Bežeck

Bežeck
Бежецк
Lidnanznam;	Flag;
Valdkund	Venäma
Eläjiden lugu (2021)	21,466 ristitud
Pind	17 km²
Telefonkod	+7−48 231-xx-xxx
Avtokod	69
Aigvö	UTC+3 (MSK+0)

Bežeck (ven.: Бе́жецк) om Venäman lidn Tverin agjan pohjoižpäivnouzmas. Se om Bežeckan ümbrikon (edel vn 2023 sulakud — rajonan) administrativižeks keskuseks da palaks.

Istorii

Eländpunkt mainitase vspäi 1137 kuti Bežeckii Verh (ven.: Бежецкий Верх) vai Bežiči (ven.: Бежичи) Uz'lidnan aigkirjas, se oli olmas 20 km pohjoižhe nügüdläižes lidnaspäi. Vl 1272 Tverin Svätoslav Jaroslavič-ruhtinaz mureni Bežičid, i sirtihe pätinan keskust Gorodeck-lidnushe (ven.: крепость Городе́цк). Vl 1766 udesnimitihe sidä Bežeckaks, sai lidnan statusad vl 1775, kändihe makundan keskuseks vl 1796.

«Bologoje — Ribinsk»-raudtejono läbiti Bežeckad vl 1876. Vll 1935−1990 lidn alištui agjan tobmudele oikti.

Bežeck šingotase mobiližiden buraudamižmašinoiden tehmižel i mašiništon pästandal (kompressorad^[1], kuivatimed, letevaluapparatad, maižanduzmašinad^[2]), mugažo raudbetonantegim^[3] i maidtegim ratas lidnas.

Geografijan andmused

Lidnan sijaduz ümbrikos i agjas vn 2006 kartal

Lidn sijadase ümbrikon keskuzpalan päivnouzmas, 145 m ü.m.t. keskmäižel korktusel. Molog-jogi läbitab lidnad suvespäi pohjoižhe, Ostrečin-jogi (ven.: Остречина 52 km pitte) lankteb sihe oiktalpäi Bežeckan territorijal.

Matkad Tverihesai om 126 km suvipäivlaskmha. Lähembaine lidn om Krasnii Holm 40 km pohjoižpäivnouzmha avtotedme.

Klimat om ven kontinentaline. Voden keskmäine lämuz om +3,2 C°, kezakun-elokun +15..+17 C°, tal'vkun-uhokun −8..−10 C°. Ekstremumad oma −52 C° (viluku) i +35 C° (eloku). Kezaaigan minimum om −4 C° (kezaku), tal'vaigan maksimum om +8 C° (tal'vku). Ei voi panda halad heinkus vaiše (minimum +1 C°). Paneb sadegid 585 mm vodes, enamba kezakus-sügüz'kus (62..80 mm kus), vähemba vilukus-sulakus (27..33 mm kus).

Tobmuz

Bežeckan lidnankund oli vll 2006−2023. Kaik koume küläd mülüiba lidnankundha Bežeckan ližaks. Lidnankundan pind oli 18,41 nellikkilometrad.

Edeline lidnankundan tobmuden pämez' oli Sergei Platonov, radoi vn 2013 sügüz'kuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 24 522 ristitud, lidnankundan — 25 728 ristitud, rajonan seičeme kümnendest. Vl 2021 lidnan ristitišt oli 21 466 eläjad. Vl 2017 kaik 21 728 ristitud elihe lidnas i 22 854 ristitud kaikes lidnankundas. Kaikiš suremb lidnan ristitišt oli 29..30 tuhad eläjid vozil 1967−2001 (30 800 rist. vl 1998).

Rahvahad (enamba 0,4 % vl 2021): venälaižed — 90,3 %, toižed rahvahad — 2,5 %, rahvahuden ozutandata — 7,2 %.

Ortodoksižen hristanuskondan kaks'kümne koume pühäpertid^[4] oma kaičenus i saudud lidnas: Spasan Londuseližen mel'kuvan kafedraline päjumalanpert', 13 jumalanpertid, kaks' kodijumalanpertid, viž časounäd, Blagoveššenjan naižjumalankodi (kaks' jumalanpertid). Niiden ližaks kaks' päjumalanpertid (Blagoveššenjan i Eläbzdusen) i koume jumalanpertid ei ole kaičenus.

Lapsiden opendusen aluzkundad oma ühesa nomeruidud päivkodid (nomer 2..5, 8..11, 15), viž keskškolad (nomer 2..6), gimnazii nomer 1 V.Ja. Šiškovan nimed, škol-internat, lapsiden da norišton pert', venän soitčomamahton muzikškol, kompleksine sportškol. Professionaližen opendusen aluzkundad: Bežeckan tegimištoliž-ekonomine^[5], pedagogine^[6] i medicinine^[7] kolledžad, Tverin torguimiž-ekonomižen kolledžan filial, Tverin valdkundaližen tehnižen universitetan filial.

Galerei

Memorialine kompleks (2018)
Spasan Londuseližen mel'kuvan kafedraline päjumalanpert', vn 2011 nägu
Bežeckan «ASO»-tegim vl 2020 (kompressorad)
«Jubileinii»-kinoteatr (2020)
Bežeck-raudtestancijan sauvuz vl 2013

Homaičendad

Irdkosketused

Lidnan da sen ümbrikon tobmuden sait (adm-bezheck.ru). (ven.)

Bežeck Vikiaitas

	Tverin agjan lidnad
	Andreapol' \| Belii \| Bežeck \| Bologoje \| Kaläzin \| Kašin \| Kimri \| Konakovo \| Krasnii Holm \| Kuvšinovo \| Lihoslavl' \| Nelidovo \| Ostaškov \| Päivlaskmpol'ne Dvin \| Ržev \| Staric \| Zubcov \| Toropec \| Toržok \| Tver' \| Udoml' \| Ves'jegonsk \| Višnii Voločok

[1] «ASO»-tegimen sait (asobezh.ru). (ven.)

[2] «Bežecksel'maš»-tegimen sait (bezeckselmash.ru). (ven.)

[3] Bežeckan raudbetontegesiden tegimen sait (bjbi.ru). (ven.)

[4] Bežeckan pühäpertid sobory.ru-saital. (ven.)

[5] Bežeckan tegimištoliž-ekonomižen kolledžan sait (bezhcollege.ru). (ven.)

[6] Bežeckan kolledžan A.M. Peresleginan nimed sait (bkimper.nubex.ru). (ven.)

[7] Bežeckan medicinižen kolledžan sait (studentbmk-ru.ucoz.com). (ven.)

[1]

[2]

[3]

[4]

[5]

[6]

[7]