Krasnii Holm

Krasnii Holm
Красный Холм

Lidnanznam
Valdkund	Venäma
Eläjiden lugu (2020)	4,983 ristitud
Pind	13,22 km²
Telefonkod	+7−48 237-xx-xxx
Avtokod	69
Aigvö	UTC+3 (MSK+0)

Krasnii Holm (ven.: Кра́сный Холм «čoma kukkaz») om Venäman lidn da lidnankund Tverin agjan pohjoižpäivnouzmas. Se om Krasnii Holman ümbrikon (edel vn 2020 semendkud — rajonan) administrativine keskuz.

Istorii

Eländpunkt mainitase ezmäižen kerdan vl 1518 jumalankodin Spas Holmal-torguindžiloks (ven.: село Спас на Холму). Se sai makundan lidnan statusad vl 1776 udenke nimenke. Vl 1899 saudihe ühtennimišt raudtestancijad žilho, sarakon lopstancijad «Bologoje — Ribinsk»-jonospäi.

Krasnii Holm šingotase elektromehanižel tegimel (seifad i varmitadud škapad oružjan täht, mangalad, ende vezifil'trad armijan täht) i mebel'fabrikal (ištmed).

Geografijan andmused

Lidnan sijaduz ümbrikos i agjas vn 2006 kartal

Lidn sijadase ümbrikon suvipäivlaskmas, Neledin-jogen randoil (ven.: Неледина, Mologan i Volgan bassein), 150 m ü.m.t. keskmäižel korktusel. Neledin lankteb Mogoč-jogehe (ven.: Могоча) ani lidnan röunan taga.

Matkad Tverihesai om 176 km suvipäivlaskmha avtotedme. Lähembaine lidn om Bežeck 40 km suvipäivlaskmha avtol.

Tobmuz

Neledino-žilo (327 rist. vl 2010) i Gluncovo-külä (167 rist. vl 2010) mülüiba lidnankundha Krasnii Holman ližaks. Lidnankundan pind oli 13,93 km².

Lidnankundan pämez' oli Nina Gribova vn 2013 sügüz'kuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 5 608 ristitud, lidnankundan — 6 102 ristitud, rajonan viž ühesandest. Kaik 5 234 ristitud elihe lidnas i 5 710 ristitud kaikes lidnankundas vl 2017. Kaikiš suremb lidnan ristitišt oli 7 900 eläjad vl 1992.

Ortodoksižen hristanuskondan koume pühäpertid oma kaičenus i saudud lidnas: kaks' jumalanpertid i časoun'. Üks' kellčuhunduz (1870) jäi lidnan Stroican päjumalanpertišpäi (rušihe vl 1930). Spasan Toižetamižen päjumalanpert' om pandud mantazole. Ph. Antonii Krasniiholmalaižen mez'jumalankodi (vspäi 1461) om muretud lujas, sijadase ühtes kilometras lidnaspäi, vspäi 2017 puine časoun' radab siš.

Lapsiden opendusen aluzkundad oma päivkodi, keskškol. Krasnii Holman kolledž om lidnan professionaližen opendusen aluzkundaks.

Galerei

• 
  Policijan palakund (2019, ende Lapšin-torgovanan pert')
• 
  Ph. Mikulain päjumalanpertin ruinad vl 2012 (oli saudud vll 1481−1493, kaikiš amuižemb agjas)
• 
  Torguindrived vl 2019
• 
  Municipaližiden aluzkundoiden pert': ristitišton otmižen keskuz, rajonan prokuratur (2019, ende Jefimov-torgovanan pert')
• 
  Krasnii Holm-päraudtestancii vl 2018

Irdkosketused

• Lidnan i Krasnii Holman ümbrikon tobmuden sait (krholm.ru). (ven.)
• Enččen lidnankundan tobmuden sait (krholm-adm.ru). (ven.)