Orehovo-Zujevo

Orehovo-Zujevo
Орехово-Зуево
Lidnanznam;	Flag;
Valdkund	Venäma
Eläjiden lugu (2024)	104,728 ristitud
Pind	36,38 km²
Telefonkod	+7−49 641-x-xx-xx,; +7−49 642-x-xx-xx
Avtokod	50, 90, 150, 190, 750
Aigvö	UTC+3 (MSK+0)

Orehovo-Zujevo (ven.: Оре́хово-Зу́ево) om Venäman lidn da raudtesol'm Moskvan agjan pohjoižpäivnouzmas. Se om Orehovo-Zujevon lidnümbrikon administrativine keskuz (edel vn 2018 vilukud — rajonan, ei mülünd sihe).

Istorii

Eländpunktan aluz om pandud lidnan statusanke Orehovo-, Zujevo- (mainitase vl 1209 kuti Voločok Zujev) i Nikol'skoje-žiloiden ühtenzoitusel vl 1917. Žilod kazvoiba tekstil'fabrikoiden sauvomižen tagut 18. voz'sadaspäi. Vl 1890 kaik 17 fabrikad radoiba Orehovos 30 tuh. radnikoidenke. «Moskv (Kurskan päraudtestancii) — Alauz'lidn»-raudte läbiti Orehovo-žilod vl 1862. Vl 1929 mülütihe Dubrovk-žilod lidnha. Ühtištadihe kahesad tekstil'fabrikad bumagkanghiden kombinataks (ei ole rados). Pästtihe sauvondmaterialid (pumaterialad, savič).

Orehovo-Zujevo šingotase himižel tegimel (tervad, fenoplastad, tektolitad, kleid), raudtetransportal, torguindal i erazvuiččil toižil holitišil.

Geografijan andmused

Lidn sijadase lidnümbrikon pohjoižes, Kläz'm-jogen molembil randoil, 120 m ü.m.t. keskmäižel korktusel. Matkad Vladimiran agjhasai om seičeme kilometrad pohjoižpäivnouzmha.

Matkad Moskvhasai (Moskvan rengazavtotehesai) om 78 km päivlaskmha. Lähembaižed lidnad (orhal) oma Likino-Dulövo seičemes kilometras suvhe, Drezn seičemes kilometras suvipäivlaskmha i Elektrogorsk 12 km lodeheze.

Orehovo-Zujevo-raudtestancii radab lidnan suves vspäi 1861 (kaks' platformad), mugažo Krutoje-passažirplatform om päivnouzmas i Severnii-seižutezpunkt suves. Moskvan raudten sur' rengaz läbitab lidnan suvipäivnouzmašt pol't (tuli vl 1899, om saudud täuzin vodele 1943), järed Orehovo-Zujevo-sortiruindstancii radab renghal vspäi 1970 lidnan suves vedimdepon ühtes. Moskvan agjan sur' rengazavtote (A108-trass) mäneb lidnan kal't, sen uz' pala ümbärdab lidnad päivlaskmaspäi. Lidn ühtenzoitase vižkilometrižel sarakol «Volg»-avtotenke pohjoižes (M7-trass).

Eläjad

Vl 1939 lidnan ristitišt oli 99 273 eläjad, vl 1959 — 108 297 eläjad. Vn 2010 Venäman rahvahanlugemižen mödhe lidnan eläjiden lugu oli 120 670 ristutud, nügüdläižen lidnümbrikon pol', vn 2021 — 105 745 ristitud. Kaik 119 956 eläjad oli lidnas vl 2017. Kaikiš suremb lidnan ristitišt oli 135..137 tuhad eläjid vll 1982−1993 (137 198 rist. vl 1989).

Rahvahad (ozutadud rahvahudenke vl 2010): venälaižed — 94,0 %, totarlaižed — 1,5 %, armenijalaižed — 1,1 %, toižed rahvahad — 3,4 %.

Ortodoksižen hristanuskondan kaks'toštkümne pühäpertid^[1] oma kaičenus i saudud lidnas: Pühän Jumalanmaman sündundan päjumalanpert' (om saudud vll 1872−1895), kümne jumalanpertid i časoun'. Islaman mečet' om avaitud.

