Kimri

Kimri
Кимры

Lidnanznam	Flag
Valdkund	Venäma
Eläjiden lugu (2021)	40,875 ristitud
Pind	44 km²
Telefonkod	+7−48 236-xx-xxx
Avtokod	69
Aigvö	UTC+3 (MSK+0)

Kimri (ven.: Ки́мры) om Venäman lidn Tverin agjan suvipäivnouzmas. Se om agjan videnz' lidn eläjiden lugun mödhe, om Kimrin ümbrikon (edel vn 2022 semendkud — rajonan) administrativižeks keskuseks da palaks.

Istorii

Eländpunkt mainitase ezmäižen kerdan Ivan Grazijan kirjeižes vl 1546 kuti Kimr-žilo (ven.: село Кимра). Se šingotihe kengiden (sapkoiden) tehmižel, pästtihe severz'-se millionid paroid vodes. Vl 1859 luja lämoipalo pani puišt pertištod mantazole, udessaudihe kahtes vodes.

Vspäi 1902 raudte ühtenzoitab lidnad Moskvanke, Savölovo-stancii sijadase Volgan oiktal randal, om nimitadud enččen lähižen külän mödhe. Kimri sai lidnan statusad vn 1917 kezakus. Läz sadad kivišt i puist torgovaništon pertid om kaičenus lidnas.

Kimrin ižandusen päsarakod oma tömašintegimišt, sauvondmaterialiden tehmine (mecan ümbriradmine, bazal'tkuid), kebn tegimišt (koume keng'fabrikad i kaks' trikotažfabrikad), turizm.

Geografijan andmused

Lidnan sijaduz ümbrikos i agjas vn 2006 kartal

Lidn sijadase ümbrikon suvipäivnouzmas, Volgan (Ugličun vezivaradim) molembil randoil i sen huran Kimark-ližajogen randoil (ven.: Кимрка (Кимарка) 32 km pitte), istorine keskuz — Volgan hural randal, 219 m ü.m.t. keskmäižel korktusel.

Matkad Tverihesai om 87 km päivlaskmha orhal vai 101 km avtotedme. Lähembaižed lidnad oma Taldom (Moskvan agj) 20 km suvipäivnouzmha i Dubn (Moskvan agj) kümnes kilometras suvipäivlaskmha vai Volgan ülezjogen. Avtotesild ühtenzoitab Volgan randoid vspäi 1978.

Tobmuz

Vll 2005−2022 Kimri sädi erigoittud lidnümbrikod i oli sen üks'jäižeks eländpunktaks.

Lidnümbrikon tobmuden pämez' oli sen Administracijan pämez'. Lidnan jäl'gmäižed pämehed oliba Andrei Lukjanov vn 2022 tal'vkuspäi, Irina Balkovaja (uhoku 2020 — tal'vku 2022). Lidnümbrikon Duman ezimez' oli Alla Aleksejeva vn 2022 redukuspäi. Edeline Duman ezimez' om Dmitrii Krivčikov (tal'vku 2019 — reduku 2022).

Eläjad

Vn 2010 Venäman rahvahanlugemižen mödhe lidnan eläjiden lugu oli 49 628 ristitud, vn 2021 — 40 875 ristitud. Kaik 45 504 eläjad oli lidnas vl 2017. Kaikiš suremb lidnan ristitišt oli 58..61 tuhad eläjid vll 1973−2001 (61 800 rist. vl 1992).

Rahvahad (enamba 0,4 % vl 2021): venälaižed — 91,3 %, armenijalaižed — 0,7 %, azerbaidžanlaižed — 0,5 %, totarlaižed — 0,4 %, toižed rahvahad — 2,9 %, rahvahuden ozutandata — 4,2 %.

Ortodoksižen hristanuskondan seičeme pühäpertid oma kaičenus i saudud lidnas: Spasan Toižetamižen päjumalanpert' (1911), Sündun Voznesen'jan jumalanpert' (om letud 1813−1829), phh. Zaharijan i Jelisavetan jumalanpert' Savölovos, kodipühäpert', koume časounäd. Niiden ližaks kaks' päjumalanpertid i jumalanpert' oma pandud mantazole. Baptizman loičendpert' om avaitud.

Lapsiden opendusen aluzkundad oma koumetoštkümne nimitadud i nomeruidud päivkodid (nomer 1, 2, 4..6, 9, 19, 20, 24, 25, 28, 50, «Tähthaine»), seičeme keskškolad (nomer 1, 4, 5, 11, 13, 14, 16), kaks' gimnazijad (nomer 2 kahtenke adresanke i «Logos»), keskškolan nomer 5 filial (korrekcine), koume čomamahtoiden školad (nomer 1, 2, 3), sädamižen i norišton šingotesen keskuz I.A. Pankovan nimed (koume adresad). Kimrin kolledž, Kimrin medicinine kolledž i Savölovon kolledž oma lidnan professionaližen opendusen aluzkundoikš.

Galerei

• 
  Sportkompleks «Sputnik»-stadionanno (2011)
• 
  Sündun Voznesenjan jumalanpert', vn 2014 nägu
• 
  Savölovon mašinansauvomižen tegim vl 2011
• 
  Draman i komedijan teatr (2021)
• 
  Savölovo-raudtestancijan sauvuz vl 2019

Irdkosketused

• Kimrin municipaližen ümbrikon tobmuden sait (adm-kimry.ru). (ven.)