Klin (lidn)

Klin
Клин

Lidnanznam	Flag
Valdkund	Venäma
Eläjiden lugu (2024)	88,425 ristitud
Pind	42 km²
Telefonkod	+7−49 624-x-xx-xx
Avtokod	50, 90, 150, 190, 750
Aigvö	UTC+3 (MSK+0)

Klin (ven.: Клин) om Venäman lidn Moskvan agjan lodehes. Se om Klin-lidnümbrikon administrativine keskuz i suremb lidn kahtespäi.

Istorii

Eländpunkt mainitase ezmäižen kerdan Nikonan aigkirjas vl 1317 nügüdläiženke nimenke. Mülütihe Tverin ruhtinazkundha, varmed lidnuz oli toradamhas Moskvad vaste. Vspäi 1482 om alištunu Moskvan tobmudele, kadoti kaičendznamoičendad i šingotihe hebontransportan holitišil. Klin sai Moskvan gubernijan makundan lidnan statusad vl 1785. Toižen mail'mansodan aigan lidn oli okkupiruidud nacistižen Germanijan sodavägil (23. kül'mku — 15. tal'vku 1941), Tora Moskvas mäni.

Klin šingotase sauvondmaterialiden pästandal (sauvondkombinat, ikunstöklan tegim, lämuzizoläcii), sömtegimištol (leibänkombinat, lihakombinat, oluden tegim, kalankazvatandan edheotand), sintetižen kuidun tegimel, medicinižen pakuitesen edheotandoil, mugažo vedimdepo, kombisötken tegim i gigijenan abutusiden edheotand ratas lidnas. Ekologine situacii om sättutoi lähižen rujopoligonan tagut.

Geografijan andmused

Lidnümbrikon sijaduz agjas vn 2010 kartal

Klin-lidnümbrikon kart (2014)

Lidn sijadase ümbrikon keskuzpalan päivnouzmas, Sestr-jogen molembil randoil (ven.: Сестра́ 138 km pitte, Volgan oigedpol'ne bassein), 160 m ü.m.t. keskmäižel korktusel.

Matkad Moskvhasai (Moskvan rengazavtotehesai) om kuz'kümne seičeme kilometrad suvipäivnouzmha. Lähembaižed lidnad oma Solnečnogorsk 23 km suvipäivnouzmha orhal da kaikil teil, i Visokovsk 11 km päivlaskmha.

Klin-raudtestancii radab lidnan päivlaskmas «Moskv (Leningradan päraudtestancii) — Tver'»-keskustal vspäi 1851. «Venäma»-avtote (M10-trass) läbitab lidnad, maksline «Neva»-avtote (M11-trass) mäneb kahtes..koumes kilometras päivlaskmha lidnaspäi. Moskvan agjan Sur' rengazavtote (A108-trass) läbitab Klinan keskuzpalad. Sodalidnut i Klin-5-aerodrom oma lidnas, punolendimiden jouk baziruiše siš.

Eläjad

Vl 1939 lidnan ristitišt oli 27 691 eläjad, vl 1959 — 53 322 eläjad. Vn 2010 Venäman rahvahanlugemižen mödhe lidnan eläjiden lugu oli 80 585 ristutud, rajonan (nüg. lidnümbrik) viž kahesandest, vn 2021 — 88 511 ristitud. Kaik 79 056 eläjad oli lidnas vl 2017. Kaikiš suremb ristitišt oli 93..95 tuhad eläjid vll 1982−1992 (95 100 rist. vl 1992).

Rahvahad (ozutadud rahvahudenke vl 2010): venälaižed — 95,1 %, ukrainalaižed — 1,3 %, toižed rahvahad — 3,6 %.

Ortodoksižen hristanuskondan Eläban Eziauguižen Stroican päjumalanpert' (om saudud vll 1802−1836), seičeme jumalanpertid i viž časounäd oma kaičenus i saudud lidnas. Evangelistoiden pühäpert' om avaitud.

Openduz

Lapsiden opendusen aluzkundad oma päivkodid, keskškolad.

Valdkundaline «Moskvanaluine»-kolledž om lidnan professionaližen opendusen aluzkundaks, kolledžan nell' korpusad kümnespäi sijadasoiš Klinas.

Galerei

• 
  Valdkundaline äifunkcionaline keskuz (2009)
• 
  Ph. Tihon Donantagaižen jumalanpert', vn 2009 nägu
• 
  Kapronnitiden edheotand M10-trassanno vl 2016
• 
  Muzei Pötr Čaikovskii-muzikankirjutajan muštoks (2006)
• 
  Klin-raudtestancii vl 2009

Irdkosketused

• Lidnümbrikon tobmuden aluzkundoiden oficialine sait (klincity.ru). (ven.)
• Lidnan informacine sait (inklincity.ru). (ven.)