Elektrogorsk

Elektrogorsk
Электрогорск

Lidnanznam	Flag
Valdkund	Venäma
Eläjiden lugu (2024)	29,912 ristitud
Pind	39,81 km²
Telefonkod	+7−49 643-x-xx-xx
Avtokod	50, 90, 150, 190, 750
Aigvö	UTC+3 (MSK+0)

Elektrogorsk (ven.: Электрого́рск) om Venäman lidn Moskvan agjan pohjoižpäivnouzmas. Mülüb Pavlovskii Posadan lidnümbrikho, edel 2023. vot oli erigoittud lidnümbrikoks.

Istorii

Eländpunktan aluz om pandud vll 1912−1914 kuti žilo udenno elektrostancijanno (nüg. Elektrogorskan GRES), radoi sijaližel turbhal. Vn 1926 rahvahanlugemižes om kirjutadud kuti lidnanvuitte Elektroperedač-žilo (ven.: Электропередача «Elektrooigenduz»). Žilo sai lidnan statusad nügüdläiženke nimenke vn 1946 25. päiväl sulakud. GRES radab londuseližel gazal vspäi 1985. Lidn oli erigoittud lidnümbrikoks vll 2009−2022.

Elektrogorsk šingotase elektrusen tehmižel GRES:an abul, kahtel zell'edheotandal i medicinižiden abutusiden tehmižel, sauvondmaterialiden pästandal (metalližed konstrukcijad, elektrolaudad, iknad, puižed apakod, trotuarine apakut, asfal't), sömtegimištol (kül'menzoittud sömtavarad, alkogolitomad jomad i marjasižed želed), mašinansauvomižel (avto- i aviakohenduzmašiništ, vilugoitimed), meblin i sen furnituran edheotandoil, mugažo voižimiden, himižreagentoiden i radsobiden tehmine om lidnas. Kaks' tedokeskust: keskuz AES:oiden varuitomudes i kivivoin ümbriradmižen institut.

Geografijan andmused

Pavlovskii Posadan lidnümbrikon röunad i sijaduz agjas vn 2023 kartal

Lidn sijadase ümbrikon pohjoižpäivnouzmas, 132 m ü.m.t. keskmäižel korktusel. Virk-jogi (ven.: Вы́рка 15 km pitte, Kläz'man hura ližajogi) zavodiše lidnan ani suvipäivlaskmaižen röunan taga, kävutadas lidnan puhtastadud veziden vedhuzvaluks. Om uitoid lidnan pohjoižes.

Matkad Vladimiran agjhasai om viž kilometrad pohjoižpäivnouzmha orhal. Matkad Moskvhasai (Moskvan rengazavtotehesai) om 65 km päivlaskmha-suvipäivlaskmha. Lähembaižed lidnad oma Orehovo-Zujevo suvipäivnouzmha i Pavlovskii Posad suvipäivlaskmha.

Elektrogorsk-raudtestancii radab lidnan pohjoižapalas vspäi 1925, se om 17-kilometrižen sarakon Pavlovskii Posad-lidnaspäi lopstancijaks. Edel 1995. vot se oli kaidraižuižen raudteverkon zavodindaks. Toine om «14. km»-passažirplatform lidnan suviröunal. «Volg»-mante (M7-trass) mäneb kahtes kilometras suvhe lidnaspäi. Moskvan agjan sur' rengazavtote (A108-trass) ümbärdab lidnad koumes kilometras pohjoižpäivnouzmha.

Tobmuz

Lidn oli lidnümbrikon üks'jäižeks eländpunktaks. Oficialižetoi Vihand Sar'-žilo (ven.: Зелёный Остров) i 36 sadsebrad mülüiba lidnümbrikon territorijha mugažo.

Denis Semönov radoi lidnümbrikon tobmuden pämehen vn 2016 tal'vkuspäi.

Eläjad

Vl 1939 žilon ristitišt oli 12 370 eläjad, vl 1959 lidnan — 11 454 eläjad. Vn 2010 Venäman rahvahanlugemižen mödhe lidnan eläjiden lugu oli 22 480 ristutud, vn 2021 — 29 982 ristitud (kaikiš suremb). Kaik 23 076 eläjad oli lidnas vl 2017. Kaikiš suremb lidnan ristitišt jäb läz 30 tuhad eläjid vspäi 2021.

Rahvahad (ozutadud rahvahudenke vl 2010): venälaižed — 91,4 %, uzbekad — 1,6 %, ukrainalaižed — 1,3 %, moldovalaižed — 1,2 %, azerbaidžanlaižed — 1,0 %, toižed rahvahad — 3,5 %.

Ortodoksižen hristanuskondan nell' pühäpertid oma saudud i avaitud lidnas vspäi 2000: koume jumalanpertid i časoun'.

Openduz

Lapsiden opendusen aluzkundad oma viž nimitadud i nomeruidud päivkodid (nomer 35, 39..41, 43), keskškol nomer 14, licei (mülütab ližaopendusen Istoki-keskust «Purtked» vspäi 2024), Pavlovskii Posadan škol-internatan palakund (edel 2024. vot korrekcine škol), muzikškol, čomamahtoiden škol, Vimpel-sportškol.

Ližaopendusen keskuz om lidnan professionaližen opendusen aluzkundaks. Ende Pavlovskii Posadan tehnikuman palakund radoi (profškol nomer 34 vn 2014 keskhesai).

Galerei

• 
  Elektrogorskan GRES i sen üks' vilugoitajiš uitoišpäi
• 
  Ph. Konstantinan jumalanpert', vn 2009 nägu
• 
  Kul'turkeskuz (vn 2016 olend)
• 
  Elektrogorsk-raudtestancijan sauvuz vl 2009

Irdkosketused

• Enččen lidnmbrikon tobmuden sait (elgorsk.ru), om täuttud vhesai 2018. (ven.)