Krasnoznamensk (Moskvan agj)

Krasnoznamensk
Краснознаменск
Lidnanznam;	Flag;
Valdkund	Venäma
Eläjiden lugu (2024)	44,657 ristitud
Pind	13,32 km²
Pämez'	Vladimir Pirogov; (sügüz'ku 2022—)
Telefonkod	+7−49 633-x-xx-xx,; +7−498-xxx-xx-xx
Avtokod	50, 90, 150, 190, 750
Aigvö	UTC+3 (MSK+0)

Sil sanal voib olda toižid znamoičendoid; miše nähta niid, tulgat tänna.

Krasnoznamensk (ven.: Краснозна́менск) om Venäman lidn, lidnümbrik da SATÜ Moskvan agjan keskuzpalan suvipäivlaskmas. Kosmoslendusiden dublirui ohjastuzkeskuz radab lidnas, se-žo keskuz om päine valdkundan kaičendsarakon täht.

Istorii

Eländpunktan aluz om pandud vl 1950 kuti žilo Golicino-2-nimitusenke Sidorovskoje-žilonno, konz edahaižen aviacijan radiokeskuz radoi jo Sidorovskojes. Kätihe sauptud radnikžiloks vl 1977 peitol'ženke Krasnoznamensk-nimenke, oficialine nimituz jäi edeližeks. Radnikžilo sai lidnan statusad vn 1981 14. päiväl sügüz'kud. Udesnimitihe nügüdläižikš oficialižešti vl 1994.

Krasnoznamensk šingotase kaičendsarakon i tedotehmištol'žen kompleksan edheotandoil, mugažo plastikkartoiden edheotand i likörvintegim ratas lidnas.

Geografijan andmused

Lidn sijadase Odincovon i Naro-Fominskan lidnümbrikoiden keskes, 200 m ü.m.t. keskmäižel korktusel.

Matkad Moskvhasai (Uz' Moskv) om kaks' kilometrad suvipäivnouzmha, Moskvan rengazavtotehesai — 27 km pohjoižpäivnouzmha. Lähembaižed lidnad (orhal) oma Aprelevk (raudtestancii) nelläs kilometras suvhe i Golicino (raudtestancii) ühtes kilometras lodeheze.

«Vaugedvenäma»-avtote (M1-trass) om lidnan pohjoižröunaks. Moskvan agjan pen' rengazavtote (A107-trass) mäneb ühtes..kahtes kilometras päivlaskmha lidnaspäi.

Tobmuz

Krasnoznamensk om lidnümbrikon üks'jäižeks eländpunktaks. Lidnfartaloiden pind om 6,09 km².

Lidnümbrikon tobmuden pämez' om sen Administracijan pämez'. Edeližed lidnan Administracijan pämehed oma Aleksandr Kondraštin (vn 2022 uhoku-sügüz'ku), Viktorija Kovalenko (kül'mku 2018 — eloku 2022), Oleg Maruškin (keväz'ku 2017 — kül'mku 2018). Lidnümbrikon Deputatoiden nevondkundan ezimez' om Aleksandr Mostkovoi vn 2019 keväz'kuspäi. Edeližed lidnan nevondkundan ezimehed oma Andrei Il'jin (sulaku 2016 — kül'mku 2018), Mihail Sapunov (radoi vn 2015 tal'vkuhusai).

Eläjad

Vl 1996 lidnan ristitišt oli 25 300 eläjad, vl 2002 — 28 044 eläjad. Vn 2010 Venäman rahvahanlugemižen mödhe lidnan eläjiden lugu oli 36 103 ristutud, vn 2021 — 43 868 ristitud. Kaik 41 287 eläjad oli lidnas vl 2017. Kaikiš suremb lidnan ristitišt om nügüd'. Kanzad Pleseck- i Baikonur-kosmodromoišpäi sirtas lidnha valdkundaližen programan mödhe.

Rahvahad (ozutadud rahvahudenke vl 2010): venälaižed — 88,4 %, ukrainalaižed — 5,9 %, vaugedvenälaižed — 1,9 %, armenijalaižed — 1,0 %, toižed rahvahad — 2,8 %.