Openduz

Lapsiden opendusen aluzkundad oma kaks'kümne ühesa nomeruidud päivkodid (nomer 1..5, 7, 8, 10..12, 16, 18, 20, 21, 23..26, 28, 30, 31, 38, 43..46, 66, 73, 75), vižtoštkümne keskškolad (nomer 1, 2, 4..6, 10..12, 16..18, 20, 22, 25, 26), licei, kaks' gimnazijad (nomer 14 i 15), lapsiden sädamižen Rodnik-keskuz («Purde»), čomamahtoiden škol Jakov Flieran nimed, čomamahtoine škol, sportškol.

Professionaližen opendusen aluzkundad oma Orehovo-Zujevon raudtetehnikum^[2], Valdkundaližen GTU:n Professionaliž-pedagogine kolledž^[3], Valdkundaližen GTU:n Tegimištoliž-ekonomine kolledž^[4], Dizainan kolledž^[5], Moskvan agjan medkolledžan filial (ende Moskvan agjan medicinine kolledž nomer 3^[6], Moskvan üläopendusen aluzkundoiden koume filialad.

Galerei

Lidnümbrikon administracijan üks' sauvusišpäi (2009)
Pühän Jumalanmaman sündundan päjumalanpert', vn 2012 nägu
«Nikol'skii»-torguindkeskuz vl 2013
Kul'turan da joudan Zimnii teatr-keskuz («Tal'veline teatr», vn 2015 nägu)
Orehovo-Zujevo-päraudtestancii vl 2009

Homaičendad

Irdkosketused

Lidnümbrikon tobmuden sait (ozmo.ru). (ven.)

Orehovo-Zujevo Vikiaitas

	Moskvan agjan lidnad
	Aprelevk \| Balaših \| Beloozörskii \| Bronnici \| Čehov \| Černogolovk \| Dedovsk \| Dmitrov \| Dolgoprudnii \| Domodedovo \| Drezn \| Dzeržinskii \| Dubn \| Elektrogorsk \| Elektrostal' \| Elektrougli \| Fräzino \| Golicino \| Himki \| Hot'kovo \| Istr \| Ivantejevk \| Jahrom \| Jegor'jevsk \| Kašir \| Klin \| Kolomn \| Korolöv \| Kotel'niki \| Krasnoarmeisk \| Krasnogorsk \| Krasnozavodsk \| Krasnoznamensk \| Kubink \| Kurovskoje \| Likino-Dulövo \| Litkarino \| Lobn' \| Losino-Petrovskii \| Luhovici \| Lüberci \| Mitišči \| Možaisk \| Naro-Fominsk \| Noginsk \| Odincovo \| Orehovo-Zujevo \| Ozöri \| Pavlovskii Posad \| Peresvet \| Podol'sk \| Protvino \| Puščino \| Puškino \| Ramenskoje \| Reutov \| Rošal' \| Ruz \| Sergijev Posad \| Serpuhov \| Solnečnogorsk \| Stupino \| Šatur \| Ščolkovo \| Zaraisk \| Zvenigorod \| Žukovskii \| Taldom \| Vanh Kupavn \| Verei \| Vidnoje \| Visokovsk \| Volokolamsk \| Voskresensk

[1] Orehovo-Zujevon pühäpertid sobory.ru-saital. (ven.)

[2] Orehovo-Zujevon raudtetehnikuman sait (ozgt.ru). (ven.)

[3] Valdkundaližen GTU:n Professionaliž-pedagogižen kolledžan sait (ppk.ggtu.ru). (ven.)

[4] Valdkundaližen GTU:n Tegimištoliž-ekonomižen kolledžan sait (ozpec.ggtu.ru). (ven.)

[5] Dizainan kolledžan sait (designcollege.narod.ru). (ven.)

[6] Moskvan agjan medicinižen kolledžan nomer 3 sait (momk3.orgs.biz). (ven.)

[1]

[2]

[3]

[4]

[5]

[6]