Dedovsk

Dedovsk
Дедовск

Lidnanznam	Flag
Valdkund	Venäma
Eläjiden lugu (2024)	30,373 ristitud
Pind	7 km²
Telefonkod	+7−498-xxx-xx-xx
Avtokod	50, 90, 150, 190, 750
Aigvö	UTC+3 (MSK+0)

Dedovsk (ven.: Де́довск) om Venäman lidn Moskvan agjan keskuzpalan päivlaskmas. Mülüb municipaližhe Istr-ümbrikho (edel 2025. vot — lidnümbrikho, edel vn 2017 keväz'kud — Istran rajonha), sen kahtenz' surtte lidn i eländpunkt.

Istorii

Pustolän, ende Dedovo-külä mainitase ezmäižen kerdan aigkirjas vl 1573. Dedovo-žilo om znamoitud vn 1784 kartal.

Nügüdläižen eländpunktan aluz om pandud vll 1911−1913 kuti Dedovskii-žilo udenno kezerdusen da kanghiden fabrikanno (nügüd' pästab tehnižid kanghid). Nügüd'aigaine fabrik šingoti Dedovskijad teravas, i se lainzi Dedovo-žilod aigan mändes. Kätihe radnikžiloks vn 1925 21. päiväl semendkud. Žilo kazvoi, mülütihe kümne eländpunktad sihe. Radnikžilo sai lidnan statusad vl 1940 nügüdläiženke nimitusenke. Toižen mail'mansodan aigan Toran Moskvas pala mäni lidnas da sen ümbrištos vn 1941 tal'vkun 2.-8. päivil.

Dedovsk šingotase tekstiližel da omblemižel sarakol (tehnižed kanghad, sportivižed i korporativižed sobad, kengiden fabrik), ladimensauvomižel (märičendkompleksad i avtomatik gazkompleksan täht), mugažo leibtegim i seinapakuden (oz., metrostancijoiden täht) edheotand ratas lidnas.

Geografijan andmused

Municipaližen Istr-ümbrikon sijaduz agjas vn 2010 kartal

Lidn sijadase lidnümbrikon päivnouzmas, 190 m ü.m.t. keskmäižel korktusel. Istr-jogen hurad Gräzev- i Nahabink-ližajoged (ven.: Грязева 10 km pitte, Нахабинка 25 km pitte) jokstas ani suvhe lidnaspäi.

Matkad Moskvhasai (Moskvan rengazavtotehesai) om kaks'kümne koume kilometrad päivnouzmha. Lähembaižed lidnad oma Istr 15 km päivlaskmha orhal, avtotel vai raudtel, Moskvan Zelenograd-rajon 10 km pohjoižhe orhal, i Krasnogorsk 12 km päivnouzmha-suvipäivnouzmha orhal vai teidme. Venäman kaikiš järedamb lidnanvuitte Nahabino-žilo (46,5 tuh. rist. vl 2020) zavodiše ani suvipäivnouzmha lidnaspäi.

Dedovsk-raudtestancii (lidnan keskuses, vll 1906−1965 stancijan nimituz oli Gučkovo), Malinovk- (suvipäivnouzmas) i Miitovskai- (lodehes) platformad ratas lidnas «Moskv (Rigan päraudtestancii) — Volokolamsk»-keskustal. Volokolamskan mante läbitab lidnan pohjoižpalad.

Tobmuz

Dedovsk oli lidnankundan keskuseks edel vn 2017 keväz'kud, sen pind oli 25,52 km².

Eläjad

Vl 1939 radnikžilon ristitišt oli 13 529 eläjad, vl 1959 lidnan — 19 549 eläjad. Vn 2010 Venäman rahvahanlugemižen mödhe lidnan eläjiden lugu oli 29 108 ristutud, vn 2021 — 30 731 ristitud. Kaik 29 558 eläjad oli lidnas vl 2017. Otab nelländest ümbrikon ristitištos. Kaikiš suremb lidnan ristitišt om 27..30 tuhad eläjid vspäi 1979 (30 740 rist. vl 1989 i 30 731 rist. vl 2021).

Rahvahad (ozutadud rahvahudenke vl 2010): venälaižed — 94,7 %, ukrainalaižed — 1,0 %, toižed rahvahad — 4,3 %.

Ortodoksižen hristanuskondan Ph. Jurgii-vägestusenkandajan jumalanpert' om saudud vll 2000−2005. Baptizman «Päzutand»-pühäpert' (vspäi 1948) om avaitud lidnas.

Openduz

Lapsiden opendusen aluzkundad oma ühesa nimitadud i nomeruidud päivkodid (nomer 2, 5, 7, 11..13, 17, 29, 50), koume keskškolad (nomer 1, 3, 4), licei, ehtal'ne škol, lapsiden sädamižen studijad, čomamahtoiden školan V.A. Širšovan nimed palakund (Istr, edel vn 2023 sulakud Dedovskan muzikškol), Istran sportškolan N.L. Fedorovičun nimed palakund.

Professionaližen opendusen aluzkundad ratas lähembaižiš lidnoiš.

Galerei

• 
  Universaline lauk (2013)
• 
  Ph. Jurgii-vägestusenkandajan jumalanpert', vn 2013 nägu
• 
  Kul'turkeskuz (2012)
• 
  Dedovsk-raudtestancii vl 2010

Irdkosketused

• Municipaližen ümbrikon tobmuden aluzkundoiden oficialine sait (istra-adm.ru). (ven.)