Jahrom

Jahrom
Яхрома
Lidnanznam;	Flag;
Valdkund	Venäma
Eläjiden lugu (2024)	13,618 ristitud
Pind	17 km²
Telefonkod	+7−49 622-x-xx-xx
Avtokod	50, 90, 150, 190, 750
Aigvö	UTC+3 (MSK+0)

Jahrom (ven.: Я́хрома) om Venäman lidn Moskvan agjan pohjoižes. Mülüb Dmitrovan ümbrikho (edel 2025. vot — lidnümbrikho, edel vn 2018 semendkud — rajonha), sen penemb lidn kahtespäi i kahtenz' surtte eländpunkt.

Istorii

Nügüdläižen eländpunktan aluz om pandud Surovcevo-külän sijas vl 1841 kuti vatefabrik (Pokrovskai-manufaktur, nügüd' ei ole rados) da žilo senno. Nimitihe jogen mödhe, sen nimi libub kadonudes merän kelespäi i znamoičeb «järvikaz ma». Saudihe Savölovon raudted žilonno vl 1901, stancii sai Jahrom-nimitust mugažo. Vll 1932−1937 Kanal Moskvan nimed om saudud türmatud mehil, se jagoi eländpunktan poleti pohjoižespäi suvhe, päivlaskmaine pala om enamba. Jahrom sai lidnan statusad vn 1940 21. päiväl elokud. Toižen mail'man sodan aigan lidn oli okkupiruidud nacistižen Germanijan sodavägil vl 1941 lühüdaks aigaks (27. kül'mku — 7. tal'vku).

Jahrom šingotase sauvondlavoiden tegimel^[1], bumagfabrikal i kartonpakuitezkombinatal^[2], sömtegimištol (leibänkombinat, kofen edheotand), mägisuks'kurortal^[3]. Ende kezerduzkudondfabrik i Jahroman avtobustegim (1957−2016, avtobusoiden i kommunaližen tehnikan ühthekeradamine) radoiba mugažo.

Geografijan andmused

Lidn sijadase lidnümbrikon keskuzpalan suves, Kanalan Moskvan nimed randoil, 150 m ü.m.t. keskmäižel korktusel. Jahrom-jogi jokseb paralleližikš kanalanke i läbitab lidnan päivlaskmašt palad.

Matkad Moskvhasai om vižkümne viž kilometrad suvhe. Lähembaine lidn om Dmitrov koumes kilometras pohjoižpäivnouzmha.

Jahrom-raudtestancii radab lidnan suvipalas, kanalan päivnouzmaižel randal.

Eläjad

Vl 1939 žilon ristitišt oli 14 896 eläjad, vl 1959 lidnan — 16 263 eläjad. Vn 2010 Venäman rahvahanlugemižen mödhe lidnan eläjiden lugu oli 13 214 ristutud, vn 2021 — 14 011 ristitud. Otab üks'toštkümnendest lidnümbrikon ristitištos. Kaik 14 245 eläjad oli lidnas vl 2017. Kaikiš suremb lidnan ristitišt oli 16..17 tuhad eläjid vll 1959−1998 (17 499 rist. vl 1989).

Rahvahad (ozutadud rahvahudenke vl 2010): venälaižed — 96,3 %, totarlaižed — 1,0 %, toižed rahvahad — 2,7 %.

Ortodoksižen hristanuskondan koume pühäpertid^[4] oma kaičenus i saudud lidnas: Eläban Eziauguižen Stroican päjumalanpert' (om saudud vll 1892−1895) i kaks' jumalanpertid.

Openduz

Lapsiden opendusen aluzkundad oma 12 päivkodid i koume keskškolad (nomer 1, 2, 3).

Professionaližen opendusen lähembaižed aluzkundad ratas Dmitrov-lidnas. Jahroman kolledž sijadase lidnümbrikon Novosin'kovo-žilos kaks'kümnes kilometras lodeheze avtotedme Jahromaspäi.

Galerei

Kul'turšingotesen Jahromskii-keskuz (2022)
Eläban Eziauguižen Stroican päjumalanpert', vn 2018 nägu
Pühän Jumalanmaman Katken jumalanpert', vn 2009 nägu
Kanalan Moskvan nimed šlüz nomer 3 vl 2018
Jahrom-raudtestancii vl 2009

Homaičendad

Irdkosketused

Jahrom Vikiaitas

	Moskvan agjan lidnad
	Aprelevk \| Balaših \| Beloozörskii \| Bronnici \| Čehov \| Černogolovk \| Dedovsk \| Dmitrov \| Dolgoprudnii \| Domodedovo \| Drezn \| Dzeržinskii \| Dubn \| Elektrogorsk \| Elektrostal' \| Elektrougli \| Fräzino \| Golicino \| Himki \| Hot'kovo \| Istr \| Ivantejevk \| Jahrom \| Jegor'jevsk \| Kašir \| Klin \| Kolomn \| Korolöv \| Kotel'niki \| Krasnoarmeisk \| Krasnogorsk \| Krasnozavodsk \| Krasnoznamensk \| Kubink \| Kurovskoje \| Likino-Dulövo \| Litkarino \| Lobn' \| Losino-Petrovskii \| Luhovici \| Lüberci \| Mitišči \| Možaisk \| Naro-Fominsk \| Noginsk \| Odincovo \| Orehovo-Zujevo \| Ozöri \| Pavlovskii Posad \| Peresvet \| Podol'sk \| Protvino \| Puščino \| Puškino \| Ramenskoje \| Reutov \| Rošal' \| Ruz \| Sergijev Posad \| Serpuhov \| Solnečnogorsk \| Stupino \| Šatur \| Ščolkovo \| Zaraisk \| Zvenigorod \| Žukovskii \| Taldom \| Vanh Kupavn \| Verei \| Vidnoje \| Visokovsk \| Volokolamsk \| Voskresensk

[1] Dmitrovan sauvondlavoiden tegimen sait (dzsl.ru). (ven.)

[2] Jahroman kartonpakuitezkombinatan enzne sait (gofra-box.ru) i sen uz' versii (я-картон.рф). (ven.)

[3] «Jahroma»-sportbobuštuzparkan sait (yahroma-park.ru). (ven.)

[4] Jahroman pühäpertid sobory.ru-saital. (ven.)

[1]

[2]

[3]

[4]