintegim vl 2016
Ves'jegonsk-raudtestancii vl 2006
Jogivaldmad vl 2016

Homaičendad

Irdkosketused

Ves'jegonskan istorii municipaližen ümbrikon oficialižel saital (весьегонский-округ.рф). (ven.)

Ves'jegonsk Vikiaitas

	Tverin agjan lidnad
	Andreapol' \| Belii \| Bežeck \| Bologoje \| Kaläzin \| Kašin \| Kimri \| Konakovo \| Krasnii Holm \| Kuvšinovo \| Lihoslavl' \| Nelidovo \| Ostaškov \| Päivlaskmpol'ne Dvin \| Ržev \| Staric \| Zubcov \| Toropec \| Toržok \| Tver' \| Udoml' \| Ves'jegonsk \| Višnii Voločok

[1] Ves'jegonskan vintegimen sait (creative-wine.ru). (ven.)

[2] Ves'jegonskan pühäpertid sobory.ru-saital. (ven.)

[1]

[2]