Ortodoksižen hristanuskondan kaks' pühäpertid^[1] oma avaitud lidnas: ph. Mikulai-arhangelan jumalanpert' (om saudud vll 2014−2016) i Tozioiktan Lazarin časoun'.

Openduz

Lapsiden opendusen aluzkundad^[2] oma ühesa nimitadud i nomeruidud päivkodid (nomer 1..9), keskškol nomer 4, kaks' gimnazijad (nomer 1 i 2), licei nomer 1, lapsiden da norišton sädamižen šingotesen keskuz, norišton joudan keskuz, čomamahtoiden škol (ende muzikškol), ümbrikon sportškol.

Privatine Krasnoznamenskan lidnalaine kolledž^[3], valdkundaližen Odincovon tehnikuman filial^[4] i Moskvan privatižen finansiž-tehmištol'žen «Sinergii»-universitetan regionaline palakund^[5] oma lidnan professionaližen opendusen aluzkundoikš.

Galerei

Krasnoznamenskan kontrol'punkt (2006)
Lidnümbrikon tobmuden sauvuz (heinku 2024)
Ph. Mikulai-čudonsädajan jumalanpert' ani lidnan päivlaskmaižen röunan taga, vn 2007 nägu
Mirun torg vl 2004
Podsnežnik-adivpert' (2007, «Lumikelloine»)
«Kosmos»-kul'turkeskuz (vn 2007 olend)
Lapsiden da norišton šingotesen keskuz (2007)

Homaičendad

Irdkosketused

Lidnümbrikon tobmuden aluzkundoiden oficialine sait (краснознаменск-зато.рф). (ven.)

Krasnoznamensk (Moskvan agj) Vikiaitas

	Moskvan agjan lidnad
	Aprelevk \| Balaših \| Beloozörskii \| Bronnici \| Čehov \| Černogolovk \| Dedovsk \| Dmitrov \| Dolgoprudnii \| Domodedovo \| Drezn \| Dzeržinskii \| Dubn \| Elektrogorsk \| Elektrostal' \| Elektrougli \| Fräzino \| Golicino \| Himki \| Hot'kovo \| Istr \| Ivantejevk \| Jahrom \| Jegor'jevsk \| Kašir \| Klin \| Kolomn \| Korolöv \| Kotel'niki \| Krasnoarmeisk \| Krasnogorsk \| Krasnozavodsk \| Krasnoznamensk \| Kubink \| Kurovskoje \| Likino-Dulövo \| Litkarino \| Lobn' \| Losino-Petrovskii \| Luhovici \| Lüberci \| Mitišči \| Možaisk \| Naro-Fominsk \| Noginsk \| Odincovo \| Orehovo-Zujevo \| Ozöri \| Pavlovskii Posad \| Peresvet \| Podol'sk \| Protvino \| Puščino \| Puškino \| Ramenskoje \| Reutov \| Rošal' \| Ruz \| Sergijev Posad \| Serpuhov \| Solnečnogorsk \| Stupino \| Šatur \| Ščolkovo \| Zaraisk \| Zvenigorod \| Žukovskii \| Taldom \| Vanh Kupavn \| Verei \| Vidnoje \| Visokovsk \| Volokolamsk \| Voskresensk

[1] Krasnoznamenskan pühäpertid (Moskvan agj) sobory.ru-saital. (ven.)

[2] Lapsiden opendusen aluzkundad lidnümbrikon openduzohjandusen krasnoznamensk.edumsko.ru-saital. (ven.)

[3] Krasnoznamenskan lidnalaižen kolledžan sait (kgk.college). (ven.)

[4] Krasnoznamenskan filialan lehtpol' Odincovon tehnikuman ie-teh.ru-saital. (ven.)

[5] «Sinergii»-universitetan Krasnoznamenskan palakundan sait (kz-synergy.ru). (ven.)

[1]

[2]

[3]

[4]

[5]