Volokolamsk

Volokolamsk
Волоколамск

Lidnanznam	Flag
Valdkund	Venäma
Eläjiden lugu (2024)	25,729 ristitud
Pind	30 km²
Telefonkod	+7−49 636-x-xx-xx
Avtokod	50, 90, 150, 190, 750
Aigvö	UTC+3 (MSK+0)

Volokolamsk (ven.: Волокола́мск) om Venäman lidn Moskvan agjan päivlaskmas. Se om Volokolamskan municipaližen ümbrikon (edel 2025. vot Volokolamskan lidnümbrikon, edel vn 2019 heinkud — rajonan) administrativižeks keskuseks da üks'jäižeks lidnaks. Om «sodahoštusen lidn»-arvonke vspäi 2010.

Istorii

Eländpunkt mainitase ezmäižen kerdan Suzdalin aigkirjas vl 1135 kuti Volok, siš-žo vl 1178 Laman Volok-nimitusenke, oli Volok Lamal-nimi mugažo. Strategine lidn oli tarabošsijal Volgan i Okan keskes, i sikš alištui londoile. Oli Volokan ruhtinazkundan keskuseks vll 1456−1513. Kätihe Volokolamskan makundan lidnaks vspäi 1781. Toižen mail'man sodan aigan lidn oli okkupiruidud nacistižen Germanijan sodavägil vn 1941 lopus (27. reduku — 20. tal'vku).

Volokolamsk šingotase avtopaloiden tegimel, sauvondmaterialiden pästandal (katuzmaterialad, sendvičpanelid), korrozijanvastaižiden materialiden edheotandal, pakuitesen tegimel (alüminiibankad), sömtegimištol (maidtegim, konditerine fabrik, paštetiden tegim), plastiktegesiden edheotandal vannhonusen täht.

Geografijan andmused

Volokolamskan ümbrikon sijaduz agjas vn 2014 kartal

Municipaližen ümbrikon kart (2014)

Lidn sijadase ümbrikon keskuzpalas, Lam-jogen randoil ližajogidenke (ven.: Ла́ма 139 km pitte, Volgan oigedpol'ne bassein), 200 m ü.m.t. keskmäižel korktusel. Vedase läz vižtoštkümneks kilometraks pohjoižespäi suvhe, istorine keskuz om lidnan pohjoižes nügüd'aigan.

Matkad Moskvan röunhasai (Moskvan rengazavtotehesai) om 98 km päivnouzmha orhal, avtotel vai raudtel. Lähembaižed lidnad oma Ruz 40 km suvhe-suvipäivlaskmha orhal vai 53 km avtotedme, i Visokovsk 49 km pohjoižpäivnouzmha orhal vai 61 km avtotedme.

Volokolamsk-raudtestancii radab lidnan suves vspäi 1904. «Baltii»-avtote (M9-trass) läbitab lidnan keskust.

Eläjad

Vl 1897 lidnan ristitišt oli 3 091 eläjad, vl 1939 — 5 413 eläjad. Vn 2010 Venäman rahvahanlugemižen mödhe lidnan eläjiden lugu oli 23 433 ristitud, rajonan pol', vn 2021 — 26 389 ristitud. Kaik 20 838 eläjad oli lidnas vl 2017. Kaikiš suremb lidnan ristitišt oli 26 389 eläjad vl 2021 i 24 800 eläjad vl 2005, edel eländpunktoiden ühtištust vll 2003−2004 — enamba 18 tuhad eläjid vll 1979−1992. Ende ristitišt poleni lähižen järedan rujopoligonan ekspluatacijan tagut.

Ortodoksižen hristanuskondan Sündun Eläbzdusen päjumalanpert' (om saudud 15.-19. voz'sadoil), nell' jumalanpertid, koume časounäd i Kremlin pühäpertid oma kaičenus i saudud lidnas. Mugažo baptizman i islaman loičendpertid üksin oma avaitud.

Openduz

Lapsiden opendusen aluzkundad oma kahesa nimitadud i nomeruidud päivkodid (nomer 2, 3, 5, 8, 9, 13, 21 i Raduga «Jumalanbembel'»), koume augotižškolad (nomer 4, 5, 6), Porohovon aluzškol, koume keskškolad (nomer 2, 3 i Privokzal'nai), gimnazii nomer 1, aluzopendusen škol-internat, muzikškol, lapsiden da norišton sportškol.

Volokolamskan agrarine tehnikum Ivanovskoje-žilos ani lodeheze, Krasnogorskan kolledžan Volokolamskan filial (ende erine Volokolamskan oiktusen, ekonomikan i varuitomuden kolledž) i Moskvan üläopendusen aluzkundoiden severz'-se filialoid oma lidnan professionaližen opendusen aluzkundoikš.

Galerei

• 
  Lämoipalonikoiden depon istorine sauvuz (2016)
• 
  Lidnan Kreml', vn 2010 nägu
• 
  Kul'turkeskuz (vn 2012 olend)
• 
  Avtovagzal vl 2012
• 
  Volokolamsk-raudtestancii vl 2012

Irdkosketused

• Municipaližen ümbrikon tobmuden oficialine sait (volok-go.ru). (ven.)
• Enččen lidnankundan sait (volok-grad.ru). (ven.)